Lənkəran, 1 oktyabr (AZƏRTAC). Oktyabrın 1-də Lənkəran rayonunun prokurorluq işçiləri peşə bayramlarını qeyd ediblər.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək əziz xatirəsinə ehtiramlarını bildiriblər.

Lənkəran Rayon Prokurorluğunun inzibati binasında keçirilən toplantıda rayon prokuroru Natiq Abdullayev prokurorluq əməkdaşlarını peşə bayramı münasibətilə təbrik edib.

Qeyd olunub ki, çətin və şərəfli bir təkamül yolu keçmiş prokurorluq orqanları bu gün öz doğma xalqının və müstəqil dövlətinin hərtərəfli dəstəyinə arxalanaraq dövlətçilik ideyalarına sarsılmaz inam və sadiqlik nümayiş etdirir, qanunun aliliyinin təmin olunması, cinayətkarlığa qarşı kəsərli mübarizə aparılması, vətəndaşların hüquqlarının etibarlı müdafiəsi işində öz xidmətlərini göstərirlər. Ölkəmiz müstəqilliyini bərpa etdikdən sonra Azərbaycan Respublikasının Prokurorluğu sinfi mənafelərə xidmət edən orqandan qanunun aliliyinin, insan hüquq və azadlıqlarının təmin olunması, cinayətkarlıqla mübarizə, qanunçuluğun və hüquq qaydalarının qorunmasına xidmət edən orqana çevrilməklə sivil və demokratik inkişaf yolu keçib.

Bildirilib ki, ümummilli lider Heydər Əliyev prokurorluq orqanlarına həmişə diqqət və qayğı ilə yanaşıb, onların sosial və maddi vəziyyətinin yaxşılaşdırılması istiqamətində ardıcıl tədbirlər həyata keçirib.

Məhz ulu öndər Heydər Əliyevin müvafiq Sərəncamı ilə hər il oktyabrın 1-i Azərbaycanda prokurorluq işçilərinin peşə bayramı günü kimi qeyd olunur.

Diqqətə çatdırılıb ki, Prezident İlham Əliyevin dövlət başçısı kimi fəaliyyəti dövründə də bütün hüquq mühafizə, ədliyyə, məhkəmə və xüsusi xidmət orqanları, o cümlədən prokurorluq öz inkişafının məzmunca və keyfiyyətcə yeni mərhələsinə qədəm qoyub, hərtərəfli dövlət qayğısı ilə əhatə olunan həmin təsisatların işinin müasirləşdirilməsi istiqamətində çox mühüm addımlar atılıb.

Çıxış edənlər prokurorluq işçilərinə göstərilən diqqət və qayğıya görə dövlətimizin başçısına minnətdarlıqlarını bildiriblər.