Bakı, 18 aprel (AZƏRTAC). XX əsrin ispandilli ən böyük yazıçılarından biri, Nobel mükafatı laureatı Qabriel Qarsia Markes Mexikoda 87 yaşında vəfat etmişdir. Həkimlər hələ iyirmi beş il bundan əvvəl bu əfsanəvi kolumbiyalıya xərçəng diaqnozu qoymuşdu. Son həftələrdə onun sağlamlıq durumu qeyri-sabit idi. Bu dəfə pnevmoniya xəstəliyi ilə əlaqədar hospitala düşəndən sonra xərçəng yenidən özünü göstərmişdir.

Doğma vətəni Kolumbiyada nəvazişlə Qabo adlandırılan Qabriel Qarsia Markes Meksikada, yarım əsrdən çox yaşadığı evində vəfat etmişdir. 87 yaşlı yazıçı hospitaldan cəmi bir neçə gün bundan əvvəl çıxmışdı.

Kolumbiya prezidenti Xuan Manuel Santos Markesin vəfat etməsi faktını təsdiqləmişdir.

Markes vətənində milli sərvət hesab edilir.

1961-ci ildə çap olunmuş ilk povesti uğurlu olmuş, altı ildən sonra isə Markes “Yüz ilin tənhalığı” romanını tamamlamışdır. Yazıçı bu əsəri doqquz dəfə yenidən işləmişdir. Romanı Argentinadakı naşirə göndərmək üçün arvadının fenini və mikserini girov qoymalı olmuşdu. O vaxt Markesin arvadı bu faktı şərh edərək demişdi: “Bir o qalmışdı ki, roman pis çıxa!”

Yazıçı öz romanı haqqında deyirdi: “Mən “Yüz ilin tənhalığı” romanını yazarkən ən nikbin xəyallarımda belə ağlıma gətirməzdim ki, bir vaxt həmin əsəri milyon nüsxə tirajla çap etdirəcəyəm”.

“Nyu-York Tayms” qəzeti bu romanı bütün bəşəriyyətin oxumalı olduğu əsərlər sırasında “Varlıq kitabı”ndan sonra ikinci kitab adlandırmışdır. “Mistik realizm” janrının əsasını qoymuş Markes 1982-ci ildə ədəbiyyat üzrə Nobel mükafatı almışdır.

Qabo əlliyə yaxın hekayə, povest və roman yazmış, bu əsərlər dünyanın bir çox dilinə tərcümə edilmişdir.