CƏMİYYƏT


Qadınların cəmiyyətdə roluna həsr olunmuş tədbir keçirilib

Bakı, 19 aprel, AZƏRTAC

Azərbaycan Tibb Universitetində “Qadınlar dövlətimizin, dövlətçiliyimizin, müstəqilliyimizin, bugünümüzün və gələcəyimizin dayağıdır” mövzusunda tədbir keçirilib. Bu tədbir YAP Qadınlar Şurası və Ailə, Qadın və Uşaq Problemləri üzrə Dövlət Komitəsinin tələbələrlə görüşü çərçivəsində baş tutub. Bu, silsilə görüşlərdən növbətisi olub.

ATU-nun mətbuat xidmətindən AZƏRTAC-a verilən məlumata görə, tədbirin əvvəlində universitetin tədris və müalicə işləri üzrə prorektoru, professor Sabir Əliyev Azərbaycanda həm ictimai həyatda, həm də ailədə qadına verilən yüksək qiymət haqqında danışıb: “Azərbaycan qadınları idarəetmə də daxil olmaqla, bütün sahələrdə aktiv fəaliyyət göstərirlər. Oftalmoloq alimlər arasında xüsusi yeri olan görkəmli elm xadimi Zərifə xanım Əliyeva bu sahə üzrə ilk qadın akademik olub və yüksək elmi uğurlarına görə SSRİ Tibb Elmləri Akademiyasının M.İ.Averbax adına mükafatına layiq görülüb. Yüksək mədəniyyətə malik olan görkəmli oftalmoloq-alim tibb sahəsində böyük xidmətlər göstərib”.

Professor ümummilli lider Heydər Əliyevin təşəbbüsü ilə Azərbaycanda Ailə, Qadın və Uşaq Problemləri üzrə Dövlət Komitəsi yaradıldığını da qeyd edib. O, ölkəmizdə bütün dövrlərdə savadlı və fədakar qadınlar çalışdığını söyləyib.

Milli Məclisin deputatı Məlahət İbrahimqızı öz çıxışında deyib: “Qadın üçün anadan uca ad yoxdur. Bugünkü gənclik qadınlara verilən dəyəri anlamalıdır. Digər tərəfdən tibb təhsili alan xanımların əsas vəzifəsi biliklərə mükəmməl yiyələnərək gələcəkdə peşəkar həkim və layiqli kadr olmaqdan, xalqımızı layiqincə təmsil və təbliğ etməkdən ibarətdir”.

Milli Məclisin deputatı Qənirə Paşayeva təhsil illəri haqqında xatirələrindən danışıb: “Mən Tibb Universitetin tələbəsi olmuşam. Biz təhsil alan illərdə universitet indiki vəziyyətdə deyildi. İndi hər şey dəyişib və hər sahədə, o cümlədən təhsildə çox böyük irəliləyiş var. Bu mənada siz tələbələrin bəxti gətirib”. O, daha sonra əlavə edib:” İndiki nəsil müstəqil Azərbaycan və onun bütövlüyü uğrunda var gücü ilə çalışmaldır. Yoxsa nə tarix, nə də gələcək nəsil sizi bağışlamayacaq. Ən yaxşı vətənpərvər ömrünü təhsilə həsr edən şəxsdir. Vətən üçün edə biləcəyiniz ən vacib əməl - yaxşı oxumaqdır”.

Ailə, Qadın və Uşaq Problemləri üzrə Dövlət Komitəsinin gender şöbəsinin baş məsləhətçisi Sevinc Əlizadə də gənclər üçün təhsilin əsas amil olduğunu söyləyib: “Qadın üçün təhsil daha vacibdir. O heç kimə arxalanmadan ayaq üstə dayanmağı bacarmalıdır. Sabah qadın həyatda tək qalanda da özünü və övladlarını qorumaq üçün bilik və bacarığın arxalanmalıdır”.

Aprel döyüşlərində şəhid olmuş polkovnik-leytenant Raquf Orucovun həyat yoldaşı Sevinc Əlizadə hər kəsə daha mübariz olmağı tövsiyə edib.

Əczaçılığın texnologiyası və idarəçiliyi kafedrasının baş müəllimi Aidə Bəndəliyeva mövzu haqqında fikirlərini bölüşüb.

Toplantıda Azərbaycan qadınının idarəetmə, siyasi və ictimai həyatındakı rolu və aktiv fəaliyyəti, bu sahələrdə mövcud olan problemlərdən də söhbət açılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.