Tərtər, 5 oktyabr, AZƏRTAC

Tərtər şəhərində Beynəlxalq Müəllimlər Günü münasibətilə keçirilən tədbirin iştirakçıları əvvəlcə ümummilli lider Heydər Əliyevin abidəsi önünə tər gül-çiçək dəstələri qoyaraq, xatirəsini ehtiramla yad ediblər.

AZƏRTAC xəbər verir ki, tədbirdə çıxış edənlər müəllimləri əlamətdar gün münasibətilə təbrik edib, təhsilə göstərilən diqqət və qayğıdan, əsası ulu öndər Heydər Əliyev tərəfindən qoyulan milli təhsil konsepsiyasından, Prezident İlham Əliyevin rəhbərliyi ilə aparılan dövlət təhsil siyasətindən, həmçinin rayon müəllimlərinin qazandığı uğurlardan danışıblar.

Çıxışlarda bildirilib ki, rayonun builki məzunlarından 181 nəfər ali, 60 nəfər orta-ixtisas məktəblərinə, 5 nəfər C.Naxçıvanski adına hərbi liseyə daxil olub. Altı nəfər 600-dən, 16 nəfər isə 500-dən yuxarı bal toplayıb.

Qeyd edilib ki, bayram ərəfəsində Soyulan kənd tam orta məktəbinin müəllimi Afaq Xəlilova “Əməkdar Müəllim” adına layiq görülüb.

Mərasimdə bir qrup qabaqcıl təhsil işçisinə fəxri fərmanlar təqdim olunub. Rayon Mədəniyyət və Turizm şöbəsinin hazırladığı maraqlı konsert proqramı tədbir iştirakçılarında xoş ovqat yaradıb.

X X X

Beynəlxalq Müəllimlər Günü Ağcabədi rayonunda da qeyd edilib. 

AZƏRTAC xəbər verir ki, rayon rəhbərliyinin, təhsil işçilərinin, ziyalıların iştirak etdikləri tədbirdə çıxış edənlər müəllimləri peşə bayramları münasibətilə təbrik edib, gənc nəslin təlim-tərbiyəsi işində onların əməyini və rolunu yüksək qiymətləndiriblər.

Diqqətə çatdırılıb ki, hazırda Ağcabədi rayonunun təhsil müəssisələrində gənc nəslin təlim-tərbiyəsi ilə 2600 nəfərə yaxın müəllim məşğul olur. Son illər rayon müəllimlərindən 7 nəfəri “Əməkdar Müəllim” fəxri adına layiq görülüb, 7 nəfər “Tərəqqi” medalı, 3 nəfər “Qabaqcıl təhsil işçisi” döş nişanı ilə təltif olunub. Fərəhli haldır ki, Azərbaycan Prezidentinin 2015-ci il 2 oktyabr tarixli Sərəncamı ilə Ağcabədi şəhər 11 nömrəli tam orta məktəbin müəllimi Həqiqət Mirzəliyeva “Əməkdar Müəllim” fəxri adına layiq görülüb.

Bayram süfrəsi arxasında rəngarəng konsert proqramı ilə davam edən tədbirin sonunda rayonun bir qrup qabaqcıl müəlliminə fəxri fərmanlar təqdim olunub.

X X X

Beynəlxalq Müəllimlər Günü münasibətilə Ağdam rayonunun bir qrup qabaqcıl təhsil işçisinə mükafatlar təqdim edilib.

AZƏRTAC xəbər verir ki, Ağdam Dövlət Dram Teatrında keçirilən tədbirdə çıxış edənlər təhsil işçilərini peşə bayramları münasibətilə təbrik edib, təhsilə dövlət qayğısından, dövlətimizin başçısı İlham Əliyevin və Heydər Əliyev Fondunun prezidenti Mehriban xanım Əliyevanın təhsilin inkişafı sahəsindəki xidmətlərindən, rayonda məktəblərin maddi-texniki bazasının möhkəmləndirilməsi istiqamətində görülən işlərdən, təhsil sistemində əldə olunan nailiyyətlərdən danışıblar.

Bildirilib ki, ötən tədris ili ərzində 160 yerlik Birinci Baharlı, 120 yerlik Həsənxanlı, 120 yerlik Hacıməmmədli, 360 yerlik Əfətli kənd tam orta məktəbləri üçün yeni binalar tikilib istifadəyə verilib. Əhmədağalı və Xındırıstan kənd tam orta məktəbləri əsaslı təmir edilib. Bundan başqa, İmamqulubəyli qəsəbəsində inşa edilən 440 yerlik məktəb binası 135 saylı köçkün tam orta məktəbin, Yevlax Bərdə avtomobil yolunun kənarında yeni salınmış yaşayış massivlərində tikilən 480 yerlik məktəb binası 1 saylı köçkün tam orta məktəbin, 640 yerlik məktəb binası isə 12 saylı köçkün tam orta məktəbin istifadəsinə verilib. Quzanlı qəsəbəsində məktəb liseyin binasının tikilməsinə başlanılıb.

Tədbirdə bir qrup qabaqcıl təhsil işçisinə mükafatlar təqdim edilib.

“Şur” ansamblının ifasında təqdim olunan konsert proqramı iştirakçılara əsil bayram əhval-ruhiyyəsi bəxş edib.