İQTİSADİYYAT
Qaradağ rayonunda bu ilin birinci yarısının sosial-iqtisadi inkişafının yekunları müzakirə edilib
Bakı, 28 iyul, AZƏRTAC
Qaradağ Rayon İcra Hakimiyyətinin bu ilin birinci yarısında rayonun sosial-iqtisadi inkişafının yekunlarına və Prezident İlham Əliyevin Nazirlər Kabinetinin iyulun 13-də keçirilən iclasındakı nitqindən irəli gələn vəzifələrə həsr olunan hesabat yığıncağı keçirilib.
Rayon icra hakimiyyətindən AZƏRTAC-a bildiriblər ki, yığıncaqdan əvvəl tədbir iştirakçıları ümummilli lider Heydər Əliyevin abidəsi önünə gül dəstələri qoyub, xatirəsini ehtiramla yad ediblər.
Hesabat yığıncağında çıxış edən Qaradağ Rayon İcra Hakimiyyətinin başçısı Süleyman Mikayılov ölkəmizin həyatının müxtəlif sahələrində əldə edilən nailiyyətlər barədə danışıb.
Sonra Qaradağ Rayon İcra Hakimiyyəti başçısının birinci müavini Emil Abbasov hesabat məruzəsi ilə çıxış edib. Bildirib ki, cari ilin altı ayının yekunlarına əsasən rayon üzrə 322,3 milyon manatlıq sənaye məhsulu istehsal edilib, neft və qaz sənayesi müəssisələrində 249,2 min ton xam neft və 202,4 milyon kubmetr təbii qaz hasil edilib. Rayon üzrə 948 min ton sement, 54,1 min ton mişar daşı istehsal edilib. Rabitə xidmətlərinin həcmi 1 milyon 189,3 min manat, pərakəndə əmtəə dövriyyəsi 1 milyard 435 milyon manat, əhaliyə göstərilən pullu xidmətlər isə 74,5 milyon manat olub.
Qeyd edilib ki, hesabat dövründə Ələt və Sahil qəsəbələrindən 8234 nəfər səyyar "ASAN xidmət"dən yararlanıb. Bundan başqa, Qaradağ Rayon Polis İdarəsinin qeydiyyat və şəxsiyyət vəsiqəsi şöbəsi tərəfindən əvvəlcədən tərtib olunmuş qrafik əsasında hər həftənin şənbə günü bir qəsəbədə səyyar xidmət göstərilib. Ələt, Qobustan, Müşfiqabad, Qızıldaş qəsəbələrində səyyar xidmət göstərilərkən müraciət etmiş 1834 nəfərə şəxsiyyət vəsiqəsi verilib.
Diqqətə çatdırılıb ki, əhalinin məşğulluğunu təmin etmək məqsədi ilə mütəmadi olaraq qəsəbələrdə səyyar əmək yarmarkaları keçirilir. Hesabat dövründə rayonun elektrik enerjisi və qaz təchizatı yaxşılaşdırılıb, su və kanalizasiya təsərrüfatı sahəsində bir sıra işlər görülüb. Qaradağın bütün qəsəbələrində iməciliklər təşkil edilib, məişət və istehsalat tullantılarının yığılması və daşınması sahəsində də bir çox işlər görülüb.
Qeyd edilib ki, birinci Avropa Oyunları ərəfəsində Qaradağ rayonunda abadlıq-quruculuq işləri daha geniş vüsət alıb. Bakı dairəvi yolunun rayon ərazisindən keçən hissəsinin 16,5 kilometri bu beynəlxalq idman yarışı iştirakçılarının hərəkət marşrutu üzərində olub. Bakı-Ələt (Astara) magistral avtomobil yolunda və xüsusilə Qobustan Milli-Tarix Bədii Qoruğuna gedən yolda abadlaşdırma, yaşıllaşdırma və əsaslı təmir işləri aparılıb. Altı ay ərzində 33 min 500 kvadratmetr ot örtüyü və yol boyu yaşıllıq sahələri salınıb və 30 minə yaxın müxtəlif növ ağac və mövsümi güllər əkilib.
Hesabat dövründə Puta qəsəbəsindəki 326 nömrəli körpələr evi-uşaq bağçası və Lökbatan qəsəbəsindəki 7 nömrəli Bakı peşə məktəbi üçün yeni binaların inşası başa çatıb və istifadəyə tam hazır vəziyyətdədir. Hazırda Qobustan qəsəbəsindəki körpələr evi-uşaq bağçasında və Sahil qəsəbəsindəki 9 nömrəli xüsusi internat məktəbində əsaslı təmir işləri, Heydər Əliyev Fondunun təşəbbüsü ilə rayonun Lökbatan, Ümid qəsəbələrində yeni körpələr evi-uşaq bağçalarının inşası davam edir, Ələt qəsəbəsində yeni körpələr evi-uşaq bağçasının tikintisi üçün layihə-smeta sənədləri hazırlanır.
Ötən altı ayda rayonda səhiyyənin inkişafı, əhalinin sağlamlığının qorunması, tibbi xidmətin səviyyəsinin yüksəldilməsi üçün də müəyyən işlər görülüb, mədəni-maarif müəssisələri tərəfindən müxtəlif tədbirlər həyata keçirilib.
Milli Məclisin deputatı Ağalar Vəliyev yığıncaqda çıxış edərək 2015-ci ilin birinci yarısında respublikamızın qazandığı uğurlardan bəhs edib.
Gündəlikdəki məsələyə dair Qaradağ Rayon İcra Hakimiyyətinin hesabat yığıncağının qərar layihəsi təklif edilib və yekdilliklə qəbul olunub. Hesabat yığıncağının iştirakçıları adından Prezident İlham Əliyevə müraciət qəbul edilib.
Tədbirin sonunda Azərbaycan Prezidentinin 2015-ci il 22 iyun tarixli Sərəncamı ilə dövlət qulluğunda səmərəli fəaliyyət göstərdiyinə görə “Dövlət qulluğunda fərqlənməyə görə” medalı ilə təltif olunmuş Qaradağ Rayon İcra Hakimiyyəti Başçısı Aparatının hüquq şöbəsinin məsləhətçisi Sumaxanım Mirzəyevaya medal təqdim olunub.