REGİONLAR
Qax Damazlıq İpəkçilik Stansiyasında hibrid və elit barama toxumları yetişdiriləcək
Qax, 1 dekabr, Mustafa Dadaşov, AZƏRTAC
Azərbaycan Respublikası Prezidentinin 2017-ci il 27 noyabr tarixli Sərəncamı ilə təsdiq edilmiş “Azərbaycan Respublikasında baramaçılığın və ipəkçiliyin inkişafına dair 2018-2025-ci illər üçün Dövlət Proqramı” respublikamızda baramaçılığın və ipəkçiliyin inkişaf etdirilməsi, bu sahəyə dövlət dəstəyinin gücləndirilməsi, ixrac potensialının artırılması və kənd əhalisinin məşğulluğunun təmin edilməsi istiqamətində son illər ölkə rəhbərliyi tərəfindən həyata keçirilən məqsədyönlü tədbirlərin tərkib hissəsi və davamıdır.
Dövlət Proqramında da qeyd olunduğu kimi, Prezidentin "Azərbaycan Respublikasında ipəkçiliyin maddi-texniki bazasının yaxşılaşdırılması ilə bağlı əlavə tədbirlər haqqında" 2017-ci il 19 may və "İpəkçiliyin inkişafına dövlət dəstəyinin davam etdirilməsi ilə bağlı tədbirlər haqqında" 2017-ci il 6 oktyabr tarixli sərəncamlarına uyğun olaraq, hazırda Qax Damazlıq İpəkçilik Stansiyasının yenidən qurulması istiqamətində işlər davam etdirilir. Stansiyanın bərpası, əlavə istehsal sahələrinin yaradılması və ən yüksək avadanlıqla təchiz edilməsi üçün Prezidentin ehtiyat fondundan 4,5 milyon manat vəsait də ayrılıb.
Damazlıq İpəkçilik Stansiyasının direktoru Əkrəm Fətəliyev AZƏRTAC-ın bölgə müxbirinə müsahibəsində stansiyada aparılan yenidənqurma işlərinin gedişi barədə məlumat verib. Direktor bildirib ki, layihəyə uyğun olaraq stansiyanın ərazisində inşa ediləcək binalardan ikisi hibrid və elit barama toxumlarının yetişdirilməsi üçün nəzərdə tutulub. Ərazidə, həmçinin ipəkqurdu ailələrinin yemlənməsi üçün bina, inzibati bina və yardımçı tikililər də inşa ediləcək. Stansiyada Çindən gətiriləcək ən müasir avadanlıq quraşdırılacaq.
Əkrəm Fətəliyev qeyd edib ki, baramaçılığın gələcək inkişafını təmin etmək, onun yem bazasını möhkəmləndirmək, rayonlarda yeni intensiv tipli tut (çəkil) bağlarının salınması məqsədilə Kənd Təsərrüfatı Nazirliyi tərəfindən noyabrın 30-da Çindən ölkəmizə gətirilmiş 1 milyon ədəd tut tinginin 60 mini bölgü əsasında artıq Qax rayonuna gətirilib. Bu tinglərin 10 mini bu günlərdə stansiyanın ərazisində əkiləcək. Direktor onu da bildirib ki, ötən il stansiyanın ərazisində əkilmiş 20 min tut tinginin bitişi də normaldır və gələn mövsümdən etibarən onlardan ipəkqurdunun yemlənməsi üçün istifadə etmək mümkün olacaq.
Stansiyanın tikintisi və yenidənqurma işləri “Azəraqrartikinti” ASC-nin kollektivi tərəfindən həyata keçirilir. İş icraçısı Xaləddin Bəşirov bildirib ki, ərazidə inşa edilən birinci binanın zirzəmisində beton işləri artıq yekunlaşıb. Hazırda binanın birinci mərtəbəsinin dəmir qəlibi yığılır. Eyni zamanda, ərazidə olan köhnə, yararsız binanın söküntüsü işləri başa çatdıqdan sonra onun yerində ikinci binanın da tikintisinə başlanılacaq.