REGİONLAR
Qax məktəblisi gənc meşəçilərin beynəlxalq müsabiqəsində xüsusi mükafata layiq görülüb
Qax, 15 sentyabr, Mustafa Dadaşov, AZƏRTAC
Qax şəhərindəki 3 nömrəli tam orta məktəbin şagirdi Ayla Əliyeva Rusiya Federasiyası Ekologiya və Təbii Sərvətlər Nazirliyinin Federal Meşə Təsərrüfatı Agentliyi tərəfindən Sankt-Peterburq şəhərində keçirilən XIII beynəlxalq gənc meşəçilər müsabiqəsində uğurla çıxış edərək Azərbaycana xüsusi mükafatla qayıdıb.
Bu barədə AZƏRTAC-a Qax Rayon Təhsil Şöbəsindən məlumat verilib.
Müsabiqədə dünyanın 27 ölkəsindən 49 məktəbli və tələbə iştirak edib. Azərbaycanı bu müsabiqədə gənc meşəçilərin V respublika müsabiqəsinin qalibləri - Qax məktəblisi Ayla Əliyeva və İsmayıllı rayonu İvanovka kənd tam orta məktəbin 10-cu sinif şagirdi Anna Orlova təmsil ediblər. Hər iki məktəblinin müsabiqədə iştirakı Təhsil Nazirliyinin Respublika Ekoloji Tərbiyə və Təcrübəçilik Mərkəzi tərəfindən təmin edilib.
Müsabiqədə Qax məktəblisi təhsil aldığı məktəbdə fəaliyyət göstərən “Meşənin dostları” uşaq ekoloji təşkilatı ilə rayon Meşə Mühafizəsi və Bərpası Müəssisəsinin birgə tədqiqat işlərinə həsr olunmuş “Meşə əmələ gətirən əsas ağac növlərinin vəziyyətinin qiymətləndirilməsi” mövzusunda ekoloji layihə təqdim edib. Layihənin əsas məqsədi Qax meşələrindəki ağac növlərindən olan “iberiya palıdı”nın cavan toxmacarlarının ekoloji vəziyyətinin qiymətləndirilməsi, bitki qruplaşmasında təbii və antropogen səbəbdən baş verən dəyişikliklərin təyin edilməsindən ibarət olub. Layihənin həyata keçirilməsi nəticəsində meşənin tükənən sahələrinin bərpa olunması təklifləri tərtib edilib, cavan ağacların mühafizəsi və meşənin bərpası üçün tədbirlər görülüb. Eyni zamanda, meşələrin qorunması ideyalarının təbliğ edilməsi məqsədilə əhali arasında ekoloji təbliğat aparılıb, mal-qaranın özbaşına otarılmasının meşə ekosisteminə mənfi təsiri izah edilib.
Azərbaycanın gənc meşəçilərinin təqdimatları münsiflər heyəti və iştirakçılar tərəfindən böyük maraqla qarşılanıb. Yekunda münsiflər heyətinin qərarı ilə Azərbaycanın gənc meşəçiləri beynəlxalq müsabiqənin diplomları və medallarla mükafatlandırılıblar. Ayla Əliyeva Müstəqil Dövlətlər Birliyi İcra Komitəsinin xüsusi mükafatına - büllur xatirə hədiyyəsinə layiq görülüb. Anna Orlovaya isə müsabiqənin həvəsləndirici mükafatı və Sankt-Peterburq Meşə Texniki Universitetinə qəbul olunmaq hüququ verən sertifikat təqdim olunub.