CƏMİYYƏT


“Qazaxıstan” teleradio şirkəti Azərbaycan telekanalları  ilə əməkdaşlıq etmək niyyətindədir

Astana, 5 iyun, АZƏRTAC

Azərbaycanın Qazaxıstandakı səfiri Rəşad Məmmədov “Qazaxıstan” Teleradio Şirkətinin yeni təyin olunan rəhbəri Yerlan Karinlə görüşüb. Diplomat Yerlan Karini məsul vəzifəyə təyin olunması münasibətilə təbrik edib, bu təyinatın qardaş ölkədə sözügedən sahənin inkişafına müsbət təsir edəcəyinə dair əminliyini bildirib.

Səfir vurğulayıb ki, Azərbaycanda Y.Karini əvvəllər işlədiyi vəzifələrdə həmişə dövlətlərimiz arasında münasibətlərin inkişafı və möhkəmləndirilməsinə töhfələr verən şəxs kimi tanıyırlar.

Rəşad Məmmədov cari ildə Qazaxıstanda “Ekspo-2017” sərgisinin və Azərbaycanda Formula-1 kimi böyükmiqyaslı yarışın keçirilməsinin nəzərdə tutulduğunu qeyd edib, “Qazaxıstan” telekanalının ölkəmizin telekanalları ilə əməkdaşlığının genişləndirilməsini təklif edib. Bu çərçivədə qarşı tərəfdən qeyd olunan tədbirlərin geniş işıqlandırılması, xalqlarımızın adət-ənənələri və mədəniyyəti barədə silsilə verilişlərin hazırlanmasının mümkünlüyünün nəzərdən keçirilməsi xahiş edilib.

Y.Karin xoş sözlərə görə səfir Rəşad Məmmədova təşəkkür edərək təmsil etdiyi qurumun Azərbaycan teleradio şirkətləri ilə faydalı münasibətlərin qurulmasında maraqlı olduğunu qeyd edib. O, iyunun ortalarında ölkəmizə gələrək telekanallarımızla əməkdaşlıq barədə Memorandum imzalamağa hazır olduğunu vurğulayıb. Yerlan Karin bildirib ki, bir müddət əvvəl rəhbərlik etdiyi qurum oxşar Memorandumu Qırğızıstan telekanalları ilə imzalayıb və bu da informasiya sahəsində daha sıx münasibətlərin yaradılmasına şərait yaradıb. O, bu yaxınlarda Azərbaycana səfər edəcəyini, iki qardaş xalqı birləşdirən dəyərlərdən, tariximizdən və mədəniyyətimizdən bəhs edən silsilə reportajların hazırlanacağını bildirib.

Səfir Rəşad Məmmədov bu ideyanı dəstəkləyərək sözügedən Memorandumun imzalanmasının iki ölkə KİV-ləri arasında əməkdaşlığın genişləndirilməsinə böyük töhfə verəcəyinə əminliyini ifadə edib.

Görüş zamanı Ermənistan tərəfindən Azərbaycanın 20 faiz ərazilərinin işğal edilməsi, xarici ölkə KİV-lərdə qondarma “Dağlıq Qarabağ” separatçı rejiminin təbliğ edilməsi cəhdləri, rəsmi Bakının qadağalarına zidd olaraq əcnəbi jurnalistlər üçün işğal olunmuş torpaqlarımıza səfərlərin təşkil edilməsi məsələləri barədə ətraflı məlumat verilib.

Y.Karin KİV-lərdə təcavüzkar separatizmin təbliğ edilməsinin yolverilməz olduğunu birmənalı olaraq bildirib, rəhbərlik etdiyi telekanalda bu məsələyə xüsusi diqqətlə yanaşıldığını vurğulayıb.

Görüşdə qarşılıqlı maraq doğuran digər məsələlər müzakirə edilib.

İlahə Əhmədova

AZƏRTAC-ın xüsusi müxbiri

Astana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.