DÜNYA
Qazaxıstanın Milli Biznes Reytinqi liderləri müəyyən edib
Astana, 5 mart, AZƏRTAC
Astana şəhərində biznes dairələrində ilin ən gözlənilən hadisələrindən biri – Milli Biznes Reytinqi İttifaqının himayəsi altında XXIII Beynəlxalq İqtisadi Forumun qonaqlarını və iştirakçılarını təntənə ilə qarşılayıblar.
Tədbir çərçivəsində Milli Biznes Reytinqi İttifaqı tərəfindən Azərbaycan, Qazaxıstan, Rusiya, Ukrayna və Belarusun ən yaxşı şirkətlərinə fəxri mükafatlar verilib.
İqtisadi forumun əsas müzakirə mövzusu korporativ maliyyənin idarə olunmasının aktual məsələləri olub. Biznesmenlər şirkətlərin qarşılıqlı əlaqələrinin əsas aspektlərini, rəqabətqabiliyyətliliyin inkişaf şərtlərini və iqtisadiyyatın aparıcı sahələrinin perspektivlərini müzakirə ediblər.
Forumda həmçinin biznes layihələrinin səmərəliliyinin dəyərləndirmə meyarları və Qazaxıstan bazarında iqtisadi fəaliyyətin planlaşdırılması aspektləri də nəzərdən keçirilib. Nəzəri və praktik məsələlərin məhsuldar və canlı müzakirəsindən sonra ilin ən yaxşı müəssisələri mükafatlandırılıb.
Lider şirkətlərin rəhbərlərinə fəxri mükafatlar və sertifikatlar verilib. Ən yaxşılar Milli Biznes Reytinqləri İttifaqı tərəfindən aparılmış müəssisələrin maliyyə-iqtisadi göstəricilərinin hərtərəfli təhlil əsasında müəyyən edilib.
“Sahə lideri” adına ölkənin “CASPIAN SERVICE KAZAKHSTAN” şirkəti, eyniadlı medala isə onun baş direktoru Sücəddin Musa oğlu Xudadatov layiq görülüb. İnşaat şirkətinin təsisçisi Qazaxıstan, Azərbaycan, Gürcüstan, Rusiya və Əfqanıstanda fəaliyyət göstərən “Caspian Service” ASC-dir.
Milli Biznes Reytinqləri İttifaqı Qazaxıstan, Azərbaycan, Ukrayna, Belarus və Rusiyanın milli biznes reytinqləri təşkilat komitələrinin analitik-informasiya struktur birliyidir.
İqtisadiyyatın bütün sahələrində həqiqi liderləri üzə çıxaran Milli Biznes Reytinqləri İttifaqı statistik məlumatların hazırlanmasında elmi metodologiya tətbiq edir və yüksək beynəlxalq standartları nəzərə alır. Ən yaxşı müəssisələr mükafatın təntənəli təqdim edilməsi mərasiminə dəvət olunur. Şirkətin reytinqdə yüksək yer tutması ona liderlər cəmiyyətinə qoşulmaq, bazarda tələbatı yüksəltmək, habelə etibarlı tərəfdaş adını əldə etmək hüququ verir.
İlahə Əhmədova
AZƏRTAC-ın xüsusi müxbiri
Astana