Bakı, 28 avqust, AZƏRTAC

Futbol üzrə UEFA Avropa Liqası yarışlarının pley-off mərhələsinin cavab oyununda Azərbaycan çempionatının bürünc mükafatçısı “Qəbələ” komandası səfərdə Yunanıstanın “Panatinaikos” klubunu mübarizədən kənarlaşdıraraq turnirin qrup mərhələsinə vəsiqə qazanıb.

AZƏRTAC xəbər verir ki, Afinanın 16 min azarkeş tutumuna malik “Apostolos Nikolaidis” stadionunda keçirilən oyunda “Qəbələ”nin start heyətində Dmitri Bezotosnı, Vojislav Stankoviç, Rikardinyo, Arif Daşdəmirov, Vitali Vernydub, Rəşad Sadiqov, Aleksey Qay, Sergey Zenyov, Dodo, Ermin Zets və Aleksey Antonov meydana çıxıblar.

“Panatinaikos”un ilk on birliyində isə Luk Stil, Giorgos Kutrumbis, Statis Tavlaridis, Nano, Sergio Sanchez, Kristos Bourbos, Zeka, Sotiris Ninis, Daniyel Pranyiç, Niko Karelis və Markus Berq isə yer alıblar.

Qarşılıqlı hücumlar şəraitində keçən oyunun ilk hissəsinin 3-cü dəqiqəsində yunanların heyətində Sotiris Ninisin zərbəsi “Qəbələ”nin qapı dirəyindən qayıdıb. Oyunun 6-cı dəqiqəsində “Qəbələ” hesabda irəli çıxıb. Rikardinyonun künc zərbəsindən ötürməsini başla dəqiq yerinə yetirən Dodo oyunda hesabı açıb – 1:0. Matçın 8-ci və 20-ci dəqiqələrində komandamızın qapıçısı Dmitri Bezotosnı rəqibin təhlükəli zərbələrini dəf edib. Lakin qarşılaşmanın 34-cü dəqiqəsində “Panatinaikos”un sol cinahdan başladığı hücumda Niko Karelisin ötürməsini Markus Berq qola çevirərək hesabı bərabərləşdirib – 1:1. Oyunun 40-cı dəqiqəsində “Panatinaikos”un qolunun müəllifi Markus Berq Aleksey Qaya qarşı kobudluğa görə sarı vərəqə ilə cəzalandırılıb. Bir dəqiqə sonra Ermin Zets “Qəbələni” hesabda irəli çıxarmaq imkanını əldən verib.

İlk hissə 1:1 hesabı ilə başa çatıb.

İkinci hissədə daha sürətli oyun nümayiş etdirən komandalar ilk dəqiqələrdə qapılar qarşısında təhlükəli vəziyyətlər yaradıblar. Oyunun 60-cı dəqiqəsində Aleksey Qayın sağ cinahdan ötürməsindən sonra Dodo özünün və komandasının ikinci qolunu vuraraq “Qəbələ”ni hesabda irəli çıxarıb – 2:1. Matçın 77-ci dəqiqəsində isə Aleksey Antonovun ötürməsindən sonra Ermin Zetsin zərbəsi qapının üstündən keçib.

Hesabı bərabərləşdirmək üçün irəli atılan “Panatinaikos” futbolçuları 78-ci dəqiqədə istəklərinə nail olublar. Nano 78-ci dəqiqədə cərimə zərbəsindən sonra hesabı bərabərləşdirib - 2:2. Matçın 91-ci dəqiqəsində Dodonun sağ cinahdan hücumunun qarşısını kobudluqla alan “Panatinaikos”un futbolçusu Statis Tavlaridis sarı vərəqə ilə cəzalandırılıb. Hakimin final fitinədək oyunda hesab dəyişməyib və “Qəbələ” səfərdə məhsuldar heç-heçəyə nail olub. Komandalar arasında Bakıda keçirilən ilk qarşılaşmada qapılara qol vurulmadığından iki oyunun nəticəsinə görə üstün olan “Qəbələ” kollektivi UEFA Avropa Liqası yarışlarının qrup mərhələsinə vəsiqə qazanıb.

Matçın əsas hakimi slovakiyalı İvan Krujlyak olub. Köməkçi hakim funksiyasını onun həmyerliləri Tomas Somolani, Tomas Mokoş və Peter Kralovic yerinə yetiriblər.

Turnirə birinci təsnifat mərhələsindən qoşulan Roman Qriqorçukun yetirmələri Gürcüstanın “Dinamo”, Serbiyanın “Çukariçki” və Kiprin “Apollon” klublarını mübarizədən kənarlaşdırıb və ilk dəfə olaraq UEFA Avropa Liqası yarışlarının pley-off mərhələsinə yüksəlmişdi.