Qəbələ, 1 mart, Şahnəzər Bəşirov, AZƏRTAC

Ötən il Qəbələ rayonunda iqtisadiyyatın ayrı-ayrı sahələri üzrə 203.736 min manatlıq məhsul istehsal edilib, əvvəlki ilin müvafiq dövrünə nisbətən ümumi məhsul buraxılışı 219 min manat, yaxud 0,1 faiz artıb. Həmçinin il ərzində əsas kapitala yönəlmiş investisiyanın həcmi 80.016,4 min manat, tikinti-quraşdırma işlərinin həcmi isə 78.607,6 min manat təşkil edib. 2003-cü ilin oktyabr ayından bu il yanvarın 1-dək Qəbələ rayonunda 13 min 266-sı daimi olmaqla, 15 min 65 yeni iş yeri açılıb. 2016-cı ildə açılmış yeni iş yerlərinin sayı isə 1393 olub.

AZƏRTAC xəbər verir ki, bu faktlar ötən il Qəbələ rayonunun sosial-iqtisadi inkişafı istiqamətində görülən işlərə dair hesabat yığıncağında səsləndirilib.

Tədbirdə çıxış edən Qəbələ Rayon İcra Hakimiyyətinin başçısı Səbuhi Abdullayev bildirib ki, hesabat dövründə rayonda tikinti-quraşdırma və abadlıq işləri uğurla həyata keçirilib. Belə ki, xizəkçilik mərkəzi və “Tufandağ” otelinin, Qəbələ Park-Bulvar Kompleksinin, Dəmiraparan çayı üzərində 10 aşırımlı dəmir-beton körpünün, Qəmərvan çayı üzərində 1 aşırımlı dəmir-beton körpünün, Nohurqışlaq-Tüntül-Yengicə avtomobil yolunun, regional “ASAN xidmət” Mərkəzinin inzibati binasının, 100 yerlik uşaq bağçasının, Nohur gölü ərazisində “Shenot Palace Health Wellnes Hotel” sanatoriya kompleksinin, “Tufandağ” kanat yolunun “Yatmış gözəl” məntəqəsində restoran binasının tikintisi başa çatdırılıb.

Bununla yanaşı, Qəbələ rayon məhkəməsinin inzibati binası və rayon kənd təsərrüfatı idarəsinin inzibati-laboratoriya binasının inşası da başa çatdırılıb, Soltannuxa kənd uşaq bağçası isə əsaslı təmir edilib. Hazırda “Qafqaz Aqua Land” Hotel, “Qafqaz Diamond Aquapark”, Qolf kompleksi, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsi, Qəbələ rayon prokurorluğu, Gömrük Akademiyası, Qəbələ peşə məktəbi üçün inzibati binaların inşası, Atçılıq Mərkəzinin tikintisi və Qəbələ şəhərinin içməli su və kanalizasiya sisteminin yenidən qurulması işləri aparılır. Qəbələ şəhərində yeni xalça toxuculuğu müəssisəsinin tikintisi və Muxtar Abduyev küçəsindəki 5 ədəd beşmərtəbəli yaşayış binasının dam örtüyünün dəyişdirilməsi işlərinə başlanılıb.

Toplantıda çıxış edən Qəbələ regional “ASAN xidmət” Mərkəzinin direktoru Əbdül Əliyev, Qəbələ şəhər 2 saylı tam orta məktəbin direktoru, Bilik Fondunun rayon üzrə təmsilçisi Təranə Səlimova, sahibkar Oqtay Əzizov, ailə-fermer təsərrüfatının rəhbəri Aydın Mirzəliyev, fəal gənc Aynur Qədirova çıxış edərək, fəaliyyət göstərdikləri sahələrdə əldə olunan uğurlardan söz açıblar.

Daha sonra hesabat yığıncağında Respublika Ağsaqqallar Şurasının sədri, Milli Məclisin deputatı Fəttah Heydərov çıxış edərək, ulu öndər Heydər Əliyevin regionların inkişafına daim böyük önəm verdiyini və bu siyasətin Prezident İlham Əliyev tərəfindən uğurla həyata keçirildiyini bildirib.

Yığıncaqda çıxış edən Prezident Administrasiyasının məsul işçisi Rüfət Əliyev 2016-cı ildə görülən işlər və qazanılan nailiyyətlər barədə ətraflı məlumat verib.

Hesabat yığıncağında Prezident İlham Əliyevin tövsiyə və tapşırıqlarına uyğun olaraq qarşıda duran vəzifələr təhlil olunub, müvafiq qərar qəbul edilib.

Sonda yığıncaq iştirakçıları adından Prezident İlham Əliyevə müraciət ünvanlanıb.

Yığıncaqda rayonun sosial-iqtisadi inkişafında fərqlənən bir qrup şəxsə fəxri fərman və qiymətli hədiyyələr, Yeni Azərbaycan Partiyası sıralarına qəbul olunan gənclərə isə üzvlük vəsiqələri təqdim olunub.