İQTİSADİYYAT
Qəbələdə əlilliyi olan gənclərə biznes imkanlarını genişləndirmək üçün lazımi dəstək verilir
Qəbələ, 24 iyul (AZƏRTAC, Şahnəzər Bəşirov). İyulun 24-də “Sosial İqtisadi İnkişafa Dəstək” İctimai Birliyinin reallaşdırdığı “Əlilliyi olan şəxslərin həyatında müsbət dəyişikliklər” layihəsi çərçivəsində Qəbələ şəhərində tədbir keçirildi.
AZƏRTAC xəbər verir ki, “World Vision International” hümanitar təşkilatının Azərbaycandakı nümayəndəliyinin dəstəyi ilə keçirilən tədbirdə çıxış edən “Sosial İqtisadi İnkişafa Dəstək” İctimai Birliyinin sədri Qalib Nəbiyev layihə haqqında geniş məlumat verdi. Qeyd etdi ki, layihənin əsas məqsədi regionlarda əlilliyi olan gənclərin fərdi sahibkarlıq və biznes bacarıqlarını inkişaf etdirmək, peşəkar təlimlər vasitəsilə onların biznes planlarını hazırlamaq və həyata keçirilməsinə kömək göstərməkdir. Təlimlərin nəticəsi olaraq əlilliyi olan gənclər tərəfindən hazırlanan biznes planlar qiymətləndirilərək onlara dəstək göstərilib.
Daha sonra “World Vision International” humanitar təşkilatının layihə rəhbəri Vüqar Əhmədov, bu qurumun Azərbaycandakı nümayəndəliyinin direktoru Giorgi Devidze, Qəbələ Rayon Gənclər və İdman İdarəsinin rəisi Fəxri Soltanov, layihədən bəhrələnən əlil gənclər Elşən Rizvanov və Namiq Hüseynov layihənin təşkilatçılarına öz təşəkkürlərini bildirdilər və bu dəstəyin əlilliyi olan şəxslərin məşğulluq imkanlarının genişləndirilməsi baxımından əhəmiyyətini qeyd etdilər.
Məlumat verildi ki, əvvəlcə layihə çərçivəsində təşkil olunan təlimlərdə iştirak edən əlil gənclərin biznes təklifləri qəbul olunub. “World Vision International” humanitar təşkilatının Azərbaycandakı nümayəndəliyində yaradılan seçim komissiyası Qəbələ rayonundan təqdim olunan 21 biznes təklifindən 10-nu dəstəkləyib. Dəstəklənən biznes təkliflərinin 6-sı Qəbələ şəhərindən, digərləri isə Bum, Vəndam, Həmzəli və Dızaxlı kəndindən olan əlil gənclərə məxsusdur. Təkliflər əsasən mühasibatlıq, hüquqşünaslıq, kompyuter proqramlarının tədrisi, mebel sexinin təkmilləşdirilməsi, avtomobil təmiri sexinin genişləndirilməsi, plastik qapı-pəncərə sexinin genişləndirilməsi, səyyar qaynaq xidmətinin göstərilməsi ilə bağlı olub.
Tədbirdə layihə çərçivəsində Qəbələ rayonundan seçilən 10 nəfər əlil gəncin öz ideyalarını gerçəkləşdirmək üçün irəli sürdüyü təkliflərin bəyənildiyi bildirildi və onlara biznes imkanlarını genişləndirmək üçün müxtəlif zəruri avadanlıqlar təqdim olundu.