REGİONLAR


Qərb bölgəsinin ümumtəhsil məktəblərində Bilik günü qeyd olunub

A+ A

Tovuz, 15 sentyabr, AZƏRTAC 

Sentyabrın 15-də Tovuz rayonunun 84 ümumtəhsil məktəbində Bilik günü təntənə ilə qeyd olunub.

AZƏRTAC xəbər verir ki, yeni dərs ilinin başlanması münasibətilə Tovuz şəhəri N.Tusi adına təbiət və texniki təmayüllü məktəb-liseydə keçirilən mərasimdə məktəbin direktoru Valeh Məmmədov, rayon icra hakimiyyəti başçısının birinci müavini Mahir Həsənov çıxış edərək pedaqoji kollektivi və şagirdləri yeni dərs ilinin başlanması və Bilik günü münasibətilə təbrik ediblər.

Qeyd olunub ki, ötən dərs ilinin yekunlarına görə məktəb-liseyi bitirən məzunlardan 51 nəfər ali məktəblərə, 7 nəfər isə orta ixtisas məktəblərinə qəbul olunub. Onlardan 9-u qəbul imtahanlarında 500-dən, 4-ü isə 600-dən çox bal toplayıb. Hazırda məktəb-liseydə 1250 şagird təhsil alır və onların təlim-tərbiyəsi ilə 146 müəllim məşğul olur. Yeni dərs ilində məktəb-liseyin birinci siniflərində 202 şagird təhsil alacaq.

Daha sonra gənc nəslin elmi biliklərə dərindən yiyələnməsi, onların hərtərəfli inkişafı üçün təhsil ocağında yaradılan şəraitdən bəhs olunub. Çıxış edənlər yeni dərs ilində müəllim və şagirdlərə uğurlar arzulayıblar. 

X X X

Bilik günündə Qazax rayonunda 2 yeni məktəb binası istifadəyə verilib. Müasir üslubda və yüksək səviyyədə inşa olunan məktəb binaları 2016-2017-ci tədris ilinin ilk günündə Qazax təhsilinə ən böyük töhfədir.

AZƏRTAC xəbər verir ki, rayon icra hakimiyyətinin başçısı Rəcəb Babaşov 220 şagird yerlik Aşağı Əskipara kənd tam orta məktəbin açılışında çıxış edərək Prezident İlham Əliyevin təhsilə böyük qayğı və diqqət göstərməsindən söz açıb. Qeyd edib ki, bu məktəbdə Aşağı Əskipara kəndi ilə yanaşı, Bağanıs Ayrım, Xeyrımlı, Yuxarı Əskipara, Barxudarlı və Sofulu kənd orta məktəblərinin şagirdləri də təhsil alacaqlar. Bildirilib ki, məktəbdə müəllim və şagirdlər üçün hər cür şərait yaradılıb.

Sonra məktəbə baxış keçirilib. 11 sinif otağından, kimya, fizika laboratoriyalarından, hərbi kabinetdən, informatika otağından, akt və idman zallarından, kitabxana və tibb otağından ibarət olan yeni məktəb binası pedaqoji kollektiv tərəfindən yüksək qiymətləndirilib.

Həmin gün rayonun Yuxarı Salahlı kənd tam orta məktəb binasının da açılışı olub. Məktəb əsaslı təmirdən sonra istifadəyə verilib.

X X X

Yeni dərs ilinin başlanması münasibətilə Ağstafa rayonunun ümumtəhsil məktəblərində də bir sıra tədbirlər keçirilib. Rayon rəhbərliyinin və hüquq mühafizə orqanları əməkdaşlarının da iştirak etdikləri tədbirlərdə Bilik günü münasibətilə müəllim və şagird kollektivləri təbrik edilib, ölkəmizdə təhsilin inkişafına göstərilən dövlət qayğısından danışılıb. Qeyd edilib ki, regionların sosial-iqtisadi inkişafı Dövlət proqramlarına uyğun olaraq Ağstafa rayonunda son illər 14 yeni məktəb binası inşa edilib, bir sıra məktəblərdə əsaslı təmir işləri aparılıb. Prezident İlham Əliyevin və ölkənin birinci xanımı Mehriban Əliyevanın göstərdikləri dəstək və qayğı respublikada təhsili yeni inkişaf mərhələsinə qaldırıb. Respublikanın bütün bölgələrində olduğu kimi, Ağstafa rayonunda da təhsil sahəsində qazanılan uğurlar ildən-ilə artır. Təhsil sahəsində həyata keçirilən islahatlar və göstərilən qayğı cari tədris ilinin daha yüksək nəticələrlə başa vurulacağına əminlik yaradır.

Yeni dərs ilinin başlanması münasibətilə keçirilən tədbirlər məktəb kollektivlərinin Bilik gününə həsr etdikləri bədii-musiqili proqramlarla davam etdirilib.

 X X X 

Bilik günü Şəmkirdə iki məktəb binasının əsaslı təmirdən sonra açılışı ilə yadda qalıb.

Şəmkir şəhərində yerləşən Nəriman Nərimanov adına şəhər tam orta məktəbi Təhsil Nazirliyi tərəfindən aparılan əsaslı təmirdən sonra pedaqoji kollektivin istifadəsinə verilib.

AZƏRTAC xəbər verir ki, tədbirdə rayon icra hakimiyyətinin başçısı Alimpaşa Məmmədov çıxış edərək ölkəmizdə gənc nəslin təlim-tərbiyəsinə göstərilən diqqət və qayğıdan danışıb, müstəqilliyimizin bərpasından sonra respublikamızda ən çox diqqətin məhz təhsil müəssisələrinin inkişafına yönəldiyini vurğulayıb. O, son günlərdə Prezident İlham Əliyevin yeni məktəb binalarının açılışında şəxsən iştirakının bir daha dövlətimizin və onun rəhbərinin təhsilə göstərdiyi diqqət və qayğının təzahürü olduğunu qeyd edib.

Çıxış edənlər təhsilə göstərilən diqqət və qayğıya görə dövlətimizin başçısı İlham Əliyevə və xanımı Mehriban Əliyevaya minnətdarlıqlarını bildiriblər.

Sonda tədbir iştirakçıları məktəbdə yaradılan şəraitlə tanış olublar.

Elə həmin gün Şəmkir rayon Düyərli kənd 1 saylı tam orta məktəbin binası da əsaslı təmirdən sonra istifadəyə verilib. Məktəbdə Bilik günü münasibətilə təşkil edilən tədbirdə iştirak edən rayon icra hakimiyyətinin başçısı Alimpaşa Məmmədov görülən işləri yüksək qiymətləndirib. O, Prezident İlham Əliyevin rəhbərliyi ilə uğurla həyata keçirilən təhsil siyasətində məhz məktəb binalarının yenidən qurulmasının və əsaslı təmirinin prioritet istiqamətlərdən biri olduğunu vurğulayıb.

Çıxış edənlər ümummilli lider Heydər Əliyevin müəllim peşəsinə və əməyinə həmişə yüksək qiymət verdiyini vurğulayıb, onun Azərbaycana rəhbərliyi illərində ölkəmizdə yüzlərlə yeni məktəb binalarının, uşaq bağçalarının tikilib istifadəyə verildiyini diqqətə çatdırıblar. Bildirilib ki, bu siyasət bu gün Prezident İlham Əliyev tərəfindən də uğurla davam etdirilir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.