İQTİSADİYYAT
Qırğızıstan Azərbaycanda Ticarət Evi açmağı planlaşdırır
Bakı, 28 iyun, AZƏRTAC
Qırğızıstan Azərbaycanda Ticarət Evi açmağı planlaşdırır.
Bunu Qırğızıstan Respublikasının Azərbaycan Respublikasındakı Fövqəladə və Səlahiyyətli səfiri Aycigit Buranov “Caspian Energy İnternational Media Group”un nümayəndə heyəti ilə görüşdə deyib.
“Caspian European Club”dan AZƏRTAC-a bildirilib ki, səfir “Caspian European Club”la (Caspian Business Club) Qırğızıstan səfirliyi, o cümlədən Qırğızıstan şirkətləri arasındakı əməkdaşlığın gələcəkdə davam etdirilməsində maraqlı olduğunu ifadə edib.
Formula-1 üzrə Avropa Qran-prisinin uğurla başa çatması bizi çox sevindirdi. Bu, ölkənizin dünyada kifayət qədər tanındığının növbəti göstəricisidir. Postsovet məkanında bu cür yarışları təşkil edən çox az dövlət var. Bundan əlavə, həmin yarış paytaxtın müasir gerçəkliyi ilə keçmişi arasındakı ahəngi dünyaya nümayiş etdirmək üçün əla fürsət idi. Bu harmoniyanı 500 milyon tamaşaçı böyük maraqla seyr etdi. Yarışlar zamanı Azərbaycana böyük turist axını müşahidə olundu. Qardaş xalqın bu uğuru bizi çox sevindirir”, - deyə A.Buranov söyləyib.
Onun sözlərinə görə, Qırğızıstan Azərbaycanda Ticarət Evi açmağı planlaşdırır. “Qırğızıstan və Azərbaycanın böyük potensialı olsa da, ticarət əlaqələri hələ lazımi səviyyədə deyil. Biz Azərbaycan və Qırğızıstan biznesinə ticari və iqtisadi əlaqələri inkişaf etdirmək maraqlı olsun deyə danışıqlar aparırıq”, - deyə o vurğulayıb.
Azərbaycanla turizm və mədəniyyət sahələrində gözəl əməkdaşlıq qurulub. “Türkdilli dövlətlərin mədəni irsi fondu yaradılıb, parlamentlərarası əməkdaşlıq nizama salınıb, Azərbaycan, Qazaxıstan, Türkiyə və Qırğızıstanın dövlət başçılarının təşəbbüsü ilə həmin ölkələrin daxil olduğu Türkdilli Dövlətlərin Əməkdaşlıq Şurası yaradılıb və uğurla fəaliyyət göstərir”, - deyə o qeyd edib.
Səfir etibarlı və isti münasibətlərə, Qırğızıstanla əməkdaşlığa görə Azərbaycanın siyasi rəhbərliyinə, ilk növbədə Prezident İlham Əliyevə minnətdarlığını ifadə edib.
“Biz də öz tərəfimizdən əməkdaşlığa hər zaman hazırıq”, - deyə A.Buranov vurğulayıb.