SİYASƏT
Qırğızıstanın “Kabar” Agentliyi Leyla Əliyevanın “Trend”ə müsahibəsini yayıb
Bişkek, 6 iyul, AZƏRTAC
Qırğızıstanın “Kabar” Milli İnformasiya Agentliyi Heydər Əliyev Fondunun vitse-prezidenti Leyla Əliyevanın “Trend”ə müsahibəsini yayıb.
Müsahibədə Leyla Əliyevanın BMT-nin Ərzaq və Kənd Təsərrüfatı Təşkilatının (FAO) xoşməramlı səfiri kimi ərzaq təhlükəsizliyi, ekoloji tarazlığın təmin olunması, insanların sağlamlığının qorunması sahəsindəki fəaliyyəti şərh edilir.
Leyla Əliyeva Ətraf Mühitin Mühafizəsi naminə Beynəlxalq Dialoqun (IDEA) təsisçisi kimi görülən işlərdən söhbət açır: “IDEA ekoloji problemlərin həlli ilə bağlı çoxdandır ki, Azərbaycanın hüdudlarından kənara çıxıb. Biz BMT-nin Ətraf Mühit Proqramının (UNEP), Beynəlxalq Təbiətin və Təbii Sərvətlərin Mühafizəsi Birliyinin (IUCN), Dünya Vəhşi Təbiətin Mühafizəsi Fondunun (WWF) tərəfdaşlarıyıq. Regional səviyyədə isə 2013-cü ilin oktyabr ayında həyata keçirilən Gürcüstanda 10 ceyranın birinci reintroduksiyası layihəsini qeyd etmək istərdim. Ötən ilin may ayında Bakıda IDEA-nın təşəbbüsü və Heydər Əliyev Fondunun təşkilati dəstəyi ilə Qafqaz Biomüxtəlifliyi Sammiti keçirildi. Sammitdə beynəlxalq ekspertlər tərəfindən bəbirlərin mühafizəsi sahəsində bilik və təcrübə mübadiləsi aparıldı”.
Diqqətə çatdırılır ki, IDEA Qafqaz faunasının nadir heyvan növləri olan qonur ayı, imperator qartalı, boz canavar, ceyran və Qafqaz bəbirinin mühafizəsini nəzərdə tutan “Qafqazın böyük beşliyi” layihəsini həyata keçirir və bu istiqamətdə görülən işlər şərh edilir.
Müsahibədə Heydər Əliyev Fondunun fəaliyyəti haqqında da ətraflı məlumat verilir. Leyla Əliyeva deyir: “Heydər Əliyev Fondunun fəaliyyət spektri həqiqətən geniş və müxtəlifdir. Biz ən müxtəlif istiqamətlərdə - xeyriyyəçilik, təhsil, ekologiya, həmçinin mədəniyyət, incəsənət, səhiyyə, idman və İKT sahələrinin inkişafına yönəlmiş bir çox layihələri uğurla həyata keçiririk”.
Heydər Əliyev Fondunun vitse-prezidenti müsahibəsində mədəniyyətlərarası dialoqun genişlənməsində humanitar layihələrin həyata keçirilməsi, “Xocalıya ədalət” kampaniyası, Rusiyanın Azərbaycanlı Gənclər Birliyinin fəaliyyəti, Bakıda keçirilən birinci Avropa Oyunları, “Baku” jurnalının baş redaktoru kimi fəaliyyəti və digər məsələlər haqqında da söhbət açır.
Qulu Kəngərli
AZƏRTAC-ın xüsusi müxbiri
Bişkek