Bakı, 29 oktyabr, AZƏRTAC

Sevastopol şəhər radiosunun “Qobustan” proqramının aparıcısı, tanınmış jurnalist Həbib Əliyev bu günlərdə agentliyimizin qonağı olub. O, AZƏRTAC-a müsahibəsində 20 ildir efirdə Azərbaycan mədəniyyətini, incəsənətini, tarixini, ölkəmizin müasir inkişafını, eləcə də xalqımızın haqq işini yorulmadan təbliğ edən “Qobustan”ın keçdiyi yola yenidən nəzər salıb və gələcək planlarından söz açıb.

-Həbib müəllim, necə oldu ki, Sevastopol şəhərindəki yerli radioda “Qobustan” proqramı açmalı

oldunuz?

-Mən 1996-cı ildə Bakının Xətai rayonunda müəllim işləyirdim. Ermənistanın Azərbaycana qarşı işğalçılıq planının reallaşdırılmasına başladığı 1988-ci ildən etibarən xalqımızın başına gətirilən müsibətlər, ərazilərimizin bir-birinin ardınca işğalı məni çox narahat edirdi. Hələ bu azmış kimi cilddən-cildə girməkdə mahir olan ermənilər bizi borclu çıxarır, xarici ölkə mətbuatında ünvanımıza böhtanlar yağdırır, Azərbaycan xalqını vəhşi, qaniçən qəbilə kimi təqdim edirdilər. Ən çox təəssüf doğuran o idi ki, torpağı işğal edilən, hər şeyi ermənilər tərəfindən talan edilən, oğurlanan biz olduğumuz halda, xarici ölkə mətbuatı ermənilərin uydurmalarına inanıb azərbaycanlıları vəhşi adlandırırdı. Həmin dövrdə ulu öndər Heydər Əliyev xarici ölkələrdəki Azərbaycan diasporunun qarşısında ermənilərin bu fitnə-fəsadlarına qarşı yumruq kimi birləşməyi, Azərbaycan həqiqətlərini, xüsusilə ermənilərin zaman-zaman azərbaycanlılara qarşı törətdikləri soyqırımı və işğalçılıq siyasətini dünya ictimaiyyətinə olduğu kimi çatdırmağı əsas vəzifə kimi qoymuşdu.

Açığını deyim ki, Ümummilli Liderin bu çağırışına qədər xaricdəki Azərbaycan diasporunun nümayəndələri pərakəndə fəaliyyət göstərir, yaşadıqları ölkələrdə Azərbaycan mədəniyyətinin təbliği ilə məşğul olmurdular. Nəticədə tarixi düşmənlərimiz bu boşluqdan istifadə edərək hər yerdə azərbaycanlıları vəhşi, mədəniyyətsiz xalq kimi təqdim edirdilər. Belə bir vaxtda Ulu Öndərin çağırışına cavab olaraq mən də qarşıma belə bir məqsəd qoydum ki, bu prosesdə yaxından iştirak etməliyəm. İş elə gətirdi ki, həmin vaxt Krımın Sevastopol şəhərində yaşayan bir tanışımdan məktub aldım. O, məni Sevastopolda yaşayan azərbaycanlı balaları üçün məktəb açmaq məqsədilə həmin şəhərə dəvət edirdi. 1996-cı ilin yanvarında bu dəvət əsasında Ukraynaya getdim. Burada yerli diasporumuzun nümayəndələri ilə birlikdə azərbaycanlı uşaqlar üçün məktəb açdıq. Sevastopolda yaşadığım ilk gündən yerli radionun proqramlarını ardıcıl izləyirdim. Şəhər radiosunda ermənilərin xüsusi proqramı yayımlanırdı. Onlar vaxtaşırı verilişlərində haqqımızda təxminən belə deyirdilər: “Azərbaycanlılar vəhşi xalqdır. Onlar Sumqayıtda bizi kabab edib yemişlər. İndi isə Qarabağda demokratiya qalib gəlib. Qarabağ erməniləri Azərbaycanın zülmündən azad olublar. Özlərinin azad, demokratik respublikalarını qurublar”.

Bu düşüncələr içində radionun redaktorunun yanına getdim. Dedim ki, Bakıdan gəlmişəm, müəlliməm, ziyalıyam, sizə bir sualım var: mənə elə bir xalq göstərin ki, adamyeyən olsun? Redaktor cavabında dedi ki, dünyada belə bir xalq yoxdur. Dedim ki, əgər belədirsə, ermənilər azərbaycanlıları vəhşi, adamyeyən xalq kimi təqdim edir, siz isə susursunuz.

-Redaktor məsələyə necə reaksiya verdi, sizə köməklik göstərə bildimi?

-Bəli, kömək göstərə bildi. Məlum oldu ki, redaktor onların çıxışlarını dinləməyib. Məsələdən xəbərdar olandan sonra redaktor bu verilişi hazırlayan jurnalistləri danladı, erməni cəmiyyətinin nümayəndələrinə belə bir verilişi efirə verdikləri üçün telefon vasitəsilə kəskin iradını bildirdi. Mən redaktora yerli radioda Azərbaycanla bağlı proqramın açılmasını təklif etdim. Cavabında redaktor dedi ki, biz heç kimin yolunu kəsməmişik, buyurun gəlin, proqram açın. Bir şərtlə ki, efirə münaqişəli verilişlər vermək olmaz. Yalnız mədəniyyətinizi təbliğ edə bilərsiniz. Mən də öz növbəmdə söz verdim ki, efirdə Azərbaycan mədəniyyətindən bəhs edən verilişlər səsləndirəcəyəm. Siz də görəcəksiniz ki, Azərbaycan xalqı necə yüksək mədəniyyətə, zəngin tarixi keçmişə, böyük istedada malik xalqdır.

-Fəaliyyətə başladığınız ilk vaxtlarda sizə münasibət necə idi?

-Mən fəaliyyətə başladığım andan “Qobustan” proqramı vasitəsilə xalqımızın mədəniyyəti ilə bağlı silsilə, maraqlı verilişlər təqdim edirdim. Bu, mənim üçün olduqca qürurlu və sevindirici hal idi. Təəssüf ki, bir neçə aydan sonra ermənilərin təxribatı nəticəsində radio bağlandı. Guya mən münaqişə yaradıram, siyasətlə məşğulam.

Mən yenidən redaktorla görüşdüm və məsələnin nə yerdə olduğunu söylədim. Onunla söhbətimdə konkret faktlar əsasında xalqlarımızın dostluğundan danışdım. Redaktor radionun açılmasına çalışacağını bildirdi. Hər şey aydınlaşandan sonra “Qobustan” proqramının fəaliyyəti yenidən bərpa olundu. Mən o vaxtdan indiyədək həmin proqramın aparıcısıyam.

-Hazırda proqramda ən çox hansı mövzulara müraciət edirsiniz?

-Biz həmişə olduğu kimi işimizi əzmlə davam etdiririk. Proqramda milli mədəniyyətimiz və incəsənətimizlə bağlı verilişlər hazırlamaqla yanaşı, muğamlarımız, aşıq sənəti, tariximiz, ədəbiyyatımız, o cümlədən bütün milli-mənəvi dəyərlərimizlə bağlı maraqlı məlumatlar təqdim edirik. Bildiyiniz kimi, radioda bir sıra xalqlara məxsus müxtəlif proqramlar yayımlanır. Həmin verilişlər həm rus, həm də həmin xalqların ana dillərində olmaqla ayda bir dəfə yarım saat müddətinə efirdə səslənir. Azərbaycana dair radioproqram yarandığı gündən indiyədək burada 200-dən çox maraqlı veriliş hazırlanıb efirə verilib. Hazırda bu istiqamətdə işlərimizi üzərimizə düşən missiyamızla davam etdiririk. Dövlətimizi təbliğ edirik. Bütün görülən işlərimizin müqabilində mən “Qobustan” proqramının aparıcısı kimi jurnalistlər arasında keçirilən ənənəvi “Gümüş qələm” XII Beynəlxalq açıq yaradıcılıq müsabiqəsində “İlin ən yaxşı radio proqramı” nominasiyası üzrə laureat olmuşam.

-Əməyiniz layiqincə qiymətləndirilirmi?

-Əvvəlcə Prezident İlham Əliyevə minnətdarlığımı bildirirəm. Bizim işimizi lazımi səviyyədə yüksək dəyərləndirir. Dövlət başçısı ötən il “Qobustan” proqramının fəaliyyətini yüksək qiymətləndirərək məni fəxri diplomla təltif etdi. Bu, bizim üçün ruhlandırıcı addım olmaqla yanaşı, Prezidentimizin gördüyümüz işə olan diqqət və qayğısının nəticəsidir. Bundan sonra da işimizi lazımi səviyyədə davam etdirəcəyik.

-Maraqlı müsahibə üçün çox sağ olun.