REGİONLAR
Quba və ətraf rayonlardan olan 50 sahibkara 1,3 milyon manat güzəştli kredit verilib VİDEO
Quba, 12 mart, Elxan Yusifli, AZƏRTAC
Martın 12-də İqtisadiyyat və Sənaye Nazirliyinin Sahibkarlığa Kömək Milli Fondu tərəfindən Quba və ətraf rayonlardan olan 50 sahibkara 1,3 milyon manat güzəştli kredit verilib.
AZƏRTAC xəbər verir ki, Quba rayonunun Qəçrəş kəndində keçirilən sahibkarlığın güzəştli kreditləşdirilməsi məsələlərinə dair işgüzar forum çərçivəsində təqdim olunan kreditlər əsasən heyvandarlıq, bağçılıq, tingçilik sahələrin inkişafına yönəldiləcək. Bu kreditlərin reallaşdırılması hesabına 70-dən çox yeni iş yerinin açılması mümkün olacaq. Ümumilikdə, 2015-ci ilin ötən dövrü ərzində respublika üzrə 995 sahibkara 29,6 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 2180-dən çox yeni iş yerinin yaradılmasına imkan verir.
80-ə yaxın sahibkarın iştirak etdiyi işgüzar forumda sahibkarlara güzəştli kreditlərin alınması mexanizmi barədə ətraflı məlumat verilib. Bununla yanaşı, Quba və ətraf rayonlarda həyata keçirilməsi məqsədəuyğun hesab olunan nümunəvi layihələr təqdim olunaraq, sahibkar-müvəkkil kredit təşkilatı münasibətlərinin möhkəmləndirilməsi istiqamətində müzakirələr aparılıb, sahibkarların investisiya layihələri güzəştli qaydada maliyyələşdirilib.
İşgüzar forum çərçivəsində Quba rayonunun iqtisadi potensialının reallaşdırılması məqsədilə prioritet hesab olunan ixtisaslaşdırılmış “yaşıl market”in, müasir meyvə-tərəvəz emalı zavodunun, kiçik və ya orta həcmli bağçılıq təsərrüfatlarının, kiçik meyvəqurutma və plastik qapı-pəncərə istehsalı müəssisələrinin yaradılması üzrə nümunəvi investisiya layihələrinin təqdimatı keçirilib. Forumda kiçik həcmli investisiya layihələrinin ümumi dəyərinin 100 faizədək hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanılıb.
Sahibkarlığa Kömək Milli Fondunun icraçı direktoru Şirzad Abdullayev bildirib ki, ümumilikdə, indiyədək Quba-Xaçmaz iqtisadi rayonunda fəaliyyət göstərən sahibkarlıq subyektlərinin 1833 ədəd investisiya layihəsinin maliyyələşdirilməsinə 133,8 milyon manat güzəştli kredit verilib. Digər sahələrlə yanaşı, müasir texnologiyaların tətbiqinə əsaslanan logistika mərkəzlərinin, üzümçülük, intensiv bağçılıq, istixana təsərrüfatlarının, meyvə-tərəvəz emalı, quru meyvə, tara, tikinti materialları istehsalı müəssisələrinin yaradılması və s. sahələr üzrə investisiya layihələri maliyyələşdirilərək, 10 mindən çox yeni iş yerinin açılması imkanı yaradılıb. Qeyd edilib ki, indiyədək Quba-Xaçmaz iqtisadi rayonu üzrə ümumi tutumu 53,2 min ton olan 14 logistik mərkəzin maliyyələşdirilməsinə 31,8 milyon manat güzəştli kredit verilib.
Forum çərçivəsində Qusar rayonunun Ləgərqışlaq kəndində yerləşən logistika mərkəzinin tutumunun 3,6 min tondan 7 min tona çatdırılması və Xaçmaz rayonunda ümumilikdə, 200 hektar ərazidə intensiv alma bağının salınması üçün Sahibkarlığa Kömək Milli Fondundan güzəştli kreditin verilməsi ilə bağlı müzakirələr də aparılıb.