Sumqayıt, 2 avqust, Ətrabə Rzayeva, AZƏRTAC 

Avqustun 2-də Qubadlı Rayon İcra Hakimiyyətinin akt zalında cari ilin birinci yarısının yekunlarına həsr olunmuş hesabat yığıncağı keçirilib. Yığıncaqda rayonun idarə, müəssisə və təşkilat rəhbərləri, ictimaiyyət nümayəndələri iştirak ediblər.

AZƏRTAC xəbər verir ki, rayon icra hakimiyyətinin başçısı Malik İsaqov hesabat dövründə ölkədə əldə olunan uğurlu nəticələrdən, məcburi köçkünlərin həyat şəraitinin yaxşılaşdırılması istiqamətində həyata keçirilən tədbirlərdən danışıb. Diqqətə çatdırıb ki, bu ilin may ayında Bakının Qaradağ rayonunda Azərbaycanın Birinci vitse-prezidenti Mehriban Əliyevanın iştirakı ilə məcburi köçkünlər üçün 1026 ailəlik yeni yaşayış kompleksinin təməlqoyma mərasimi keçirilib. Xəzər və Xətai rayonlarında tikintisi yarımçıq qalmış binalarda məskunlaşan 214 ailə Masazır və Mehdiabad qəsəbələrində yeni inşa olunmuş mənzillərə köçürülür.

Bildirilib ki, Böyük qayıdışın ilk mərhələsi olan Cocuq Mərcanlının bərpa edilməsi bütün ölkə əhalisi kimi, məcburi köçkünlərin də sevincinə səbəb olub. Bu, işğal altındakı bütün torpaqların, o cümlədən Qubadlının azad ediləcəyinə inamı daha da artırıb.

Sonra rayon icra hakimiyyəti başçısının müavini Allahverdi Haxverdiyev cari ilin 6 ayında rayonda görülmüş işlər barədə məruzə ilə çıxış edib. Diqqətə çatdırılıb ki, sakinlərin məskunlaşma yerlərində yaşayış şəraitinin yaxşılaşdırılması istiqamətində tədbirlər davam etməkdədir. Rayon icra hakimiyyətinin köməyi ilə Bakının Xəzər rayonundakı sanatoriya binasında məskunlaşan 8 ailəyə Abşeron rayonunun Masazır qəsəbəsində yeni mənzillər verilib. “Şəfa” sanatoriyasının, 10 saylı Peşə Liseyinin binasının zirzəmiləri sudan təmizlənib, “Sumqayıt” mehmanxanasında su və kanalizasiya xətləri təmir olunub. Bununla yanaşı, bir sıra sakinin fərdi qaydada məskunlaşdığı yerlərdə təmir işləri aparmaq üçün vəsait ayrılıb.

Hesabat dövründə rayonun ümumi gəlirləri 1 milyon 274 min 503 manat və ya 1,2 dəfə çox icra olunub. Füzuli rayonu ərazisində torpaq sahəsi alınaraq 5 min ədəd tut tingi əkilib, 3 hektar sahədə buğda səpini aparılıb.

Məlumat verilib ki, icra hakimiyyətinin köməyi ilə yaxın vaxtlarda rayonun beş məktəb binasının əsaslı təmirinə başlanılması nəzərdə tutulub. Xanlıq kənd ümumi orta məktəbi üçün binanın tikintisi başa çatmaq üzrədir, digər məktəblərin əksəriyyətində isə təmir işləri davam etdirilir.

İlin birinci yarısında əhalinin aztəminatlı hissəsi də diqqətdə saxlanılıb. Daxili imkanlar hesabına yas mərasimlərinin təşkili, xəstələrin müalicəsi və digər məsələlərlə əlaqədar aztəminatlı ailələrə 37 min 680 manat maddi yardım edilib.

Gənclər və idman siyasətinin rayonda ardıcıl həyata keçirilməsi üçün də müntəzəm iş aparılır. Təsadüfi deyil ki, rayonun 17 idmançısı beynəlxalq yarışların və respublika turnirlərinin qalibi olub. Qubadlılı idmançılar IV İslam Həmrəyliyi Oyunlarında uğurla çıxış ediblər. İslam Abbasov yunan-Roma güləşi üzrə Oyunların çempionu olub, cüdo yarışlarında Elçin Talıbov qızıl, Natiq Talıbov isə bürünc medal qazanıb.

Yığıncaqda vətəndaşların müraciətlərinə baxılması vəziyyəti ətraflı təhlil olunub. Qeyd edilib ki, bu məsələ daim diqqət mərkəzində saxlanılır. Belə ki, hesabat dövründə rayon icra hakimiyyətinə dövlət orqanlarından və vətəndaşlardan 55 yazılı müraciət daxil olub. İlin birinci yarısında keçirilən 15 səyyar qəbulda 62 müraciət qeydə alınıb, onlarda 50-si müsbət həll edilib. Altı ayda keçirilən 22 qəbulda icra hakimiyyətinin başçısı tərəfindən 384 vətəndaş qəbul olunub.

Məruzə ətrafında çıxış edənlər dövlətimizin başçısı tərəfindən qarşıya qoyulan vəzifələrin uğurla yerinə yetirilməsi üçün səylərini daha da artıracaqlarını bildiriblər.