REGİONLAR


Qubanın Susay kəndindəki 600 illik tarixə malik qədim məscidlə bağlı maraqlı faktlar VİDEO

A+ A

Quba, 5 avqust, Elxan Yusifli, AZƏRTAC

Qubada turistlərin diqqətini çəkən tarixi abidələrdən biri də Şahdağın ətəyində yerləşən Susay kəndində 600 ildən çoxdur mövcud olan qədim məsciddir.

AZƏRTAC xəbər verir ki, rayon mərkəzindən 30 kilometr məsafədə yerləşən Susay kəndinin tarixi də çox qədimdir. Araşdırmalara görə, burada yaşayış məntəqəsi dörd min il əvvəl salınıb.

Kənddə XV əsrə aid edilən məscidin inşasında çay daşından və yaxınlıqdakı “Bağça dərəsi” adlanan yerdən çıxarılan kərpiclərdən istifadə olunub. Həmin kərpiclər yüngül olduğu qədər də, möhkəm və nəmə dözümlüdür.

Məscid yerli əhəmiyyətli tarixi abidə kimi dövlət tərəfindən qorunur.

Uzun illər məsciddə çalışan 80 yaşlı Məmmədağa Pəncəliyev bildirir ki, tarixi abidə ilə bağlı araşdırılmağa ehtiyacı olan bir sıra maraqlı faktlar mövcuddur. Yaşlı kənd sakinlərin sözlərinə görə, XX əsrin əvvəllərində məscidin qədim qapılarından biri Azərbaycana gələn ingilislər tərəfindən Londona aparılıb. Hazırda həmin qapının Fransadakı muzeylərdən birində saxlanıldığı iddia edilir. Həmin qapının eynisi isə tarixi abidə ilə birgə qorunub saxlanılıb. Palıd ağacından yonulan qapının üzərində onu hazırlayan ustanın adı və hazırlandığı tarix, hicri təqvimi ilə 721-ci il göstərilib. Məscidin içərisindəki üzərində qədim işarələr olan böyük sütunlar da palıddandır.

Binanın dəhlizindəki daş lövhələr üzərində də ərəb əlifbası ilə yazılar mövcuddur. Lakin ərəb dilini bilən yerli mütəxəssislər bu yazıları oxumaqda çətinlik çəkirlər.

Son illər məsciddə bir sıra restavrasiya işləri aparılıb.

Qeyd edək ki, Susay kəndinin də daxil olduğu Alpan inzibati ərazi dairəsində dövlət tərəfindən qorunan tarixi abidə kimi qeydiyyata alınan 4 məscid və 1 türbə mövcuddur.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.