MƏDƏNİYYƏT
Qunta Uşpele: Bakı Şərqin müasir Metropoluna çevrilib
Riqa, 27 aprel, AZƏRTAC
Yurmala turizm departamenti ikinci ildir ki, Azərbaycanda keçirilən sərgilərdə iştirak edir. Yurmala bu ilin aprelində Bakıda Azərbaycan Beynəlxalq “Turizm və Səyahətlər” (AITF-2016) sərgisində ilk dəfə öz stendini təqdim edib. Bu sözləri Yurmala Dumasının turizm və xarici əlaqələr şöbəsinin başçısı Qunta Uşpele AZƏRTAC-ın xüsusi müxbirinə müsahibəsində deyib. “AITF-2016” sərgisində Latviyanın bir neçə turizm operatorunun nümayəndələri işləyiblər. Onlar Azərbaycandan olan tərəfdaşlarla yeni əlaqələr qurublar.
Yurmala 2015-ci ilin sentyabrında 21-ci Azərbaycan Beynəlxalq Səhiyyə “BIHE 2016” sərgisində iştirak edib. Məlum olub ki, Yurmala təkcə istirahət yeri və kurort müalicəsi kimi deyil, həm də tibbi xidmətlər nöqteyi-nəzərindən böyük maraq doğurur.
Azərbaycan ilə Latviya arasında turizm sahəsində ikitərəfli əməkdaşlığın getdikcə daha intensiv olduğunu bildirən Q.Uşpele deyib: “Biz Azərbaycanın turizm bazarı ilə 2015-ci ildə işləməyə başlamışıq və hazırda bu əməkdaşlığı uğurla davam etdiririk”. Bu müddət ərzində Azərbaycanın turizm agentlikləri və jurnalistlərindən ibarət nümayəndə heyətlərinin səfərləri təşkil edilir. Latviya turoperatorlarının nümayəndələri kataloq və saytlar yaratmaq üçün informasiya xarakterli fotoşəkil və materialları, habelə tibbi xidmətlər barədə informasiyaları Azərbaycanın turizm firmalarına təqdim edirlər.
Q.Uşpele diqqətə çatdırıb ki, hazırda Azərbaycanın turizm firmaları ilə birlikdə sağlamlıq turizmi sahəsində perspektivli bazar olan Yurmalada dincəlməyə dair təkliflər işlənib hazırlanır. Yeri gəlmişkən, Azərbaycanda Yurmalanı yaxşı tanıyırlar, çoxlarının Yurmala ilə bağlı gözəl xatirələri var.
Q.Uşpele “Latviya Azərbaycan turistinə nə təklif edə bilər” sualına cavabında deyib ki, yayda mülayim iqlim və kurort-sağlamlıq prosedurları ürək-damar sistemi zəif olan insanlar üçün çox faydalıdır. Latviya, o cümlədən Yurmala flebologiya sahəsində də maraq doğura bilər, çünki Latviya həkimləri venaların bioyapışqan və lazerlə müalicəsi, habelə proktoloji xəstəliklərin, habelə lazer əməliyyatları vasitəsilə görmə problemlərinin müalicəsi sahəsində yüksək nəticələr əldə ediblər. Q.Uşpele vurğulayıb ki, bu xidmətlər həm keyfiyyəti, həm də qiymətlərinin münasib olması baxımından maraq doğurur. O deyib: “Özünüz düşünün: Almaniya və İsveçrə səviyyəsində olan keyfiyyətli xidmət və dörd dəfə ucuz qiymətlər. Bundan əlavə, Yurmalada dünyada ilk özəl viroterapiya mərkəzi açılıb. Burada riqvir virusunun köməyi ilə onkoloji xəstəliklər əleyhinə mübarizənin unikal metodları tətbiq edilir.
Yurmala Dumasının turizm departamentinin başçısı Azərbaycan paytaxtı barədə təəssüratlarını bölüşərək deyib: “Sonuncu dəfə Azərbaycanda ötən əsrin 80-ci illərində olmuşam. Deyə bilərəm ki, Bakı çox dəyişib. Şərqin müasir Metropoluna çevrilib. Yeni binaların yerli memarlıq ənənələri nəzərə alınmaqla ucaldılması çox xoşuma gəlir. Bakının tarixi mərkəzi bərpa olunub. Yaxşı səviyyəli restoranlar çoxdur. Turistlər üçün baxıb-görməli və heyran qalmalı yerlər çoxdur.
Nigar Cəfərli
AZƏRTAC-ın xüsusi müxbiri
Riqa