İQTİSADİYYAT
Rövnəq Abdullayev: ARDNŞ-in regional və qlobal layihələrində müasir biliklərə yiyələnmiş gənc kadrlara daim ehtiyac var
Bakı, 21 noyabr, Nihat Budaqov, AZƏRTAC
Noyabrın 21-də “Neftqazelmitədqiqatlayihə” İnstitutunda “ARDNŞ-də gənclərlə bağlı layihələr, təhsil və karyera imkanları, qarşıda duran vəzifələr” mövzusunda görüş keçirilib.
Tədbirdə Azərbaycan Respublikası Dövlət Neft Şirkətinin (ARDNŞ) rəhbərliyinin nümayəndələri, müxtəlif ali təhsil müəssisələrinin rəhbərləri, eləcə də şirkətin Təqaüd Proqramları çərçivəsində xaricdə və Azərbaycanın ali məktəblərində təhsil alan tələbələr, habelə bu proqramlar çərçivəsində ARDNŞ-in idarə və müəssisələrində işə qəbul olunmuş gənc mütəxəssislər iştirak ediblər.
AZƏRTAC xəbər verir ki, tədbirdə çıxış edən ARDNŞ-in prezidenti Rövnəq Abdullayev görüşün əlamətdar günə - Yeni Azərbaycan Partiyasının yaradılmasının ildönümünə təsadüf etdiyini bildirib və bu münasibətlə iştirakçıları təbrik edib. R.Abdullaev son illər Prezident İlham Əliyevin rəhbərliyi altında həyata keçirilən məqsədyönlü siyasətin ölkəmizə qazandırdığı uğurlardan danışıb, bu nailiyyətlərdə Dövlət Neft Şirkətinin rolundan bəhs edib.
Ölkəmizdə davamlı olaraq həyata keçirilən gənclər siyasətindən söhbət açan ARDNŞ-in prezidenti gənc nəslin ictimai fəallığının artırılması, onun enerji və potensialından daha effektiv istifadə edilməsi, gənclərin cəmiyyətin aparıcı qüvvəsinə çevrilməsi istiqamətində yaradılmış imkanlardan söhbət açıb. Qeyd olunub ki, bu istiqamətdə “Azərbaycan gəncliyi 2011-2015-ci illərdə” və “2007-2015-ci illərdə Azərbaycan gənclərinin xarici ölkələrdə təhsili üzrə” Dövlət proqramları qəbul edilib, 2011-ci ildə Azərbaycan Respublikasının Prezidenti yanında Gənclər Fondu yaradılıb.
Azərbaycanda keçirilən beynəlxalq mötəbər idman və intellektual yarışlarda gənclərin əldə etdikləri uğurları yüksək qiymətləndirən R.Abdullayev enerji ehtiyatlarından əldə olunan gəlirlərin insan kapitalının inkişafına yönəldilməsi nəticəsində ölkəmizin davamlı inkişafının təmin olunduğunu vurğulayıb. Qarşıdakı illərdə şirkətin həyata keçirəcəyi layihələrdən danışan ARDNŞ-in prezidenti həmin layihələrin uğur qazanması üçün müasir biliklərə yiyələnmiş gənc kadrlara böyük ehtiyac olduğunu söyləyib.
Bildirilib ki, şirkət fəhlə kadrlarının hazırlanması istiqamətində də mühüm addımlar atıb. Bu gün neft sənayesi üçün lazım olan fəhlə kadrlarının 80 faizi ARDNŞ-in təlim, tədris və sertifikatlaşdırma idarəsinin nəzdində fəaliyyət göstərən beş təlim-tədris mərkəzində hazırlanır. İndiyədək bu mərkəzlərdə 41 min müdavim ixtisasartırma, ikinci peşəyə yiyələnmə, yenidən hazırlanma kurslarına cəlb olunub. 1055 gənc isə peşə hazırlığı keçərək Dövlət Neft Şirkətinin müxtəlif müəssisələrində işlə təmin edilib.
Vurğulanıb ki, Prezident İlham Əliyevin tapşırığına əsasən ARDNŞ-də ehtiyac duyulan ixtisaslar üzrə azərbaycanlı gənclərin xarici ölkə universitetlərində təhsilinin təşkil olunmasına 2006-cı ildən başlanılıb. İndiyədək 250 gəncin Böyük Britaniya, Almaniya, Fransa, ABŞ, Norveç, Kanada, Türkiyə, Avstriya, İsveç, Rusiya, Malta kimi ölkələrin ən nüfuzlu universitetlərində təhsili maliyyələşdirilib, onların 199 nəfəri təhsilini başa vuraraq geri qayıdıb və Dövlət Neft Şirkətində işlə təmin olunub.
R.Abdullayev Azərbaycanda fəaliyyət göstərən ali məktəblərin tələbələrinə müsabiqə əsasında verilən ARDNŞ təqaüdlərinin də gənclər arasında xüsusi rəğbət doğurduğunu qeyd edib. Bildirilib ki, indiyədək keçirilmiş 17 seçim müsabiqəsində Azərbaycan universitetlərinin 13 mindən artıq əlaçı tələbəsi iştirak edib. Onlardan 1681-i ARDNŞ təqaüdünə layiq görülüb. 2009-cu ildən etibarən təhsilini təqaüdçü kimi başa vuran məzunlarla yanaşı, təqaüd müsabiqələrində fərqlənənlərə də işə qəbul zamanı üstünlük verildiyini deyən ARDNŞ-in prezidenti indiyədək bu yolla 161 nəfərin işə qəbul olunduğunu bildirib.
Qeyd edilib ki, şirkət üzrə kadrların keyfiyyət tərkibində müsbət dəyişikliklər baş verib, qısa müddət ərzində işçilərin ümumi sayında gənclərin xüsusi çəkisi artıb. 2014-cü ildə həm ARDNŞ-in struktur bölmələrinin idarəetmə aparatında, həm də baş ofisdə çalışan gənclərin sayı 2005-ci illə müqayisədə təxminən 2 dəfəyədək çoxalıb. Gənclər bu gün şirkətin baş ofisində ümumi işçilərin 23 faizini, 35 yaşına qədər olan əməkdaşlar isə 43,7 faizini təşkil edir.
Tədbirdə çıxış edən insan resursları departamentinin rəisi Asif Bəkirli ARDNŞ-in gənclərlə bağlı gördüyü işlər bərədə statistikanı iştirakçıların diqqətinə çatdırıb.
Sonra ARDNŞ-in həyata keçirdiyi kadr hazırlığı proqramları haqqında qısa film nümayiş etdirilib.
Tədbirdə ARDNŞ-in birinci vitse-prezidenti, akademik Xoşbəxt Yusifzadə, təhsil nazirinin müavini Firudin Qurbanov, Bakı Dövlət Universitetinin rektoru Abel Məhərrəmov və başqaları çıxış edərək Dövlət Neft Şirkəti tərəfindən gənclərə göstərilən diqqət və qayğıya görə minnətdarlıqlarını bildirib, neft-qaz sənayesinin inkişaf perspektivləri haqqında fikirlərini söyləyiblər.
Sonda “SOCAR Yay Məktəbi 2014” layihəsində birinci yeri tutan komandanın üzvlərinə sertifikatlar və ilk dəfə ARDNŞ-in təqaüdünə layiq görülən tələbələrə plastik bank kartları təqdim olunub.