MƏDƏNİYYƏT
RİMM-də Müslüm Maqomayevin xatirəsinə həsr edilmiş musiqili ədəbi gecə keçirilib
Bakı şəhərindəki Rusiya İnformasiya-Mədəniyyət Mərkəzində (RİMM) dünya şöhrətli bəstəkar və müğənni, SSRİ Xalq Artisti Müslüm Maqomayevin xatirəsinə həsr edilmiş musiqili ədəbi gecə keçirilib.
Xatirə gecəsinə M.Maqomayevin istedadının çoxsaylı pərəstişkarları, yaradıcı ziyalılar toplaşmışdı. Tədbir iştirakçıları arasında vaxtilə Müslüm Maqomayevin bitirdiyi Üzeyir Hacıbəyli adına Bakı Musiqi Akademiyasının məzunları və tələbələri də çox idi.
RİMM-dən AZƏRTAC-a verilən məlumata görə, konsert proqramına Müslüm Maqomayevin öz əsərləri və başqa bəstəkarların onun repertuarında yer almış mahnıları daxil idi.
Maraqlıdır ki, konsert ilkin ssenari çərçivəsindən kənara çıxıb. Mikrofona yaxınlaşmaq və hamının çox sevdiyi mahnıları ifa etmək arzusunda olanlar çox idi.
Qeyd edək ki, Azərbaycanın istedadlı gənc musiqiçiləri öz repertuarını Maqomayevin əsərləri ilə zənginləşdirməyə çalışırlar.
Tamaşaçılar Bakı Musiqi Akademiyasının tələbələri Orxan Cəlilov, Ramin Hüseynli, Nərminə Əliyeva və Süleyman Məlikovun, habelə respublika müsabiqələri laureatı Aslan Əzimzadənin çıxışlarını gurultulu alqışlarla qarşılayıblar. Bu alqışlar təkcə ifaçılara deyil, həm də böyük həmyerlimiz Müslüm Maqomayevə ünvanlanmışdı.
Sonra 2012-ci ildə “Mədəniyyət” telekanalının sifarişi ilə Marina Deniseviçin və Valeri Spirinin çəkdiyi “Verilməmiş suallar” sənədli filmi nümayiş etdirildi. Filmdə SSRİ Xalq Artisti Tamara Sinyavskaya öz sevimli həyat yoldaşı, bəstəkar və müğənni Müslüm Maqomayevdən danışır. Çəkilişləri M.Maqomayevin və T.Sinyavskayanın həyatında xüsusi rol oynamış 4 şəhərdə - Bakı, Moskva, Milan və Paris şəhərlərində aparılmış sənədli filmdə Müslüm Maqomayevin ifasında musiqi və mahnılar səslənir. Bu film bir-birini hədsiz sevən iki insan – Tamara Sinyavskaya və Müslüm Maqomayev arasında bir növ qiyabi dialoqdur.
Xatirə gecəsi başa çatandan sonra gənc artistlər Azərbaycanda hər il Müslüm Maqomayevin əsərlərinin Gənc İfaçılarının Beynəlxalq Festivalının təşkil edilməsi və keçirilməsi ideyasını müzakirə etdilər. RİMM nəzdində fəaliyyət göstərən Gənclərin “Sozvezdiye” Yaradıcılıq Klubu bu təşəbbüsü ürəkdən bəyəndiyini bildirib. Bu halda klub Azərbaycanın və Rusiyanın mədəniyyət nazirliklərinin və əlbəttə, Tamara Sinyavskayanın dəstəyinə ümid bəsləyir.