Gəncə, 26 may, Rauf Hacıyev, AZƏRTAC

Gəncə şəhərində akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin təşkilatçılığı ilə keçirilən üçüncü regional konfransda qarşıda duran məsələlər müzakirə edilib və yeni tədbirlər planı hazırlanıb.

AZƏRTAC xəbər verir ki, konfrans iştirakçıları əvvəlcə ümummilli lider Heydər Əliyevin şəhərin mərkəzindəki abidəsini ziyarət edib, önünə gül dəstələri düzüblər.

Tədbirdə çıxış edən Gəncə Şəhər İcra Hakimiyyəti başçısının müavini Sevda Qurbanəliyeva ölkədə səhiyyənin inkişafı istiqamətində görülən işlərdən danışıb. Bildirilib ki, Prezident İlham Əliyevin rəhbərliyi ilə aparılan əsaslı islahatlar səhiyyə sahəsinə də müsbət təsir göstərib. Son illər ölkəmizdə çoxsaylı xəstəxanalar tikilib, müalicə-diaqnostika mərkəzləri fəaliyyətə başlayıb. Səhiyyə müəssisələri müasir tibbin ən son texnoloji avadanlıqlar ilə təchiz olunub. Ölkə səhiyyəsini yüksəkixtisaslı və peşəkar kadrlarla təmin etmək məqsədilə gənclərimiz dövlətin dəstəyi ilə dünyanın nüfuzlu tibb universitetlərində təhsil alıb, yaxud müvafiq ixtisasartırma kurslarına göndəriliblər. Həmçinin ölkə əhalisinin sağlamlığının qorunması üçün Prezident İlham Əliyevin müvafiq tapşırığı ilə bütün regionlarda sakinlərin kütləvi tibbi müayinəsi təşkil edilib. Müxtəlif xəstəliklərdən əziyyət çəkən insanların pulsuz qan və dərmanlarla təminatı, eləcə də müalicəsi üçün ayrı-ayrı dövlət proqramları həyata keçirilib.

Konfransda çıxış edən akademik Zərifə Əliyeva adına Milli Oftalmologiya Mərkəzinin baş həkimi, tibb elmləri doktoru Aytən Sultanova bildirib ki, üçüncü regional konfransın əsas məqsədi oftalmologiya sahəsindəki tibbi yenilikləri bölüşmək, hər bir oftalmoloqun ümumi təcrübəsində təsadüf olunan müayinə və müalicə üsullarını iştirakçılara təqdim etməkdir. Həmçinin əhali arasında oftalmoloji maarifləndirməni gücləndirmək, yerli kadrların xarici ölkələrdə keçiriləcək konfranslarda iştirakını təmin etmək və bu istiqamətdə tədbirlər planı hazırlamaqdır.

Son illərdə səhiyyə sistemində aparılan islahatların oftalmologiya sahəsində ciddi inkişafa səbəb olduğunu qeyd edən Aytən Sultanova vurğulayıb ki, Heydər Əliyev Fondunun bu sahəyə göstərdiyi diqqət sayəsində hazırda Azərbaycan oftalmologiyası müasir tibbin ən yüksək zirvəsinə yüksəlib. Məhz bunun nəticəsidir ki, son vaxtlar bir çox pasiyentlər xarici ölkələrdə deyil, yerli göz xəstəxanalarında müayinə və müalicəyə üstünlük verirlər.

Diqqətə çatdırılıb ki, akademik Zərifə Əliyeva adına Milli Oftalmologiya Mərkəzi Cənubi Qafqazda fəaliyyət göstərən ən böyük ixtisaslaşmış tibb müəssisəsidir. Hazırda bu Mərkəz yüksək texnoloji avadanlıqlarla təchiz olunub. Burada müasir tibdə istifadə edilən ən son müayinə və müalicə metodları, eləcə də cərrahi üsullar tətbiq olunur.

Azərbaycanda oftalmologiyanın inkişafı istiqamətində həyata keçirən tədbirlərin yalnız Bakı şəhəri ilə məhdudlaşmadığını deyən Aytən Sultanova vurğulayıb ki, son illərdə ölkənin bir çox regionlarında akademik Zərifə Əliyeva adına Milli Oftalmologiya Mərkəzinin filialları açılıb. Hazırda həmin filiallarda bütün növ göz xəstəlikləri müayinə və müalicə edilir, cərrahiyyə əməliyyatları aparılır.

Dünyada oftalmologiya sahəsində keçirilən beynəlxalq konfranslardan danışan Aytən Sultanova deyib ki, indi Azərbaycan alimləri bu tədbirlərdə fəal iştirak edir və müasir dövrdə oftalmologiyanın qarşısında duran məsələlərin həlli ilə bağlı müzakirələrə qoşulurlar. Təqdirəlayiqdir ki, azərbaycanlı həkimlər həmin konfranslarda yeni müalicə üsulları və müayinə metodları irəli sürürlər.

Azərbaycan Oftalmoloqlar Cəmiyyətinin ikinci regional konfransında qarşıya qoyulan məsələlərin uğurlu həllinə nail olunduğunu deyən Aytən Sultanova bildirib ki, bu illər ərzində akademik Zərifə Əliyeva adına Milli Oftalmologiya Mərkəzinin kollektivinin fəaliyyəti yalnız bura müraciət edən pasiyentlərin müayinə və müalicəsi ilə məhdudlaşmayıb. Kollektiv Mərkəzin həm özündə, həm də filiallarda müasir oftalmologiyada istifadə olunan bütün müayinə və müalicə üsullarının tətbiqinə nail olub.

Sonda konfransda iştirak edən alim və həkimlərin ölkədə uğurlu müalicə yolları tapılan xəstəliklər haqqında elmi məruzələri dinlənilib. Onlar gənc kadrları bu xəstəliklərin müayinə və müalicəsində tətbiq olunan müasir metodlarla tanış ediblər.