CƏMİYYƏT
Respublika Klinik Xəstəxanasında 1690 hemofiliyalı xəstə dövlət proqramı əsasında müalicə edilir VİDEO
Bakı, 4 avqust, AZƏRTAC
Akademik M.Mirqasımov adına Respublika Klinik Xəstəxanasında 1690 hemofiliyalı xəstə və 490 dağınıq skleroz xəstəsi dövlət proqramı əsasında müalicə edilir və dərmanlarla təchiz olunur.
AZƏRTAC xəbər verir ki, bu fikirlər Respublika Klinik Xəstəxanasının fəaliyyətinə həsr edilmiş tədbirdə səsləndirilib. Tədbirdə qeyd edilib ki, ölkəmizdə səhiyyə sistemində həyata keçirilən köklü islahatlar tibb müəssisələrinin müasir avadanlıqlarla təchizatına, həkim və orta tibb personalının ixtisas səviyyəsinin yüksəlməsinə və nəticədə səhiyyə xidmətlərinin keyfiyyətinin yüksəlməsinə gətirib çıxarır. Müasir görkəm alan səhiyyə müəssisələrindən biri də Respublika Klinik Xəstəxanasıdır.
Xəstəxananın baş həkimi Telman İbadov bildirib ki rəhbərlik etdiyi xəstəxana respublikamızın rayon və şəhərlərinin tibb müəssisələri üçün praktiki və metodiki mərkəzdir. Xəstəxananın bütün şöbələri təmir edilərək xəstələrin istifadəsinə verilib.
Baş həkim diqqətə çatdırıb ki, 1960-cı ildən fəaliyyət göstərən 660 çarpayılıq xəstəxana çoxprofilli olub 23 stasionar şöbədən, 1 poliklinikadan, diaqnostik və yardımçı şöbələrdən ibarətdir. Xəstəxanada əhaliyə 326 həkim xidmət edir. Səhiyyə müəssisəsinin həkimləri və orta tibb personalı mütəmadi olaraq sertifikasiyadan və təkmilləşdirmə kurslarından keçirlər. İndiyədək 321 həkim sertifikasiyadan keçib, 72 nəfər isə təkmilləşdirmə kurslarında iştirak edib. Eyni zamanda, xəstəxanada 556 orta tibb işçisi fəaliyyət göstərir. Onlardan 504-ü sertifikasiyadan keçib, 118-i təkmilləşdirmə kurslarında iştirak edib.
Ötən il Respublika Klinik Xəstəxanasına 14 min 912 xəstə, 2016-cı ilin ötən dövrü ərzində isə 13 min 140 xəstə daxil olub. Səhiyyə müəssisəsi ən müasir avadanlıqlarla təchiz edilib.