CƏMİYYƏT
Respublika Veteranlar Təşkilatının nümayəndələri Qələbənin ildönümü münasibətilə Ukraynada görüşlərdə iştirak ediblər
Bakı, 24 aprel, AZƏRTAC
Artıq bir neçə ildir Ukraynanın “İnter” telekanalı İkinci Dünya müharibəsində alman faşizmi üzərində Qələbənin ildönümü münasibətilə silsilə tədbirlər keçirir. Bir qayda olaraq bu tədbirlərdə MDB ölkələrinin İkinci Dünya müharibəsi veteranları, veteran təşkilatlarının nümayəndələri iştirak edirlər. Həmin tədbirlər zamanı “İnter” telekanalının 9 May günü, xüsusi bayram verilişlərinin hazırlanması məqsədilə veteranlarla müxtəlif görüşlər təşkil olunur. Onlardan keçdikləri döyüş yollarını, yaşadıqları ölkənin hakimiyyət orqanlarının və veteran təşkilatlarının münasibətini əks etdirən müsahibələr götürülür.
Respublika Veteranlar Təşkilatından AZƏRTAC-a bildiriblər ki, İkinci Dünya müharibəsində alman faşizmi üzərində Qələbənin 72-ci ildönümü ilə bağlı Kiyevdə keçirilən tədbirlərdə Azərbaycan Respublikası Müharibə, Əmək və Silahlı Qüvvələr Veteranları Təşkilatının nümayəndələri də iştirak ediblər.
Tədbirdə Respublika Veteranlar Təşkilatını İkinci Dünya müharibəsi veteranı Bəkir Məmmədov və təşkilatın şöbə müdiri, ehtiyatda olan polkovnik Lətif Babayev təmsil ediblər.
İlk tədbirdə “İnter” telekanalının 2015-ci ildə Ukraynanın alman faşizmindən azad olunmasının 70 illiyi münasibətilə başlatdığı layihə çərçivəsində nəşr edilmiş “Qələbənin insanları. Yaşayacağıq” fotoalbomunun ikinci cildinin təqdimatı keçirilib. Layihə rəhbəri Anna Bezlyudnaya, baş redaktoru Anton Nikitin olan nəşrə İkinci Dünya müharibəsini yaşayan 100 iştirakçısı barədə geniş materiallar və fotoşəkillər daxil edilib. Fotoalbom həmin döyüşçülərin döyüş yolunun və müharibədən sonrakı həyatının ən maraqlı məqamlarını əks etdirir.
L.Babayev tədbirə qatılan Ukrayna, Gürcüstan, Moldova, Belarus veteran təşkilatlarının nümayəndələri ilə əməkdaşlıq əlaqələrinin hazırkı vəziyyəti və inkişafı perspektivlərini müzakirə edib. O, Azərbaycanın İkinci Dünya müharibəsində iştirakı ilə əlaqədar ucaldılmış abidələrin, komplekslərin, muzeylərin və ayrı-ayrı döyüşçülərlə bağlı xatirə yerlərinin qorunmasından, daim qayğı ilə əhatə olunmasından danışıb. L.Babayev Respublika Veteranlar Təşkilatının xüsusilə MDB ölkələrinin müvafiq təşkilatları ilə əməkdaşlıq əlaqələrinə mühüm əhəmiyyət verdiyini, ötən illərdə qurumun bu istiqamətdə fəaliyyətinin daha səmərəli qurulduğunu vurğulayıb.
Tədbirlərin üçüncü günündə “İnter” telekanalının 9 May verilişlərində göstəriləcək dörd saatlıq xüsusi konsert proqramı nümayiş etdirilib. Ukraynanın tanınmış musiqiçilərinin ifasında səslənən Vətən, torpaq, müharibə, qələbə, gənclik, sevgi və sair mövzuları əhatə edən bu mahnılar veteranlarda xoş ovqat yaradıb. Müharibəyə aid təsirli səhnələrdən ibarət süjetlər, dekorativ səhnələr həmin günlərin canlı şahidlərini təsirləndirib.
Azərbaycan nümayəndələri müsahibələr və söhbətlər zamanı telekanalın əməkdaşlarına İkinci Dünya müharibəsində faşizm üzərində Qələbəyə ölkəmizin verdiyi töhfələrdən, azərbaycanlıların qəhrəmancasına vuruşmasından, qanlı döyüşlərdə 320 minə yaxın soydaşımızın həyatlarını itirməsindən danışıb, bəşəriyyətin dəhşətli bəladan xilasında xalqların birgə nailiyyətinə verilən digər töhfələrdən bəhs ediblər. Həmçinin Azərbaycanda 9 May - Qələbə gününün hər il böyük təntənə ilə qeyd edildiyi, veteranlara dövlət tərəfindən xüsusi qayğı göstərildiyi vurğulanıb.
Azərbaycan nümayəndələri, həmçinin ölkəmizin 20 faizdən çox ərazisini işğal altında saxlayan Ermənistanın təcavüzkarlıq siyasətini bu gün də davam etdirdiyini diqqətə çatdırıb, bu məsələyə bütün veteran təşkilatlarının münasibət bildirməsinin vacibliyini vurğulayıblar.
Respublika Veteranlar Təşkilatının nümayəndələri ukraynalı həmkarları ilə görüşdə veteran təşkilatları arasındakı qarşılıqlı əlaqələrdən, bu əməkdaşlığın gələcəkdə daha da möhkəmləndirilməsi zərurətindən danışılıb.
Həmçinin Respublika Veteranlar Təşkilatının adından Ukrayna Veteranlar Təşkilatının sədri Viktor Şmakova, “İnter” telekanalının multimedia qrupunun rəhbəri Anna Bezlyudnayaya, baş redaktoru Anton Nikitinə medallar təqdim edilib.
Tədbir iştirakçıları “Naməlum əsgər” və “Ana vətən” abidələrini ziyarət edib, önünə gül dəstələri qoyublar.