İQTİSADİYYAT


Restrukturizasiya ilə əlaqədar "Azərbaycan Beynəlxalq Bankı"nın reytinqlərinə yenidən baxılıb

Bakı, 16 may, AZƏRTAC

"Azərbaycan Beynəlxalq Bankı"nın (ABB) sağlamlaşdırılması prosesinin növbəti mərhələsində bankın xarici kreditorlar qarşısındakı öhdəliklərinin könüllü restrukturizasiyasına başlanıldıqdan sonra "Fitch" və "Moody's" beynəlxalq reytinq agentlikləri ABB-nin reytinqlərinə yenidən baxıb.

Bankdan AZƏRTAC-a bildiriblər ki, gözlənildiyi kimi, "Fitch" bankın reytinqini ССС səviyyəsində elan edib. "Moody's" isə Banka Caa3 reytinqini verib.

Beynəlxalq reytinq agentliklərinin bununla bağlı açıqlamalarını şərh edən Azərbaycan Beynəlxalq Bankının İdarə Heyətinin sədri Xalid Əhədov bunun beynəlxalq təcrübəyə uyğun olduğunu bildirib: "Bu normal praktikadır və bizim üçün gözlənilən qərardır. Belə bir hal xarici ölkələrdə eyni prosesi keçmiş maliyyə qurumlarının təcrübəsində də baş verir. Adətən restrukturizasiya prosesi dövründə maliyyə qurumlarının reytinqləri qısa müddətdə aşağı düşür və proses başa çatdıqdan sonra reytinqlər yenidən bərpa olunur. ABB-nin reytinqlərinin aşağı salınması da müvəqqəti xarakter daşıyır".

"Azərbaycan Beynəlxalq Bankı"nın restrukturizasiya planı bankın maliyyə durumunun və likvidliyinin gücləndirilməsinə xidmət edir. Bu planın həyata keçirilməsi nəticəsində ABB-nin xarici valyuta mövqeyi tənzimlənəcək, maliyyə vəziyyəti və gəlirliliyi güclənəcək. Tədbirlər başa çatdırıldıqdan sonra bankın kapital mövqeyi müəyyən edilmiş normativ səviyyəyə qayıdacaq. Nəticədə ABB-nin uzunmüddətli maliyyə dayanıqlılığı təmin olunacaq və özəlləşdirmə öncəsi bankın bazar dəyəri artacaq. Bütün bunları nəzərə alaraq, restrukturizasiya prosesi başa çatdıqdan sonra "Azərbaycan Beynəlxalq Bankı"nın reytinqlərinin yüksələcəyi gözlənilir.

Qeyd edək ki, "Azərbaycan Beynəlxalq Bankı"nın xarici öhdəliklərinin könüllü restrukturizasiyası ilə bağlı sabah Bankın idarə heyətinin sədri Xalid Əhədovun geniş müsahibəsi yayılacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.