CƏMİYYƏT
Romada elm adamlarına, tələbələrə Azərbaycanın Milli Dirçəliş Günü barədə məlumat verilib VİDEO
Roma, 21 noyabr, AZƏRTAC
İtaliyanın La Sapienza Universitetinin nəzdində fəaliyyət göstərən Azərbaycan üzrə Araşdırmalar və Tədqiqatlar Mərkəzində (AATM) Azərbaycanın Milli Dirçəliş Günü ilə əlaqədar
keçirilən tədbirdə elmi dairələrin nümayəndələri, aparıcı tədqiqatçılar, Romada təhsil alan əcnəbi tələbələr və yerli KİV-lərin təmsilçiləri bir araya gəlib.
Azərbaycanın İtaliyadakı səfirliyinin dəstəyi və Azərbaycan-İtaliya Gənclər Assosiasiyasının (AİGA) təşəbbüsü ilə keçirilən tədbirdə qurumun sədri Fərid Abbasov deyib ki, 17 noyabr - Milli Dirçəliş Günü çağdaş tariximizin ən önəmli günlərindəndir. 1988-ci il noyabrın 17-də sovet hakimiyyətinin apardığı antiazərbaycan siyasətinə etiraz əlaməti olaraq Bakının Azadlıq meydanında başlayan və 17 gündən artıq davam edən kütləvi aksiyalar xalqımızın milli azadlıq hərəkatında ən mühüm mərhələ kimi qiymətləndirilir.
Azərbaycan və Qafqaz üzrə Gənc İtalyan Tədqiqatçılar Assosiasiyasının (ASSAC) prezidenti, professor Daniel Pommier çıxış edərək İtaliyanın elmi dairələrinin, tədqiqatçılarının Azərbaycana böyük maraq göstərdiklərini bildirib. O deyib ki, İtaliyada təhsil alan azərbaycanlı tələbələrin sayı ildən-ilə artır. Onların yüksək səviyyədə təhsil almaları üçün İtaliyanın ali təhsil müəssisələrində hər cür şərait yaradılıb. La Sapienza Universitetinin Bakı Beynəlxalq Multikulturalizm Mərkəzi ilə əməkdaşlığı çərçivəsində Azərbaycan multikulturalizmi fənni tədris olunur. Bu ölkədəki multikultural mühitlə yaxından tanış olmaq istəyən italiyalı tələbələrin qışda Azərbaycana səfəri də planlaşdırılır.
Səfirliyin əməkdaşı Samir Allahverdiyev Milli Dirçəliş Gününün Azərbaycan xalqı üçün əhəmiyyətindən danışıb və bu günü xalqımızın azadlıq mübarizəsi tarixində mühüm mərhələ kimi qiymətləndirib.
Diplomat uzun illər erməni terrorundan əziyyət çəkən Azərbaycanın son zamanlar dünyada baş verən və çoxlu sayda insan tələfatı ilə nəticələnən terror aktlarını pislədiyini bildirib.
O, tədbirdə təmsil olunan təşkilatların Azərbaycan-İtaliya münasibətlərinə bundan sonra da töhfə verəcəklərinə ümidvar olduğunu bildirib.
Azərbaycan-İtaliya Gənclər Assosiasiyasının prezidenti Manuela Sessa Bakıya səfərlərini xatırladıb və bütün səfərlərdən hər zaman böyük təəssüratlarla ayrıldığını bildirib. O deyib: “Azərbaycan xalqını çox sevirəm, olduqca maraqlı adət-ənənələriniz var. Azərbaycan və İtaliya xalqlarını çoxlu oxşar cəhətlər birləşdirir”.
M.Sessa rəhbərlik etdiyi assosiasiyanın İtaliyanın və Azərbaycanın gəncləri arasında əməkdaşlığı genişləndirmək istiqamətində fəaliyyət göstərdiyini deyib. Qeyd edib ki, iki ölkənin gənclərinin birgə səyləri ilə uğurlu layihələr həyata keçirmək olar. O, qurumun Azərbaycanın təbliği, bu ölkənin potensialının təqdim olunması istiqamətində keçirdiyi tədbirlərdən də danışıb. Vurğulayıb ki, italiyalı gənclər Azərbaycanda təhsil almağa, bu ölkə ilə yaxından tanış olmağa böyük maraq göstərirlər. Qurum bu istiqamətdə hər zaman gənclərə dəstək olmağa hazırdır.
Yeni təsis edilmiş İtaliya və Azərbaycan arasında mədəni mübadilə üzrə Avropa Assosiasiyasının rəhbəri Edoardo Paniki təşkilatın gələcək fəaliyyəti ilə bağlı məlumat verib. Bildirib ki, assosiasiya Azərbaycanın Dağlıq Qarabağdakı mədəni və tarixi abidələrinin Ermənistan tərəfindən dağıdılması ilə bağlı araşdırmalar həyata keçirməyi planlaşdırır.
İtaliyada fəaliyyət göstərən Azərbaycan Tələbə Şəbəkəsinin üzvü Həsən İsgəndərov, AİGA-nın vitse-prezidenti Məryəm Mehdiyeva və başqaları çıxış edərək təmsil etdikləri qurumların ölkələrimiz arasındakı əlaqələrə verdiyi töhfələrdən və gələcək planlardan söhbət açıblar.
Sonra “Mən Azərbaycan haqqında nə bilirəm?” adlı müsabiqə keçirilib. Ölkəmizlə bağlı sualları düzgün cavablandıran xarici tələbələrə hədiyyələr təqdim olunub.
Azərbaycanla bağlı videoçarxın nümayiş olunduğu tədbirdə iştirakçılara ölkəmiz haqqında təbliğat materiallar paylanıb, milli mətbəximizin nümunələri təqdim olunub.
Maqsud Dadaşov
AZƏRTAC-ın xüsusi müxbiri
Roma