CƏMİYYƏT
Rusiyanın azərbaycanlı gəncləri ”Qələbənin varisləri” mövzusunda konfrans keçiriblər
Moskva, 1 may, AZƏRTAC
Moskvada, “Poklonnaya qora”da yerləşən Böyük Vətən Müharibəsi Mərkəzi Muzeyində Rusiyanın Azərbaycanlı Gənclər Birliyinin (RAGB), Ümumrusiya Azərbaycanlılar Konqresinin (ÜAK) Azərbaycanın Rusiyadakı səfirliyinin təşkilatçılığı ilə “Qələbənin varisləri” mövzusunda tarixi-mədəni konfrans keçirilib.
Konfrans iştirakçıları – Böyük Vətən müharibəsi veteranları, arxa cəbhə əməkçiləri, RAGB-ın fəalları, Azərbaycan diasporunun üzvləri, Rusiya paytaxtının orta ümumtəhsil məktəblərinin şagirdləri “Poklonnaya qora”dakı Qələbə Parkında “Əbədi məşəl”in qarşısına əklil qoyublar. RAGB-ın fəalları olan tələbələr və Moskva məktəblərinin şagirdləri müharibələrdə həlak olanların xatirəsinə ehtiram əlaməti olaraq və Qələbənin 70 illiyi şərəfinə havaya şarlar buraxıblar.
Sonra Böyük Vətən Müharibəsi Mərkəzi Muzeyinin “Biz nasizmə qarşı birlikdə idik” ekspozisiyasının Azərbaycan üçün ayrılmış stendi qarşısında “Qələbənin varisləri” mövzusunda konfrans olub.
RAGB-in idarə heyətinin üzvü Emin Hacıyev tədbir iştirakçılarını RAGB-ın rəhbəri, Heydər Əliyev Fondunun vitse-prezidenti Leyla Əliyevanın adından salamlayıb və bütün veteranları qarşıdan gələn Qələbə Günü münasibətilə təbrik edib. O, konfransa maraq göstərdiklərinə görə iştirakçılara təşəkkür edərək deyib: “Ata-babalarımız müharibənin bütün ağırlığını bölüşüblər. Böyük Vətən müharibəsində keçmiş Sovet İttifaqının bütün xalqları qalib gəlib. Azərbaycanın qəhrəman oğulları ruslar, gürcülər, qazaxlarla çiyin-çiyinə döyüşüblər. Ötən müharibənin bir daha təkrarlanmaması üçün onun ibrət dərslərini unutmamalıyıq”. E.Hacıyev vurğulayıb ki, Rusiyanın azərbaycanlı gəncləri bir ay ərzində təkcə Moskvada deyil, həm də ölkənin regionlarında Böyük Vətən müharibəsində Qələbəyə həsr olunmuş bir sıra tədbirlər keçiriblər. Moskvanın aparıcı ali məktəblərinin – Moskva Dövlət Universitetinin, Moskva Dövlət Beynəlxalq Münasibətlər İnstitutunun, Birinci Moskva Dövlət Tibb Universitetinin, Rusiya İqtisad Universitetinin və s. tələbələri tədbirlərdə fəal iştirak ediblər. E.Hacıyev onu da bildirib ki, təşkilat veteranlar ilə bağlı humanitar layihələrə xüsusi diqqət yetirir, qocalar və uşaq evlərində görüşlər keçirir.
Azərbaycanın Rusiyadakı səfirliyinin müşaviri Aqşin Əliyev səfir Polad Bülbüloğlunun təbrikini çatdıraraq bildirib ki, Vətənin azadlığı uğrunda döyüşən sovet adamları xərçəng şişi kimi bütün dünyaya yayılan faşizmin belini qırıblar. O deyib: “Sovet İttifaqı dağılandan sonra çoxları düşünürdü ki, ümumi tariximizin dəyərləri unudulacaq. Lakin müstəqil Azərbaycanın gəncləri bu gün buradadır və bu gənclər böyük Qələbəyə görə babalarına minnətdardırlar”.
ÜAK-ın icraçı direktoru İlqar Hacıyev veteranları qurumun prezidenti Məmməd Əliyevin adından təbrik edərək deyib: “Dinc və azad bir dövrdə yaşayan nəsillər xilas edilmiş dünyaya görə sizə hədsiz minnətdardırlar! Gənclər sizə oxşamağa çalışacaq və bizi öz nailiyyətləri ilə sevindirəcəklər”. Faşizm üzərində Böyük Qələbədə Azərbaycanın, Bakı neftinin rolunu vurğulayan İ.Hacıyev deyib: “Muzeyin Azərbaycan ekspozisiyasında və əsasən azərbaycanlılardan ibarət olan 416-cı Taqanroq atıcı diviziyasına geniş yer ayrılıb. 1942-ci ildə bu diviziyanın döyüşçüləri Mozdok əməliyyatı zamanı almanların Qafqazı işğal etmək planlarını alt-üst edib, Bakıya gedən yolu bağlayıblar”.
Sovet İttifaqı Qəhrəmanı, hərbi kəşfiyyatçı Rixard Zorgenin adını daşıyan Hərbi-Tarixi Memorial Muzeyin direktoru Y.Barbaşova Bakıda anadan olan əfsanəvi kəşfiyyatçıdan danışıb. O, Rixard Zorgenin uşaqlıq və yeniyetməlik, gimnaziya və universitetlərdə təhsil aldığı illər, onun Birinci Dünya müharibəsində iştirakı, jurnalist fəaliyyəti, “Ramzay” qrupunun rəhbəri kimi Çin və Yaponiyada kəşfiyyatçı fəaliyyəti haqqında zəngin materiallar ilə tanış olmaq üçün hamını muzeyə dəvət edib.
RAGB-ın fəal tələbələri Babək Aslanlı, Cavidan İsmayılov, Rəna Musayeva, İlkin Həsənov, Rüstəm Həsənzadə, MDU-nun müəllimi Altunay Əliyeva “Böyük Vətən müharibəsinin yekunları və dərsləri”, “Azərbaycan Böyük Vətən müharibəsində”, “Gənclər və veteranlar – nəsillərin əlaqəsi” mövzularında çıxış ediblər.
Görüşün sonunda 1288 nömrəli Moskva şəhər orta ümumtəhsil məktəbinin şagirdləri Vətən və dostluq haqqında mahnılar oxuyublar.
Fəridə Abdullayeva
AZƏRTAC-ın xüsusi müxbiri
Moskva