Aprelın 27-də Bakı Şəhər İcra Hakimiyyətinin başçısı Hacıbala Abutalıbov şəhər İstehlak Bazarı və Xidmət Departamenti sədrinin müavini M.Umudovu, səhiyyə naziri Əli İnsanov isə kollegiyanın qərarı ilə Bakı şəhər Gigiyena və Epidemiologiya Mərkəzinin sədri H.Qədimovu öz vəzifəsindən azad etmişdir. 

Əldə olunan məlumata görə, buna səbəb Azərbaycan Prezidentinin aprelin 25-də sahibkarlarla keçirdiyi görüşdə hər iki idarənin ünvanına söylənilən ciddi narazılıqlar və çoxsaylı şikayətlər olmuşdur. Həyata keçirilmiş operativ yoxlama nəticəsində məlum olmuşdur ki, həm Bakı şəhər İstehlak Bazarı və Xidmət Departamenti, həm də Bakı şəhər Gigiyena və Epidemiologiya Mərkəzi Azərbaycan Respublikası Prezidentinin 1996-cı il 17 iyun tarixli “İstehsal, xidmət, maliyyə-kredit fəaliyyətinə dövlət nəzarətinin qaydaya salınması və əsassız yoxlamaların qadağan edilməsi barədə” və 1999-cu il 7 yanvar tarixli “Dövlət nəzarəti sisteminin təkmilləşdirilməsi və sahibkarlığın inkişafı sahəsində süni maneələrin aradan qaldırılması haqqında” Fərmanlarının tələblərini kobud surətdə və müntəzəm olaraq pozmuş və beləliklə sahibkarlığın inkişafına süni maneələr yaratmışlar.

Azərbaycan Prezidenti Heydər Əliyevin sahibkarlarla görüşündə hər iki idarənin ünvanına söylənilən çoxsaylı tənqidlərin əsaslı olduğu, ölkəmizin başçısının sahibkarlığın inkişafına mane olan halların aradan qaldırılması və əsassız yoxlamaların qadağan olunması haqqındakı müvafiq Fərmanlarının tələblərini kobud şəkildə pozulduğu xüsusi qeyd olunmaqla, hər iki vəzifəli şəxsin işdən azad olunması ilə bağlı müvafiq əmrlər verilmişdir.

Məlumat üçün bildirək ki, Azərbaycan Respublikası Prezidentinin “Dövlət nəzarəti sisteminin təkmilləşdirilməsi və sahibkarlığın inkişafı sahəsində süni maneələrin aradan qaldırılması haqqında” 1999-cu il 7 yanvar tarixli Fərmanının 1, 4, 8, 14 və sair bəndlərində müvafiq dövlət qurumlarına və vəzifəli şəxslərə iş adamlarının iqtisadi fəaliyyətinə müdaxilə qadağan olunur, lisenziyalaşdırma işində yol verilən vəzifədən sui-istifadə hallarına son qoyulması tələb olunur. Bundan əlavə, özəl sektorun inkişafına mane olan nəzarət-təftiş qurumlarının ləğvi, vəzifələrindən sui-istifadə edərək, ayrı-ayrı qanunları və bu Fərmanın tələblərini pozanlara qarşı ciddi tədbirlər görülməsi də nəzərdə tutulmuşdur.

“OLAYLAR” İntformasiya Agentliyi