Bakı, 20 sentyabr (AZƏRTAC). İspaniyanın Bilbao şəhərində şahmat üzrə Avropa Klubları Kuboku uğrunda yarışlar davam edir. Altıncı turda Azərbaycanın “SOCAR Azerbaijan” klubu öz rəqiblərinə böyük hesabla qalib gəlib.

AZƏRTAC xəbər verir ki, bu turda bizim şahmatçıların rəqibləri Rusiyanın “Malakhite” klubunun oyunçuları idi. “Malakhite” Azərbaycan super-klubundan bir qədər zəif olsa da, hər halda güclü komandadır. Tur 5:1 hesabı ilə “SOCAR Azerbaijan” klubunun xeyrinə başa çatıb.

Şəhriyar Məmmədyarov, Maykl Adams, Aniş Giri və Banq Hao hərəsi öz aktivinə bir xal əlavə edib, Veselin Topalov və Teymur Rəcəbov isə xalları rəqibləri ilə bölüşüblər.

Azərbaycanın ikinci klubu “Оdlar Yurdu” Rusiyanı təmsil edən “Ladya” komandası ilə sülh bağlayıb. Qrossmeyster Vasif Durarbəyli Qata Kamskidən güclü olub, Rauf Məmmədov, Ülvi Bacarani, Nicat Abbasov və Nicat Məmmədov heç-heçə oynayıb, Qədir Hüseynov isə uduzub.

Yarışların son turu ərəfəsində 100 faiz nəticə göstərmiş “SOCAR Azerbaijan” yeganə liderdir. Onun hesabında 12 komanda xalı vardır. Çexiyanın “G-Team Novy Bor” və Rusiyanın “SHSM Nashe Nasledie” klublarının şahmatçıları liderdən 1 xal, “SPB” (Rusiya), “Malakhite” (Rusiya), habelə “Obiettivo Risarcimento” (İtaliya) komandaları liderdən 3 xal geri qalırlar, “Оdlar Yurdu”nun aktivində 8 xal var.

Yarışın qalibi məsələsi praktiki olaraq həll edilib, yəni Azərbaycan klubu turnirin başa çatmasına bir tur qalmış öz qələbəsini təmin edib.

Sonuncu, yeddinci turda aşağıdakı cütlüklər qarşılaşacaqlar: “SOCAR Azerbaijan”–“SPB”, “Оdlar Yurdu”–“En Passant”.

Avropa klubları arasında qitə çempionatı İspaniyanın Bilbao şəhərində sentyabrın 14-dən 20-dək keçirilir.