İQTİSADİYYAT


SOCAR Tower “İlin ən yaxşı ofis binası” mükafatını alıb

A+ A

Bakı, 19 oktyabr, AZƏRTAC

Nyu-Yorkda “ENR” (Engineering News Record) jurnalı tərəfindən keçirilən ənənəvi Beynəlxalq Tikinti Sammitində “İlin ən yaxşı qlobal layihələri” müsabiqəsinin qaliblərinə mükafatlar təqdim olunub. SOCAR-ın yeni inzibati binası - SOCAR Tower ofis binaları nominasiyasında qalib gəlib.

SOCAR-ın mətbuat xidmətindən AZƏRTAC-a bildirilib ki, bu nominasiyada “İlin ən yaxşı layihəsi” mükafatı SOCAR‐ın sosial məsələlər üzrə vitse‐prezidenti Bədəl Bədəlov, layihənin məsul mühəndisləri Cavid Nəcəfov və Tural Ramazanova, həmçinin əsas layihəçi “Heerim Architects and Planners”, struktur üzrə layihəçi “Thornton Tomasetti” və podratçı “Tekfen İnşaat və Təchizat” şirkətlərinin nümayəndələrinə təqdim olunub.

Mərasimdə dünyanın müxtəlif yerlərində inşa olunan və digər nominasiyalarda “Ən yaxşı layihə” mükafatına layiq görülən layihələrin nümayəndələri, sifarişçi, layihəçi, idarəetmə və podratçı şirkətlərin rəhbər işçiləri iştirak ediblər.

“ENR” tikinti biznesində inkişaf etməkdə olan firmalar, yeni layihələr və vacib xəbərlərin dərc edildiyi nüfuzlu jurnaldır. Jurnalın təşkil etdiyi müsabiqənin əsas məqsədi dizayn və tikinti sahəsində həyata keçirilən ən görkəmli layihələri müəyyənləşdirmək və onların arxasında duran komandaları mükafatlandırmaqdır. Dünya miqyasında tanınmış ekspertlərdən ibarət münsiflər heyəti 15 ölkədən 23 layihə seçib, onları təhlükəsizlik, innovasiya, dizayn və inşaat üstünlükləri parametrləri üzrə təhlil edib, müxtəlifyönümlü qlobal layihə komandalarının əməkdaşlığına xüsusi diqqət yetirib. Müsabiqəyə hava limanları, körpü və tunellər, inzibati binalar, mədəniyyət, təhsil, səhiyyə, hərbi, sənaye əhəmiyyətli tikililər, idman və su qurğuları, eləcə də digər obyektlər təqdim olunub. Münsiflər heyəti tərəfindən layihələri həyata keçirən şirkətlərin çətinliklərin öhdəsindən necə gəlməsi, tikililərin yerli ictimaiyyət və ya tikinti sənayesi üçün əhəmiyyəti də nəzərə alınıb.

Xatırladaq ki, ötənilki sammitdə Bakı Olimpiya Stadionu “Ən yaxşı idman layihəsi” nominasiyasının qalibi olub. Builki qaliblər haqqında məlumat jurnalın 2016-cı il sentyabr sayında dərc edilib.

SOCAR-ın yeni inzibati binası - SOCAR Tower Koreya Respublikasının “Heerim Architects & Planners Co. Ltd” şirkəti tərəfindən təqdim olunan “Külək-alov” konsepsiyası əsasında tikilib. Tikinti işlərinə 2010-cu ildə başlanılıb, təxminən beş il ərzində paytaxtın ən gözəl memarlıq nümunələrindən biri ərsəyə gəlib. SOCAR Tower beynəlxalq standartlara tam cavab verir, binanın təhlükəsizlik və texniki sistemlərinin idarə edilməsi vahid mərkəzdən həyata keçirilir.

 

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.