İQTİSADİYYAT
SOCAR-da Avropa təhsil sistemi və təcrübəsi əsasında texniki hazırlıq kursları tətbiq ediləcək
Bakı, 25 may, AZƏRTAC
Azərbaycan Respublikası Dövlət Neft Şirkətinin (SOCAR) təlim, tədris və sertifikatlaşdırma idarəsində həyata keçirilən proqramlarda dünyanın qabaqcıl təlim-tədris mərkəzlərinin, xüsusən Almaniya və Böyük Britaniyanın təhsil sistemi və təcrübəsi əsasında distant təlim və texniki hazırlıq kursları tətbiq ediləcək.
SOCAR-ın mətbuat xidmətindən AZƏRTAC-a bildirilib ki, bu barədə şirkətin təlim, tədris və sertifikatlaşdırma idarəsində Norveçin Roqaland Təlim və Təhsil Mərkəzi Fondunun (RKK) layihə rəhbəri Rune Torsenin başçılıq etdiyi nümayəndə heyəti ilə keçirilən görüşdə məlumat verilib.
İdarənin rəisi Fuad Süleymanov təlim mərkəzlərinin fəaliyyəti, Perspektiv İnkişaf Planı və 2015-ci il üzrə Tədbirlər Planına uyğun olaraq kadrların hazırlanması, ixtisasartırma və ikinci peşəyə yiyələnmə, ilkin təlimatlandırma sahəsində müntəzəm təlimlərin keçirilməsi barədə qonaqlara ətraflı məlumat verib. Bu proqramlarda dünyanın qabaqcıl təlim-tədris mərkəzlərinin, xüsusən Almaniya və Böyük Britaniyanın təhsil sistemi və təcrübəsi əsasında distant təlim və texniki hazırlıq kurslarının tətbiq ediləcəyi qeyd olunub.
Roqaland Təlim və Təhsil Mərkəzi Fondunun layihə rəhbəri Rune Torsen təmsil etdiyi qurum ilə Azərbaycanın Təhsil Nazirliyi arasında ölkəmizdə peşə təhsilinin gücləndirilməsi və inkişafı üçün əməkdaşlıq haqqında Sazişin imzalandığını bildirib, gəmiqayırma və neft-qaz sənayesində bacarıqların müəyyənləşdirilməsinin vacibliyini qeyd edib.
Qobustan Regional Təlim Mərkəzində olan Norveç nümayəndə heyətinə bp, Total, Schlumberger, BOS Shelf və digər şirkətlər ilə əməkdaşlıq çərçivəsində mütərəqqi təlim metodikaları əsasında texniki işçilərin hazırlanması barədə məlumat verilib, habelə təlim mərkəzinin tam təchiz olunmuş sinif otaqları, laboratoriya və emalatxanalarda istifadə olunan simulyatorlar, nəzəri və praktiki dərslər, əyani vəsaitlər, tədris potensialı, müəllim-instruktor heyətinin bacarıqları və ixtisas göstəriciləri qonaqların nəzərinə çatdırılıb. Qonaqlar təlim mərkəzinin qaynaq sexində görülən işlər, əməyin təhlükəsizliyi rejimi, istifadə olunan avadanlıqlar və materiallar ilə tanış olublar. Dənizdə insan həyatının mühafizəsi üzrə təlim mərkəzi ilə tanışlıq zamanı ixtisaslaşdırılmış üstübağlı təlim hovuzunun mövcud imkanları və funksionallığı barədə məlumat verilib, hovuzda keçirilən praktiki məşqlər və poliqonda tədris olunan yanğına qarşı mübarizə kursu əyani surətdə nümayiş etdirilib.
Bununla yanaşı, təlim mərkəzinin qarşısında duran vəzifələrdən biri kimi, OPITO təşkilatının HUET (vertolyotla sualtı təxliyə təlimi) kursunun tələblərinə əsasən intensiv hazırlıq işlərinin aparıldığı vurğulanıb. Sonda Norveç nümayəndə heyətinin başçısı idarənin təlim, tədris və sertifikatlaşdırma idarəsinin təlim mərkəzləri ilə tanışlıq üçün yaradılmış imkana görə minnətdarlığını bildirib, bunun qarşılıqlı əməkdaşlıq və işgüzar əlaqələr üçün faydalı olacağını ifadə edib.