Bakı, 1 mart, AZƏRTAC

1 Mart - Ümumdünya Mülki Müdafiə Günü ilə əlaqədar SOCAR-ın idarə və müəssisələrində tədbirlər keçirilib.

Şirkətin mətbuat xidmətindən AZƏRTAC-a bildirilib ki, “Azərikimya” İstehsalat Birliyinin Etilen-polietilen zavodunun ərazisindəki meydançada təşkil olunmuş mülki müdafiə təlimində Mülki Müdafiə qüvvələrinin düzülüşünə baxış keçirilib. İştirakçıların istifadəsində olan qurğu və avadanlıqlar nümayiş olunub, şəxsi heyətin xidməti vəzifələri ilə bağlı bilikləri yoxlanılıb, rəy və təklifləri dinlənilib, onlara müvafiq təlimatlar verilib.

Tədbirin ikinci hissəsində Etilen-polietilen zavodunun etilen istehsalatındakı şərti texnogen qəza ilə bağlı məşq keçirilib. Şərti qəzadan sonra işçilərin təxliyəsi, dağıntıların altından insanların xilas edilməsi, eyni zamanda baş vermiş şərti yanğının yayılmasının qarşısının alınması və işçilərin maksimum mühafizə olunması məqsədi daşıyan məşq zamanı ərazidəki vəziyyət barədə məlumat toplanılıb, xilasetmə manqaları tərəfindən şərti qəza zamanı keçirilməsi zəruri olan əməliyyatlar nümayiş etdirilib. Müvafiq təhlükəsizlik təlimatlarına uyğun olaraq keçirilmiş təlimdə qarşıya qoyulmuş məqsədlərə nail olunub.

Heydər Əliyev adına Bakı dərin özüllər zavodunda da “Mülki müdafiənin fəlakətlərə qarşı mübarizədə rolu” mövzusunda maarifləndirici tədbir keçirilib. Zavodun direktoru vəzifəsini icra edən Əliağa Səfərov 1 Mart - Beynəlxalq Mülki Müdafiə Gününün yaranma tarixindən, mülki müdafiə orqanları qarşısında duran əsas vəzifələrdən, fövqəladə halların qarşısının alınması istiqamətində həyata keçirilən zəruri tədbirlərdən danışıb, mülki müdafiə tədbirlərinin əhəmiyyətindən söz açıb. Zavod ərazisində, o cümlədən inzibati binada mülki müdafiənin təşkilati əsasları, mülki müdafiə işlərinin aparılması və fəlakətlər zamanı davranış qaydalarını əks etdirən məlumat lövhələri nümayiş etdirilib.

Bildirilib ki, hər bir əməkdaş mülki müdafiə ilə bağlı biliklərini mütəmadi artırmalı, ehtimal olunan fəlakətlər zamanı mühafizə işinin üsul və qaydalarını mənimsəməlidir. Tədbirdə, həmçinin “Mülki müdafiənin fəlakətlərə qarşı mübarizədə rolu” mövzusunda mühazirə dinlənilib.

“Qaz ixrac” İdarəsində təşkil edilmiş tədbirdə əvvəlcə, mülki müdafiə üzrə fərdi mühafizə vasitələrini, dozimetrik nəzarət cihazlarını, xəbərdaredici siqnalları, mülki müdafiə haqqında məlumatları əks etdirən sərgiyə baxış keçirilib. İdarənin rəisi Qağaməli Seyfullayev mövzu ilə bağlı ətraflı çıxış edib, görülmüş işlərdən, əldə olunmuş nailiyyətlərdən söz açıb. Bildirilib ki, idarədə 3 dəfə obyekt məşqi, 4 dəfə rəhbər heyətin məşqi və 8 dəfə mülki müdafiə qüvvələrinin xəbərdarlıq-toplanış məşqli, Magistral Qaz Kəmərləri sahələrində 28 dəfə rəhbər heyətin məşqi və 56 dəfə Mülki Müdafiə qüvvələrinin şəxsi heyəti ilə xəbərdarlıq-toplanış məşqi keçirilib, bütün bu tədbirlər Fövqəladə Hallar Nazirliyi tərəfindən yüksək qiymətləndirilib. Tədbirdə videoçarxlar nümayiş etdirilib, bu sahədə maarifləndirmə və təbliğat işinin gələcəkdə daha da gücləndirilməsinin əhəmiyyəti vurğulanıb.

Qaz Emalı Zavodunda Ümumdünya Mülki Müdafiə Günü ilə əlaqədar keçirilmiş iclasda fövqəladə vəziyyəti yaradan səbəblərin aradan qaldırılması, mülki müdafiə üzrə xəbərdarlıq və toplanış məşqləri barədə ətraflı məlumat verilib, mülki müdafiə avadanlıqlarının iş prinsipləri nümayiş etdirilib. İştirakçılar tədbirin təşkilindən razı qalıblar.