CƏMİYYƏT
SOCAR-ın idarə və müəssisələrində iməciliklər davam etdirilir
Bakı, 3 may, AZƏRTAC
SOCAR-ın idarə və müəssisələrində iməciliklər davam etdirilir.
Şirkətin mətbuat xidmətindən AZƏRTAC-a bildirilib ki, SOCAR-ın həyata keçirdiyi ekoloji siyasətə uyğun olaraq genişmiqyaslı yaz iməcilikləri davam edir. Şirkətin idarə və müəssislərində mart ayından başlamış iməciliklərdə ərazilər istehsalat tullantılarından təmizlənir, abadlıq, yaşıllaşdırma işləri görülür.
Ekologiya İdarəsi tərəfindən yaşıllaşdırma işləri üçün ağac-kol tədarükü, eyni zamanda ağac və gül kollarının əkilməsi işləri fəal surətdə davam etdirilib. İdarənin Gigiyena və Epidemiologiya Mərkəzinin əməkdaşlarının iştirakı ilə keçirilmiş növbəti iməcilik zamanı 100 ədəd mövsümi gül kolu və 50 ədəd sərv ağacı əkilib. Əkilmiş ağac və gül kollarına aqrotexniki qulluq göstərilib, sahə alaq otlarından təmizlənib.
Heydər Əliyev adına Bakı Dərin Özüllər Zavodunda keçirilən növbəti yaz iməciliyində 1400 kvadratmetr sahəyə 200 kiloqram qazon toxumu səpilib. Həmin gün iməcilikdə 5000 ağaca qulluq edilib. Ümumilikdə aprel ayı ərzində keçirilən iməciliklərdə zavodun yaşıllıq sahələrinə 300 ədəd Eldar şamı, 200 ədəd həmişəyaşıl sərv ağacı, 500 ədəd zeytun ağacı əkilib, 7200 kvadratmetr sahəyə 500 kiloqram qazon toxumu səpilib. Paralel olaraq 50000 ağacın dibi bellənib, gövdələri əhəng məhlulu ilə ağardılıb, aqrotexniki tədbirlər görülüb.