Bakı, 29 aprel, AZƏRTAC

SOCAR-ın Təlim, Tədris və Sertifikatlaşdırma İdarəsinə (TTSİ) Fransanın Bureau Veritas təşkilatı, Böyük Britaniyanın Sağlamlıq və Əməyin Təhlükəsizliyi İnstitutu və Dəniz Neft-Qaz Sənayesində Təlim Təşkilatı tərəfindən sertifikatlar təqdim edilib.

Şirkətin mətbuat xidmətindən AZƏRTAC-a bildirilib ki, bu münasibətlə keçirilən tədbirdə SOCAR-ın prezidenti Rövnəq Abdullayev, Böyük Britaniyanın Azərbaycandakı səfiri xanım Kerol Krofts, Fransanın Azərbaycandakı səfiri xanım Orelia Buşez, Dövlət Dəniz Administrasiyasının rəhbəri Qüdrət Qurbanov, fövqəladə hallar nazirinin müavini Etibar Mirzəyev, SOCAR rəhbərliyinin nümayəndələri iştirak ediblər.

R.Abdullayev bu əlamətdar hadisə münasibətilə TTSİ-nin mütəxəssislərini təbrik edib, ölkə Prezidentinin tapşırığına uyğun olaraq, şirkətdə neft kapitalının insan kapitalına çevrilməsi istiqamətində mühüm addımlar atıldığını bildirib, sertifikatların alınmasını SOCAR-ın beynəlxalq şirkətə çevrilməsi istiqamətində atılmış addımlardan biri olduğunu vurğulayıb.

SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov beynəlxalq inspeksiya və akkreditasiya qurumları ilə əməkdaşlıq və sertifikatların əldə olunması istiqamətində görülən işlər haqqında məruzə edib. Bildirilib ki, əsası Azərbaycan xalqının ümummilli lideri Heydər Əliyev tərəfindən qoyulan və Prezident İlham Əliyevin rəhbərliyi altında uğurla davam etdirilən enerji strategiyası çərçivəsində SOCAR davamlı olaraq inkişaf edir, müasirləşir və dünyaya inteqrasiya olunur. İki gün öncə ölkə başçısı dünya neft sənayesinin əsası qoyulmuş Bibiheybətdəki ilk neft quyusunun bərpadan sonrakı vəziyyəti ilə, bu gün isə, Sumqayıtda inşa olunan, yaxın gələcəkdə iqtisadiyyatımız üçün əvəzsiz rol oynayacaq Karbamid zavodunda tikinti-quraşdırma işlərinin gedişi ilə tanış olub. Prezidentin tariximizə və gələcəyimizə olan ali diqqətinin şirkət əməkçilərini daha böyük uğurlar qazanmağa ruhlandırdığını söyləyən natiq keçirilən tədbirin əlamətdar bir günə Ümumdünya Əməyin Mühafizəsi gününə təsadüf etdiyini və tədbirin qayəsinin bu əlamətdar günlə, neftçilərimizin əməyinin mühafizəsi ilə bilavasitə əlaqədar olduğunu bildirib.

Qeyd olunub ki, TTSİ yarandığı gündən onun qarşısında beynəlxalq təşkilatlarla, dünyanın bu sahədə nüfuz qazanmış şirkətləri ilə əməkdaşlığın qurulması və dərinləşdirilməsi vəzifəsi qoyulub. İdarə bu işə xüsusi diqqət yetirərək, beynəlxalq əlaqələrini ilbəil genişləndirir. Avropa Təlim Fondu və Almaniya Beynəlxalq Əməkdaşlıq Cəmiyyəti ilə etibarlı tərəfdaşlıq qurulub. Keçən il isə idarənin təşkil etdiyi qeyri-formal təlimlər və spesifik hazırlıq kursları beynəlxalq inspeksiya və akkreditasiya qurumları olan Fransanın Bureau Veritas təşkilatı, Böyük Britaniyanın Sağlamlıq və Əməyin Təhlükəsizliyi İnstitutu və Dəniz Neft-Qaz Sənayesində Təlim Təşkilatı tərəfindən akkreditasiya edilmiş və müvafiq sertifikatlara layiq görülüb. SOCAR-ın Təlim, Tədris və Sertifikatlaşdırma İdarəsi bu nüfuzlu beynəlxalq təşkilatların tələblərinə uyğun şəkildə çox mühüm kursları müstəqil olaraq keçirmək və məzunları sertifikatlaşdırmaq hüququ əldə edib.

Böyük Britaniyanın Azərbaycandakı səfiri xanım Kerol Krofts, Fransanın Azərbaycandakı səfiri xanım Orelia Buşez, Dövlət Dəniz Administrasiyasının rəhbəri Qüdrət Qurbanov, “Azərikimya” İB-nin Müşahidə Şurasının sədri Muxtar Babayev çıxış edərək TTSİ-nin kollektivini bu münasibətlə təbrik edib, SOCAR-ın təlim-tədris mərkəzlərində Azərbaycanda fəaliyyət göstərən xarici neft şirkətləri, habelə digər sənaye müəssisələri üçün də yüksək ixtisaslı kadrlar hazırlandığını söyləyib, mərkəzlərdə təhsil və təlim üçün yaradılmış şəraitdən razılıqlarını bildiriblər.

Sertifikatlar təqdim olunduqdan sonra SOCAR-ın Təlim, Tədris və Sertifikatlaşdırma İdarəsinin rəisi Fuad Süleymanov göstərilən diqqət və qayğıya görə şirkət rəhbərliyinə təşəkkürünü bildirib, idarənin bundan sonra da SOCAR-ın strateji inkişafını təmin edəcək yüksək ixtisaslı kadrlar hazırlanması üçün layiqincə çalışacağına tədbir iştirakçılarını əmin edib.

Tədbirin sonunda TTSİ-nin Sumqayıt Təlim Mərkəzində kurs keçmiş və ən yüksək bal toplamış 11 məzuna sertifikatlar təqdim olunub.