İQTİSADİYYAT
SOCAR istiqrazları üzrə ilk faizlər ödənilib
Bakı, 17 yanvar, Nihad Budaqov, AZƏRTAC
SOCAR-ın dollarla buraxdığı SOCAR istiqrazları üzrə ilk faizlərin ödənişi yanvarın 17-də həyata keçirilib.
AZƏRTAC xəbər verir ki, bununla bağlı SOCAR-da keçirilən mətbuat konfransında “SOCAR Capital” şirkətinin Müşahidə Şurasının sədri, SOCAR-ın iqtisadi məsələlər üzrə vitse-prezidenti Süleyman Qasımov SOCAR istiqrazlarının buraxılmasının və təkrar bazarda tədavülünün SOCAR-ın maliyyə mənbələrini şaxələndirməklə yanaşı, ölkə vətəndaşlarının vəsaitlərinin daha səmərəli istifadəsinə və Azərbaycan qiymətli kağızlar bazarının inkişafına ciddi dəstək olduğunu deyib.
“SOCAR istiqrazlarının buraxılması ilə əhalinin yığımlarının iqtisadi proseslərə cəlb olunması və istifadəsiz vəsaitlərin öz sahiblərinə fayda gətirməsi üçün əlverişli imkan yaradılıb. Nəticədə, istiqrazlara yatırılan vəsaitlər bu gün öz sahiblərinə ilk gəlirlərini gətirib”, - deyə S.Qasımov əlavə edib.
Bildirilib ki, yanvarın 17-də həyata keçirilən faiz ödənişi çərçivəsində SOCAR istiqrazlarının sahiblərinə ümumilikdə 1 milyon 250 min ABŞ dolları həcmində faiz ödənilib. Bu vəsait istiqraz sahiblərinin bank hesablarına köçürülüb və vətəndaşlar pulları istədikləri kimi istifadə edə bilərlər.
Qeyd edilib ki, SOCAR istiqrazlarının buraxılmasından əldə edilən vəsaitlər şirkətin maliyyə imkanlarının şaxələndirilməsi, xaricə faiz ödənişlərinin azaldılması və faizlərin xaricə deyil, ölkə daxilinə, ölkə vətəndaşlarına ödənilməsi üçün istifadə edilib.
SOCAR-ın qiymətli kağızlarının emissiyası üzrə baş məsləhətçisi və “SOCAR Capital” şirkətinin Məsləhət Şurasının üzvü Əli Ağaoğlu deyib ki, hazırda SOCAR istiqrazları üzrə investorlara təklif oluna şərtlər nəinki Azərbaycanda, hətta regionda ən əlverişli şərtlər sayıla bilər.
“SOCAR bəyan edib ki, istiqraz sahiblərindən bu kağızları istənilən vaxt nominal qiymətə, yəni 1000 dollara almağa hazırdır. Bu şərtlər investorlar üçün 100 faizlik zəmanət deməkdir. İndiyədək heç bir istiqraz buraxılışında belə bir zəmanət tətbiq olunmayıb”,- deyə Ə.Ağaoğlu bildirib.
S.Qasımov qeyd edib ki, məhz belə bir əlverişli şərtlərinə görə, SOCAR istiqrazlarının ilkin buraxılışı zamanı investorlar tərəfindən 200 milyon dollardan çox tələb qeydə alınıb. Bu da istiqrazların ümumi həcmindən iki dəfə çoxdur.
“SOCAR istiqrazları təkrar bazarda da həddən artıq aktiv olub. Bu kağızların dövriyyəyə buraxılmasından ötən 3 ay ərzində təkrar bazarda istiqrazlar üzrə 40 milyon dollara yaxın əməliyyat aparılıb. Təkrar bazarda istiqrazlara fiziki şəxslərin marağı xüsusilə böyük olub”, - deyə SOCAR-ın vitse-prezidenti əlavə edib.
Bildirib ki, təkrar bazarda istiqrazları Azərbaycan vətəndaşları ilə yanaşı, xarici vətəndaşlar da alırlar. Bu sahədə Gürcüstan, Türkiyə və Rusiya vətəndaşları daha fəaldırlar.
Qeyd olunub ki, ölkə vətəndaşları, eləcə də yerli və xarici fiziki, hüquqi şəxslər SOCAR istiqrazlarını təkrar bazardan əldə edə bilərlər. Bunun üçün onlar 1 və 5 saylı “ASAN xidmət” mərkəzlərinə, eləcə də *19 99 qaynar xəttə müraciət etməlidirlər.
Nominal məbləği 1000 dollar olan və illik gəlirliliyi 5 faiz olan SOCAR istiqrazları üzrə faizlər ildə 4 dəfə ödəniləcək. Hər bir istiqraz üzrə faiz ödənişi 12,5 dollardır. Həcmi 100 milyon dollar olan SOCAR istiqrazlarının sahiblərinə yanvar ayından başlayaraq hər dəfə 1 milyon 250 min dollar olmaqla, il ərzində ümumilikdə 5 milyon dollar faiz ödəniləcək. Bu il növbəti faiz ödənişləri aprelin 17-si, iyulun 17-si və oktyabrın 17-si tarixlərində olacaq.