İQTİSADİYYAT


SOCAR istiqrazlarının Bakı Fond Birjasında təkrar bazarına start verilib

A+ A

Bakı, 18 oktyabr, AZƏRTAC

Oktyabrın 18-dən Azərbaycan Respublikası Dövlət Neft Şirkətinin (SOCAR) istiqrazlarının (ISIN nömrəsi AZ2001019895) Bakı Fond Birjasında (BFB) təkrar bazarına start verilir.

BFB-dən AZƏRTAC-a bildiriblər ki, SOCAR istiqrazlarının anderrayteri olmuş “PSG-Kapital İnvestisiya Şirkəti” həm də istiqrazların təkrar bazarda SOCAR tərəfindən təyin olunmuş market-meykeri olmaqla, onların BFB-də təkrar bazar likvidliyini təmin edəcək.

“PSG Kapital İnvestisiya Şirkəti” QSC istiqrazlar üzrə BFB-də gündəlik olaraq alış-satış sifarişləri (kotirovkaları) təqdim edəcək.

SOCAR birja üzvü olan 2PSG Kapital İnvestisiya Şirkəti” QSC vasitəsilə istiqrazlar üzrə təkrar bazarda gündəlik olaraq alış və satış öhdəliyi götürüb. İnvestorlar tərəfindən təkrar bazarda satışa çıxarılan istiqrazlar tam həcmdə BFB-nin ticarət reqlamentinə uyğun olaraq birja üzvünün təqdim etdiyi kotirovkalar vasitəsilə SOCAR tərəfindən təmin olunacaq.

SOCAR istiqrazlarını birjada təkrar bazardan almaq və ya satmaq üçün BFB-nin üzvü olan investisiya şirkətlərinə, eyni zamanda “ASAN xidmət”in 1 və 5 saylı mərkəzlərində yerləşən birja üzvü nümayəndələrinə müraciət oluna bilər.

Qeyd edək ki, Azərbaycan Respublikası Dövlət Neft Şirkətinin (SOCAR) istiqrazlarının (ISIN nömrəsi AZ2001019895) BFB-də yerləşdirilməsi oktyabrın 14-də həyata keçirilib. İstiqrazlar nominal qiymətlə 100 000 000 ABŞ dolları olmaqla tam həcmdə yerləşdirilib.

SOCAR istiqrazlarına, ümumilikdə 203 milyon 495 min ABŞ dolları həcmində abunə sifarişi toplanıb. Abunə yazılışı müddəti ərzində bu vəsaitlər Milli Depozit Mərkəzinin (MDM) Mərkəzi Bankdakı Klirinq Hesabında toplanıb.

Beləliklə, tələb təklifi 2 dəfədən artıq üstələdiyi üçün yerləşdirilmə zamanı emissiya prospektində qeyd olunan qaydada bölüşdürülmə aparılıb. Bölüşdürülmə zamanı fiziki şəxslərin abunə sifarişlərinə üstünlük verilib.

Azərbaycan Respublikasının Maliyyə Bazarlarına Nəzarət Palatası istiqrazların yerləşdirilməsinin yekunlarını təsdiq edib.

Oktyabrın 17-də istiqrazlar üzrə hesablaşmalar MDM tərəfindən tamamlanıb. İstiqrazlar üzrə faizlərin (kupon məbləğinin) hesablanması oktyabrın 17-dən etibarən başlayıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.