Sabirabad, 25 aprel, Mahir Babayev, AZƏRTAC

Aprelin 25-də Sabirabad şəhərindəki mədəniyyət evində Azərbaycan Kənd Bələdiyyələrinin Milli Assosiasiyasının (AKBMA) ümumi yığıncağı keçirilib.

AZƏRTAC xəbər verir ki, toplantıda Azərbaycan Respublikası Prezidenti Administrasiyasının, Milli Məclisin, Ədliyyə Nazirliyinin, şəhər, qəsəbə və kənd bələdiyyələrinin milli assosiasiyalarının, qeyri-hökumət təşkilatlarının nümayəndələri iştirak ediblər.

Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.

Yığıncaqda AKBMA-nın sədri Əli Mehdiyevin illik hesabat məruzəsi dinlənilib.

Qeyd olunub ki, ölkədə dövlət quruculuğu siyasətinin uğurla davam etdirilməsi yerli özünüidarəetmə orqanlarının ictimai-siyasi həyata daha yaxından inteqrasiyasına səbəb olub, bələdiyyələrin maliyyə, iqtisadi və kadr potensialının təkmilləşdirilməsinə xidmət edən qanunların qəbulu onların inkişafı üçün möhkəm zəmin yaradıb. Ötən ilin dekabr ayında şəffaf və demokratik şəraitdə keçirilmiş bələdiyyə seçkiləri nəticəsində bələdiyyə üzvlərinin keyfiyyət tərkibinin gücləndirilməsi yerli özünüidarəetmə institutunun daha da möhkəmlənməsinə xidmət edib.

Milli Məclisin regional məsələlər komitəsinin üzvü Rüstəm Xəlilov, Prezident Administrasiyasının regional idarəetmə və yerli özünüidarəetmə orqanları ilə iş şöbəsinin sektor müdiri Kamran Bayramov tədbirdə çıxış edərək bələdiyyələrlə bağlı qanunvericilikdən, bələdiyyələrin fəaliyyətinin əlaqələndirilməsi, yerli özünüidarəetmənin inkişafı, vətəndaş cəmiyyətinin qurulması zamanı demokratik prinsiplərin tətbiqində bələdiyyələrin rolunun artırılması məsələlərindən danışıb, tövsiyələrini bildiriblər.

Yığıncaqda çıxış edən Ədliyyə Nazirliyinin bələdiyyələrlə iş mərkəzinin rəis müvani Fazil Məmmədov və digər bələdiyyə sədrləri görülən işlər, həyata keçirilən layihələr barədə məlumat verib, özünüidarəetmə orqanlarının uğurlu fəaliyyəti ilə əlaqədar bir sıra təkliflər irəli sürüblər.

Toplantıda bələdiyyələrin iqtisadi və maliyyə potensialının gücləndirilməsi, vergitutma obyektlərinin və vergi ödəyicilərinin uçotunun aparılması işinin təşkilində bələdiyyələrə kömək göstərilməsi məqsədilə “Bələdiyyələrdə vergitutma obyektlərinin və vergi ödəyicilərinin uçotu proqramı”nın təqdimatı keçirilib.

Hesabat yığıncağında nəzarət təftiş komissiyasının hesabatı dinlənilib, 2015-ci ilin büdcəsi təsdiq edilib və təşkilati məsələlərə baxılıb.