REGİONLAR
Sabirabadda əsas kapitala 23 milyon 543 min investisiya yönəldilib
Sabirabad, 27 iyul, Mahir Babayev, AZƏRTAC
Bu ilin birinci rübündə Sabirabadda 8 milyon 123 min manatlıq sənaye məhsulu istehsal edilib. Əhaliyə 23 milyon 976 min manat pullu xidmət, 259 min manat poçt, rabitə və 229 min manat həcmində nəqliyyat xidmətləri göstərilib. Əsas kapitala yönəldilən investisiyaların həcmi 23 milyon 543 min manat olub ki, bu da ötən ilin eyni dövrü ilə müqayisədə 3 milyon 312 min manat çoxdur. Pərakəndə ticarət dövriyyəsi 113 milyon 63 min manat təşkil edib.
AZƏRTAC xəbər verir ki, bu barədə Sabirabadda 2017-ci ilin ikinci rübünün yekunları və qarşıda duran vəzifələrə həsr olunan hesabat yığıncağında rayon icra hakimiyyətinin başçısı Nazim İsmayılov məlumat verib.
Bildirilib ki, hesabat dövründə rayonda geniş tikinti-quruculuq, abadlıq işləri görülüb. Prezidentin müvafiq Sərəncamı ilə ayrılan vəsait hesabına şəhərdə 10 beşmərtəbəli, 9 ikimərtəbəli yaşayış binalarında cari təmir aparılır. Beton zavod adlanan qəsəbədə 4 ikimərtəbəli və 6 birmərtəbəli yataqxana binaları təmir edilib, Heydər Əliyev prospektində yerləşən beşmərtəbəli yaşayış binasının həyətində istirahət parkı salınıb. Rayon icra hakimiyyətinin inzibati binası və Gənclər Mərkəzi əsaslı təmir olunub. Heydər Əliyev prospektində yerləşən Bayraq Meydanı ərazisində Bayraq muzeyinin tikintisi davam etdirilib.
Qeyd olunub ki, Nizami kəndi ərazisində ildə 200 milyon ədəd yumurta, 1000 ton quş əti istehsal edəcək və 300 nəfərin daimi iş yeri ilə təmin olunacağı quşçuluq kompleksi tikilir. Dövlətimizin başçısının tapşırığına əsasən rayonun Moranlı, Sarxanbəyli, Bala Həşimxanlı və Əliləmbəyli kəndlərinin əkin sahələrinin su təminatını yaxşılaşdırılması üçün mənbəyi Kür çayından olmaqla uzunluğu 27 kilometr olan kanalın çəkilişinə başlanılıb. Birinci mərhələdə kanalın 7,8 kilometrlik hissəsi istifadəyə verilib, kanalın qalan 19,2 kilometrlik hissəsinin tikintisinin başa çatdırılması üçün tədbirlər görülür. Bu layihə 11 min 498 hektar sahənin su təchizatının yaxşılaşdırılmasına imkan yaradacaq.
Ötən müddətdə rayonda kəndarası yolların tikintisində də xeyli iş görülüb. Belə ki, 10 yaşayış məntəqəsini birləşdirən, uzunluğu 43 kilometr olan Suqovuşan-Məmişlər-Qaralar-Qəfərli-Əhmədabad-Nərimankənd-Həşimxanlı avtomobil yolunun tikintisi başa çatdırılıb. Həmçinin 15 yaşayış məntəqəsini birləşdirən, uzunluğu 60 kilometr olan Qalağayın–Osmanlı-Çöl Beşdəli-Zalqarağac-Çöl Ağaməmmədli-Azadkənd-Muğan Gəncəli avtomobil yolunun tikintisinə Prezidentin Sərəncamı ilə 14 milyon 400 min manat vəsait ayrılıb və yolun inşasına başlanılıb.
Məruzədə bildirilib ki, təhsil və məktəbəqədər tərbiyə müəssisələrinin maddi-texniki bazasının möhkəmləndirilməsi istiqamətində də bir sıra tədbirlər reallaşdırılıb. 432 şagird yerlik Moranlı kənd tam orta məktəbi üçün binanın tikintisi başa çatdırılıb, 360 şagird yerlik Yaxa Dəllək kənd tam orta məktəbinin binasının tikintisi və 1176 şagird yerlik Qaratəpə kənd tam orta məktəbinin binasında əsaslı təmir işləri davam etdirilir. Qəfərli kəndi ərazisində 40 şagird yerlik modul tipli ibtidai məktəbin quraşdırılması yekunlaşıb. Surra, Qaralar kənd tam, Kürkəndi kənd ümumi orta və şahmat məktəblərində cari təmir işləri aparılıb.
Aqrar sahədə də uğurlu nəticələr qazanılıb. Hesabat dövründə rayonda 15055 hektar pambıq, 3302 hektar tərəvəz, 3181 hektar bostan, 1338 hektar kartof, 4274 hektar təzə yonca və digər əkinlər aparılıb. Bu müddətdə 11645 ton kartof, 17418 ton tərəvəz, 10714 ton bostan, 867 ton meyvə istehsal olunub. Ötən ilin müvafiq dövrü ilə müqayisədə kartof istehsalı 454 ton, tərəvəz 319 ton, bostan məhsulları 283 ton, meyvə isə 69 ton çox olub.
Vurğulanıb ki, 2016-cı ildə cari ilin məhsulu üçün rayonda 24620 hektar sahədə taxıl əkilib. Bunun da 14206 hektarı buğda, 10414 hektarı arpa olub. Ötən illə müqayisədə taxıl əkini sahəsi 258 hektar artıb. Rayonda taxıl biçini qısa müddətdə başa çatdırılıb və 95720 ton taxıl istehsal olunub. Hər hektarın məhsuldarlığı 38,9 sentner təşkil edib.
Ötən müddətdə rayonda 271 yeni müəssisə və təşkilat yaradılıb, 2602-si daimi olmaqla, 2657 iş yeri açılıb.
Yığıncaqda cari ildə görüləcək işlər müəyyənləşdirilib, aidiyyəti qurumlara müvafiq tapşırıqlar verilib.