MƏDƏNİYYƏT
“Şahdağın hədiyyəsi” adlı “Açıq qapı” günü maraqlı məqamlarla yadda qalıb
Bakı, 22 avqust, AZƏRTAC
Mədəniyyət və Turizm Nazirliyinin tabeliyində olan “Şahdağ” Turizm Mərkəzində təşkil olunan “Şahdağın hədiyyəsi” adlı “Açıq qapı” günü maraqlı məqamlarla yadda qalıb.
AZƏRTAC xəbər verir ki, çoxsaylı xidmətlərdən yararlanmaq imkanı qazanaraq, müxtəlif yay əyləncələrindən istifadə etmək, canlı musiqiyə qulaq asmaq, uşaqlar üçün animatorların şousunu izləmək kimi xidmətlərin təklif olunduğu tədbirdə əsas məqsəd mərkəzə üz tutan turistlərin əyləncəli və maraqlı bir gün keçirməsinə nail olmaq, eyni zamanda azyaşlı qonaqların zövqünü oxşamaqdır.
Həmin gün mərkəzə üz tutanlar minimal qiymət ödəməklə çoxsaylı xidmətlərdən yararlanmaq imkanı qazanıb, ziplayn, trotinnet, dağ velosipedi, bob kart, seqvey kimi maraqlı yay əyləncələrindən üçünü eyni zamanda sınaqdan keçirmək şansı əldə ediblər.
Bundan əlavə, ailəvi istirahət etmək istəyənlər üçün həm böyüklərin, həm də uşaqların zövqünü oxşayan əyləncəli proqram təşkil edilib. Azyaşlı qonaqların marağına səbəb olan animatorların müşayiəti ilə təşkil olunan xüsusi şou-proqram onların xatirində uzun müddət qalacaq.
Həmçinin açıq havada, dağların ətəyində canlı musiqi ilə yanaşı DJ-lərin performansı yaşından asılı olmayaraq hər kəsin zövqünü oxşayıb. “Şahdağın hədiyyəsi” adlı xüsusi əyləncəli konsert proqramının sonunda möhtəşəm atəşfəşanlıq olub.
Qeyd edək ki, keçən ilin avqust ayında təşkil olunan eyniadlı tədbir qonaqların xeyli marağına və məmnunluğuna səbəb olduğundan “Şahdağın hədiyyəsi” adlı bu cür “Açıq qapı” gününün ənənəvi şəkildə hər il keçirilməsi nəzərdə tutulur.
Məlumat üçün bildirək ki, Mədəniyyət və Turizm Nazirliyinin tabeliyində olan “Şahdağ” Turizm Mərkəzində yay mövsümü iyun ayından sentyabr ayına kimi davam edir. Bu il iyun ayından bu günədək “Şahdağ” Turizm Mərkəzinə gələn turistlərin sayı 25 mindən çox olub.