İQTİSADİYYAT


Sahibkar: “Şərab və konyak məhsullarının istehsalını və ixracını ən azı 5 dəfə artırmaq üçün var gücümüzlə çalışacayıq”

Bakı, 21 aprel, Lacın Sultanova, AZƏRTAC

Prezident İlham Əliyevin Yevlaxda qeyri-neft ixracatçılarının respublika müşavirəsindəki çıxışı biz sahibkarlar üçün, xüsusilə də ixracatçı sahibkarlar üçün yeni bir vüsət, yeni bir təkan oldu. Bunu AZƏRTAC-a müsahibəsində “Tovuz-Baltik LTD” şirkətinin baş direktoru Naiq Məmmədhəsənov deyib.

Ölkə Prezidentinin ixracatla bağlı narahatlığı, onun biz sahibkarlara yaratdığı münbit şərait, istər daxildə, istərsə xaricdə ixracla bağlı apardığı uğurlu siyasət onun dövlətimizə, xalqımıza iş adamlarına göstərdiyi böyük diqqətinin göstəricisidir.

Prezident İlham Əliyev hələ 2012-ci ildə üzümçülüyün, şərabçılığın inkişafı ilə bağlı Fərman imzalamışdı. Həmin Fərmanla 2012-ci ildən 2020-ci ilə qədər üzümçülüyün, şərabçılığın inkişaf etdirilməsi ilə bağlı Dövlət Proqramı qəbul olunmuşdu. Lakin hələ bütün işlər görülməyib. Yevlaxda keçirilən müşavirədə də Prezidentin öz çıxışında şərabçılığın inkişafını qeyri-neft sektorunun ən gəlirli sahələrindən biri kimi qeyd edib.

“Neftin qiymətinin aşağı düşməsi bizi narahat etməməlidir. Çünki Azərbaycanın digər təbii sərvətləri var, ölkəmizdə üzümçülüyün inkişafı üçün böyük potensial var, xüsusən də Qərb bölgəsində. Biz Prezidentimizin müşavirədəki çıxışında “şərab və konyak məhsullarının istehsalını və ixracını ən azı 5 dəfə artıra bilərik” ifadəsini alqışlayırıq və buna nail olmaq üçün var gücümüzlə çalışacayıq”, - deyən sahibkar bu işdə mövcud olan problemlərdən birinin şərabçılıqda istifadə olunan taranın xarıcdən gətirildiyini göstərib.

Rəhbərlik etdiyi şirkətin fəaliyyətindən danışan Naiq Məmmədhəsənov bildirib ki, “Qeyri-neft məhsullarının ixracının təşviqi ilə bağlı əlavə tədbirlər haqqında” Azərbaycan Respublikası Prezidentinin 2016-cı il 1 mart tarixli Fərmanı, “Made in Azerbaijan” missiyası ilə bağlı 5 oktyabr 2016-cı il tarixli Fərmanı “Tovuz-Baltik LTD” şirkətində çox böyük stimul yaradıb, şirkətin işinə çox böyük təkan verib. “Biz xarici ölkələrlə olan bütün köhnə əlaqələrimizi möhkəmləndirdik. Hətta bu gün Fransa kimi böyük iqtisadi potensiala malik ölkədə, Konyak şəhərində “Tovuz” adlı müəssisə yaratmışıq. Azərbaycandan nar çaxırı, nar şirəsi və nardan alınan digər məhsullar Konyak şəhərində qablaşdırılaraq “Azərbaycan Qafqazın mirvarisidir” adı altında Hollandiyaya, Serbiyaya, Litvaya, Latviyaya, Qazaxıstana, Ukraynaya və digər Avropa ətrafı ölkələrə göndərilir”, - deyə Naiq Məmmədhəsənov bildirib.

Azərbaycanın xarici ölkələrdə ticarət nümayəndəliklərinin, ticarət evlərinin yaradılmasını alqışlayan iş adamı bildirib ki, şirkət Ukraynanın Çerkassk vilayətindəki “Tovuz Vino” adlı müəssisənin fəaliyyətini dayandırmışdı. “Lakin həmin fərmanlardan sonra biz müəssisənin fəaliyyətini bərpa etdik”, - deyən Naiq Məmmədhəsənov bildirib ki, Azərbaycanın Ukrayna ilə qardaşlıq münasibətlərinin bu qədər yüksək səviyyədə olması, ölkə rəhbərinin sahibkarlara göstərdiyi qayğı, şirkətin fəaliyyətinə, xüsusən də ixracla bağlı olan fəaliyyətinə çox böyük təkandır.

Yevlaxda qeyri-neft ixracatçılarının respublika müşavirəsində iştirak etdiyini söyləyən Naiq Məmmədhəsənov bildirib ki, Prezidentin çıxışından sonra nazirlərin, komitə sədrlərinin sahibkarlarla keçirdikləri görüşdə mövcud problemlərdən, qarşıya çıxan çətinliklərdən danışılıb, onların aradan qaldırılması yolları araşdırılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.