İQTİSADİYYAT
Sahibkarlar Konfederasiyasının üzvləri hərrac prosesini izləyiblər
Bakı, 28 fevral, AZƏRTAC
Əmlak Məsələləri Dövlət Komitəsi (ƏMDK) tərəfindən fevralın 28-də keçirilən növbəti hərraca Azərbaycan Sahibkarlar (İşəgötürənlər) Təşkilatları Milli Konfederasiyasının üzvü olan 20-dən artıq sahibkar izləyici qismində qatılıb.
ƏMDK-dan AZƏRTAC-a bildirilib ki, komitə ilə Sahibkarlar Konfederasiyası arasında imzalanmış memoranduma uyğun olaraq təşkil edilmiş tədbirin məqsədi sahibkarlara dövlət əmlakının satışının açıq və şəffaf şəkildə keçirilməsini, hərrac mexanizmlərinin maksimum sadələşdirildiyini, obyektlər haqqında məlumatların əldə edilməsi üçün daha geniş imkanların yaradıldığını, eləcə də özəlləşdirmə prosesində iştirakın səmərəli və faydalı olmasını əyani şəkildə nümayiş etdirməkdən ibarət olub.
Bunun nəticəsi olaraq, növbəti hərraclara sahibkarların daha geniş təbəqələrinin qatılması, bu yolla özəlləşdirmə prosesinin sürətləndirilməsi və ölkədə iqtisadi fəallığın nəzərəçarpacaq dərəcədə artması gözlənilir.
Komitənin sədr müavini Rafiq Cəlilov qeyd olunan məqsədləri hərrac iştirakçıları və sahibkarların diqqətinə çatdıraraq, özəlləşdirmənin yeni mərhələsinin əsas fərqləndirici xüsusiyyətinin özəlləşdirmə prosesinin innovativ texnologiyalar tətbiq etməklə əhalinin maksimum geniş təbəqələri üçün açıqlığının təmin edilməsi, bütün proseslərin açıq və şəffaf şəkildə həyata keçirilməsi, özəlləşdirmədən faydalananların sayının əhəmiyyətli dərəcədə artırılmasıdır.
Bu məqsədlə, intensiv olaraq hər həftə dövlət əmlakının özəlləşdirilməsi ilə bağlı hərraclar keçirilir, özəlləşdirilən əmlaklar haqqında tam dolğun məlumatlar əvvəlcədən ictimaiyyətə açıqlanır. İqtisadiyyatın ayrı-ayrı sahələrini əhatə edən və Bakı şəhəri ilə yanaşı, ölkənin müxtəlif regionlarında yerləşən səhmdar cəmiyyətlərin səhmləri, eləcə də kiçik dövlət müəssisələri, istifadəsiz qeyri-yaşayış sahələri özəlləşdirmə hərraclarına çıxarılır.
Sədr müavini özəlləşdirmə prosesində şəffaflığın daha da artırılması, hərraclar barədə geniş məlumatlandırma tədbirlərinin həyata keçirilməsi ilə bağlı görülən işlər haqqında sahibkarlara geniş məlumat verib. Dövlət əmlakının özəlləşdirilməsi üzrə keçirilən hərraclarda iştirakın sadəliyi və şəffaflığı, hərracların keçirilmə qaydaları və prosedurları izah edilib. Diqqətə çatdırılıb ki, hərraclar bütün texniki imkanlara malik müasir avadanlıqla təchiz edilmiş binada keçirilir və istənilən vətəndaş və ya media üzvünün iştirakına məhdudiyyət qoyulmur. Respublikanın müxtəlif şəhər və rayonlarında da hərraclar eyni qaydada təşkil edilir. Paytaxtda keçirilən hərrac zamanı onlayn əlaqə yaradılaraq böyük monitorlar vasitəsilə regionlarda baş tutan hərracları izləmək mümkündür. Hərraca çıxarılan əmlaklara dair sifarişlərin qəbulu elektron xidmət vasitəsilə də həyata keçirilir.
Sahibkarlar özəlləşdirilmək məqsədilə hərraca çıxarılan əmlaklar - kiçik müəssisə və obyektlər, səhmdar cəmiyyətlər, nəqliyyat vasitələri haqqında ətraflı məlumat alıblar. Hərraca çıxarılan əmlakların fotoşəkilləri, texniki və iqtisadi göstəriciləri, ilkin start qiyməti, 10 faiz məbləğində behin məbləğı, yerləşdiyi zona haqqında geniş informasiya Özəlləşdirmə portalında (privatization.az), komitənin rəsmi internet səhifəsində (emdk.gov.az) yerləşdirilir. Məlumatlar hər həftə mütəmadi olaraq yenilənir.
Azərbaycan Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev dövlət əmlakının özəlləşdirilməsi ilə bağlı hərracların açıq və şəffaf şəraitdə keçirilməsi, prosedurların kifayət qədər sadələşdirildiyini və hərraclarla bağlı geniş məlumatlandırma işinin aparıldığını sahibkarların diqqətinə çatdıraraq, onları özəlləşdirmə prosesində daha fəal iştirak etməyə dəvət edib.
Bundan sonra əyani olaraq fevralın 28-də hərraca çıxarılan dövlət əmlaklarının iqtisadi və texniki göstəriciləri, mövcud durumunu əks etdirən görüntüləri, peyk vasitəsilə çəkilmiş xəritələri, qiyməti və s. məlumatlar nümayiş etdirilib. Bunun davamı olaraq sahibkarlar hərracın gedişatını izləyiblər.
Hərrac komissiyasının sədri hərrac prosedurları və qaydalarını, özəlləşdirilən əmlaklar haqqında təfərrüatlı məlumatları hərrac iştirakçılarına çatdırıb. Hərrac prosesində 5-i kiçik dövlət müəssisə və obyekti, 5-i isə istifadəsiz qeyri-yaşayış sahəsi olmaqla, 10 əmlak özəlləşdirilib. Özəlləşdirilən əmlakların 7-si Bakı şəhərində, 3-ü isə müvafiq olaraq respublikanın digər şəhər və rayonlarında yerləşir. Regionlarda özəlləşdirilən müəssisələrə Mingəçevirdə yerləşən 31 saylı Mebel təmiri müəssisəsi, Yardımlı və Şəkidə yerləşən qeyri-yaşayış binaları aiddir. Hərracda özəlləşdirilən müəssisələr, əsasən paytaxtın Sabunçu, Suraxanı, Nəsimi, Nərimanov, Xətai rayonlarında yerləşir. Özəlləşdirilən müəssisələr müxtəlif təyinatlı olmaqla, əsasən sənaye, xidmət, ictimai iaşə sahələrini əhatə edib.
ƏMDK tərəfindən martın 7-də keçiriləcək növbəti hərraca 17-si kiçik dövlət müəssisəsi, 21 səhmdar cəmiyyətin səhmləri, habelə 36 istifadəsiz qeyri-yaşayış sahəsi, ləğv edilmiş “Azərxalça” Elmi Yaradıcılıq İstehsalat Birliyinin regionlarda yerləşən 4 əmlakı çıxarılacaq.
Hərrac prosedurları barədə ətraflı məlumat almaq üçün 193 saylı çağrı mərkəzi və ya (012) 566-07-44 nömrəli telefonla əlaqə saxlamaq mümkündür.
Bundan əlavə, sahibkarlar üçün yarana biləcək sualların daha çevik və dolğun şəkildə cavablandırılması məqsədilə portalda “onlayn məsləhət pəncərəsi” də fəaliyyət göstərir.