REGİONLAR
Salyanda ümumxalq səsverməsi mütəşəkkil keçir
Salyan, 26 sentyabr, Mahir Babayev, AZƏRTAC
Salyanda ümumxalq səsverməsində seçicilərin siyasi iradələrini azad və sərbəst ifadə etmələri üçün bütün məntəqələrdə nümunəvi şərait yaradılıb.
AZƏRTAC xəbər verir ki, rayonda referendum seçkiləri iki dairə üzrə keçirilir. 59 saylı Salyan şəhər və 60 saylı Salyan-Neftçala seçki dairəsində 79 seçki məntəqəsi fəaliyyət göstərir.
Seçici siyahılarına 76 min 858 seçici daxil edilib. Məntəqələrin 13-də veb-kamera quraşdırılıb. Əlil seçicilərin səsvermədə rahat iştirakı üçün məntəqələrdə panduslar quraşdırılıb. Səsvermənin gedişini hər məntəqədə orta hesabla 8-10 müşahidəçi izləyir. Hər iki dairə üzrə məntəqələrdə seçicilərin iradələrini sərbəst və azad ifadə etmələri üçün bütün şərait yaradılıb.
59 saylı Salyan seçki dairəsinin nəzdində fəaliyyət göstərən 3 nömrəli seçki məntəqəsində bunların bir daha şahidi olduq.
Səhər saat 8.00-da məntəqə seçki komissiyasının sədri Aygün Abdullayeva yerli müşahidəçilərin iştirakı ilə səsvermənin başlandığını elan edib.
Səsverməyə gələn seçiciləri seçki məntəqəsinin qarşısında dayanan məntəqə seçki komissiyasının üzvü qarşılayaraq əlində tutduğu ultra-bənövşəyi rəngli fanarla seçicilərin sol baş barmağını yoxladıqdan sonra onları içəri buraxıb. Səsvermənin gedişini 8 yerli müşahidəçi izləyir.
Seçki məntəqəsində səsvermə hüququndan ilk dəfə istifadə edən gənc Elçin Babayevdən təəssüratını öyrəndik. Bildirdi ki, ilk dəfədir səsvermədə iştirak edir: “Ölkə Konstitusiyasına edilən dəyişikliklərə münasibət bildirdiyim üçün çox şadam. Bu, ölkəmizin həyatında ciddi hadisədir. Heç bir təzyiq olmadan azad şəkildə fikrimi ifadə etdim. Gələcəyə, daha güclü Azərbaycana səs verdim”.
Şəhər sakini İlhamə Süleymanova da söhbətimizə qoşuldu. O da səsvermənin gedişindən razı qaldığını deyərək, seçki məntəqəsində səsvermənin azad və demokratik şəkildə keçirilməsi üçün lazımi şərait yaradıldığını vurğuladı.
Məntəqədə bülleteni qutuya ilk atanlardan olan təqaüdçü, 82 yaşlı şəhər sakini Böyükkişi Məmmədov söhbətə qoşularaq bildirdi ki, bütün həyatım boyu keçirilən seçkilərdə iştirak edib. Həmişə də birinci səsverənlərin arasında olmuşam və bunu özümə vətəndaşlıq borcu hesab etmişəm.
Məntəqədə müşahidəçi missiyasını yerinə yetirən Arzu Hüseynova da səsvermənin böyük fəallıqla, azad və şəffaf keçirildiyini, hər hansı bir qanun pozuntusuna yol verilmədiyini bildirdi.
Məntəqə seçki komissiyasının sədri A.Abdullayevanın verdiyi məlumata görə, məntəqədə 1604 nəfərin adı seçici siyahısına daxil edilib. Onlardan 8 nəfəri ilk dəfə səs vermək hüququ qazanıb.