Şamaxıda regional konfrans: “Heydər Əliyev və Azərbaycanda din siyasəti”
Bakı, 21 noyabr, AZƏRTAC
Noyabrın 21-də Azərbaycan Respublikasının Prezidenti yanında Bilik Fondu, Dini Qurumlarla İş üzrə Dövlət Komitəsi və Şamaxı Rayon İcra Hakimiyyətinin birgə təşkilatçılığı ilə Şamaxı şəhər İncəsənət Təhsili Mərkəzində “Heydər Əliyev və Azərbaycanda din siyasəti” mövzusunda regional konfrans keçirilib. Konfrans iştirakçıları Azərbaycan xalqının ümummilli lideri Heydər Əliyevin abidəsi önünə çiçək dəstələri qoyublar.
Bilik Fondundan AZƏRTAC-a bildirilib ki, sonra iştirakçılar Şamaxı şəhər İncəsənət Təhsili Mərkəzinin direktoru Namiq Rzazadənin təqdimatı ilə “İslam Həmrəyliyi İli”nə həsr olunmuş rəsm və əl işləri sərgisinə tamaşa ediblər. Yerli rəssam Sevda Abdulrazaqova özünün taxta üzərində döymə üsulu ilə hazırladığı əsərini Bilik Fonduna hədiyyə edib.
Konfransda Şamaxı Rayon İcra Hakimiyyəti başçısının müavini - ictimai-siyasi və humanitar məsələlər şöbəsinin müdiri Gülnisə Ələkbərova "İslam Həmrəyliyi İli" çərçivəsində rayonda görülən işlərdən danışıb. O bildirib ki, Şamaxı bundan sonra da Bilik Fondu və Dini Qurumlarla İş üzrə Dövlət Komitəsinin təşkilatçılığı ilə keçirilən tədbirlərə məmnuniyyətlə ev sahibliyi edəcək.
Sonra Dini Qurumlarla İş üzrə Dövlət Komitəsinin şöbə müdiri Nahid Məmmədovun məruzəsi dinlənilib. Müstəqilliyin Azərbaycana bəxş etdiyi dəyərlərdən birinin də etiqad azadlığı olduğunu deyən mühazirəçi dini birləşdirici amil kimi dəyərləndirən Ulu Öndər Heydər Əliyevin İslam dininə dövlət səviyyəsində qayğı göstərilməsinə, həmçinin Azərbaycanda yaşayan bütün dinlərin nümayəndələrinə etiqad azadlığının verilməsinə nail olduğunu vurğulayıb. Bildirilib ki, dinimizi milli mənəvi sərvətimiz adlandıran Ulu Öndərin həyata keçirdiyi məqsədyönlü siyasət bu gün də uğurla davam etdirilir. 2017-ci ilin ölkəmizdə “İslam Həmrəyliyi İli” elan olunması da bu yolun məntiqi davamıdır.
Bilik Fondunun baş məsləhətçisi Ceyhun Musaoğlu regional konfransın təşkilinə görə yerli icra hakimiyyəti orqanına təşəkkürünü bildirərək “İslam Həmrəyliyi İli” çərçivəsində Fondun həyata keçirdiyi layihələr barədə ətraflı məlumat verib. C.Musaoğlu maarifləndirici layihələrdə Şamaxı ziyalılarının və gənclərinin fəallığını xüsusi qeyd edib, konfransda Fondun nəzdində fəaliyyət göstərən klub üzvlərinin iştirakını onların Şamaxının tarixinə, abidələrinə, yerli ədiblərin yaradıcılığına marağı kimi dəyərləndirib.
Sonda Dövlət Komitəsinin sifarişi ilə çəkilmiş "Şəhadət" filmi nümayiş olunub.
Konfrans başa çatdıqdan sonra "Gənc jurnalistlər" Klubu və "Tariximizi öyrənək və öyrədək" Gənclər Klubunun üzvləri Seyid Əzim Şirvani və Mirzə Ələkbər Sabirin məzarlarını ziyarət ediblər.
Qafqaz Müsəlmanları İdarəsinin Şamaxı və Qobustan rayonları üzrə səlahiyyətli nümayəndəsi Şamaxı Cümə məscidinin imamı Hacı Mirəhməd Mustafayev gənclərə 743-cü ildə tikilmiş məscid kompleksinin tarixi barədə ətraflı məlumat verib. Bildirib ki, 1918-ci ildə silahlı erməni-daşnak dəstələrinin törətdiyi mart qırğınları zamanı Şamaxı əhalisinin xeyli hissəsi məsciddə sığınacaq tapmağa çalışıb. Lakin azğınlaşmış erməni quldurları heç nəyə baxmadan məscid binasını insanlarla bərabər yandırmaqdan çəkinməyiblər. Heydər Əliyev Fondu tərəfindən bərpası təşəbbüsü irəli sürülmüş Şamaxı Cümə məscidində Prezident İlham Əliyevin 2009-cu il dekabrın 24-də imzaladığı müvafiq Sərəncama əsasən əsaslı təmir işləri başlanıb.
Şamaxı Tarix-Diyarşünaslıq Muzeyində qonaqları qarşılayan direktor Məleykə Kamilova onlara bölgənin tarixi haqqında ətraflı məlumat verib.
Konfrans 2017-ci ilin Azərbaycan Respublikasında “İslam Həmrəyliyi İli” elan edilməsi ilə bağlı Prezident Administrasiyası rəhbərinin 2017-ci il 10 fevral tarixli Sərəncamı ilə təsdiq edilmiş Tədbirlər Planına uyğun olaraq keçirilib.
Bölmənin digər xəbərləri
