Bakı, 29 may, AZƏRTAC

Sankt-Peterburqun müasir incəsənət muzeyi “Erarta”da 28 May - Respublika Günü münasibətilə Azərbaycanın Sankt-Peterburqdakı Baş konsulluğu tərəfindən təntənəli tədbir keçirilib.

Konsulluqdan AZƏRTAC-a bildirilib ki, tədbirdə Baş konsul Sultan Qasımov, Rusiya Federasiyasının Sankt-Peterburq Hökuməti tərəfindən Azərbaycanla Sankt-Peterburq arasındakı Hökumətlərarası Komissiyasının həmsədri Elgiz Kaçayev, Leninqrad vilayəti hökuməti adından vitse-qubernator Sergey Perminov, MDB Parlament Assambleyasının baş katibinin müavini Aydın Cəfərov, həmçinin Sankt-Peterburq Hökumətinin Xarici Əlaqələr Komitəsinin nümayəndələri, Rusiya XİN-in Sankt-Peterburqdakı nümayəndəliyinin diplomatları, Sankt-Peterburqda akkreditə olunmuş Türkiyə və İsrail dövlətinin Baş konsulları, digər Baş konsulluqların rəhbərləri və diplomatları, Sankt-Peterburqun ali təhsil mərkəzlərinin, Universitetlərin rektorları və professorları, Sankt-Peterburqun aparıcı kütləvi informasiya vasitələrinin nümayəndələri, “Komsomolskaya Pravda” Mediaholdinqinin baş direktoru Anna Upryamtseva-Alevtinskaya, “Rossiyskaya qazeta”nın baş redaktoru Anjelika Qurskaya, “Sankt-Peterburq” və “5 Kanal” televiziya kanallarının nümayəndələri, Rusiyanın tanınmış mədəniyyət və incəsənət xadimləri, tanınmış rusiyalı rəssam Mixayil Şemyakinin “Şemyakin Fondu”nun rəhbərliyi, Sankt-Peterburqdakı Azərbaycan diasporunun rəhbəri Vaqif Məmişev və diaspor təşkilatlarımızın fəalları, Rusiya Yazıçılar İttifaqının üzvü, mədəniyyətşünaslıq elmləri doktoru, professor Yuriy Pompeyev, general-leytenant Aleksandr Volox, Rusiyalı Azərbaycan Gənclər Təşkilatının (AMOR) Sankt-Peterburq üzrə regional bölməsinin fəalları və Sankt-Peterburqda təhsil alan gənclərimiz iştirak ediblər. Tədbir Azərbaycan Respublikasının və Rusiya Federasiyasının dövlət himnlərinin səsləndirilməsi ilə başlayıb. Baş konsul Sultan Qasımov 28 May - Respublika Gününün tarixi mahiyyəti barədə məlumat verərək Azərbaycan xalqının öz müstəqilliyini ümummilli lider Heydər Əliyevin ölkə rəhbərliyinə dönüşü ilə əbədiləşdirdiyini vurğulayıb. Bildirib ki, məhz ülu öndər Heydər Əliyevin uzaqgörən siyasəti və yüksək idarəçilik qabiliyyəti ilə Azərbaycan Respublikası müstəqil dövlət kimi beynəlxalq arenada tanınıb. Diplomat bu gün Azərbaycan Respublikasının Prezidenti İlham Əliyevin dövlətin və xalqın azadlığı və rifahını naminə uğurlu siyasət apardığını xüsusi ilə vurğulayıb. Baş konsul qeyd edib ki, ölkə başçısının düşünülmüş, balanslı xarici və daxili siyasəti nəticəsində Azərbaycan beynəlxalq münasibətlərin müstəqil mövqeyə malik suveren üzvüdür. Bu gün Azərbaycan üzərində üçrəngli bayrağın dalğalanmasında ümummilli lider Heydər Əliyevin və onun layiqli davamçısı Prezident İlham Əliyevin əməyi danılmazdır.

Tədbirdə çıxış edən Sankt-Peterburq Hökumətinin üzvü, Azərbaycanla Sankt-Peterburq arasında Hökumətlərarası Komissiyanın həmsədri Elgiz Kaçayev Azərbaycan Hökuməti ilə RF-nin Sankt-Peterburq Hökuməti arasındakı əlaqələrin yüksək müstəvisi barədə danışıb. O bildirib ki, Azərbaycanla Rusiya arasındakı tarixi əlaqələr dostluq və strateji tərəfdaşlıq prinsipləri üzərində qurulub. Azərbaycanla Rusiya bir çox sahədə, o cümlədən regionlararası səviyyədə uğurlu əməkdaşlıq edir. Sankt-Peterburq Hökumətinin üzvü Elgiz Kaçayev Sankt-Peterburqla Azərbaycan arasında iqtisadi və humanitar əlaqələrin möhkəmləndiyini və inkişaf etdiyini vurğulayıb. E.Kaçayev Azərbaycanla Sankt-Peterburq arasında ticari-iqtisadi əlaqələrin inkişaf etdirilməsi, turizmin inkişaf etdirilməsi, təhsil və səhiyyə, əmək miqrasiyasının tənzimlənməsi və s. sahələrdə əməkdaşlığın inkişaf etdirilməsi perspektivlərinin yüksək olduğunu qeyd edib. Gələcəkdə səmərəli əməkdaşlığın davam etdirilməsi, yeni hökumətlərarası layihələrin həyata keçirilməsi məqsədilə 2017-ci ilin aprel ayında Sankt-Peterburqda Azərbaycan Respublikası Hökuməti ilə Rusiya Federasiyasının Sankt-Peterburq Hökuməti arasında iqtisadi və humanitar əməkdaşlıq üzrə Komissiyanın ilk iclasının keçirildiyini və yekun protokolun imzalandığını bildirib. Sankt-Peterburq hökumətinin rəsmisi Azərbaycanla Sankt-Peterburq arasında səmərəli əməkdaşlığın inkişaf edəcəyinə, dostluq əlaqələrinin möhkəmlənəcəyindən əmin olduqlarını bildirib.

Leninqrad vilayətinin vitse-qubernatoru Sergey Perminov Leninqrad vilayətinin qubernatoru Aleksandr Drozdenkonun adından 28 May - Respublika Günü münasibətilə ünvanlanmış təbrik məktubunu Baş konsul Sultan Qasımova təqdim edib. Leninqrad vilayətinin vitse-qubernatoru Sergey Perminov Azərbaycan ilə Rusiya arasındakı tarixi dostluq münasibətlərinin əhəmiyyətini qeyd edərək Leninqrad vilayəti Hökumətinin Azərbaycan Respublikası Hökuməti ilə əlaqələrinin möhkəmləndirilməsində və əməkdaşlığın inkişaf etdirilməsində maraqlı olduğunu vurğulayıb, regional səviyyədə zəngin əməkdaşlıq potensialının mövcud olduğunu qeyd edib. Tədbirin rəsmi hissəsindən sonra Sankt-Peterburqun məşhur “Mariinskiy” teatrının solisti, “Yelena Obraztsova Beynəlxalq Musiqi Akademiyası”nın tələbəsi, həmyerlimiz Elnarə Məmmədova müxtəlif operalardan ariyalar ifa etdi. Tədbirin davamında qonaqlara “Erarta” muzeyinin restoranında Baş konsuluq adından ziyafət verildi. Respublika günü münasibətilə keçirilmiş tədbirin yekununda qonaqlara Baş konsulluq adından “Baku” jurnalının son nömrələri, Azərbaycan məhsulu olan çay və şirniyyat bağlamaları hədiyyə edildi.