CƏMİYYƏT


Saxta əmtəə nişanı adı altında yuyucu vasitələr istehsal edən sex aşkar edilib

A+ A

Bakı, 7 sentyabr, Elvin Camalov, AZƏRTAC

Vergilər Nazirliyinin əməkdaşları tərəfindən Bakı şəhəri ərazisində aparılan vergi nəzarəti tədbirləri zamanı vergi qanunvericiliyinin tələblərini pozmaqla saxta əmtəə nişanlı yuyucu vasitələrinin istehsalı ilə məşğul olan sex aşkar edilib.

Vergilər Nazirliyinin mətbuat xidmətindən AZƏRTAC-a bildirilib ki, tədbir zamanı fiziki şəxs Abdullayev Elməddin Fazil oğlunun sahibkarlıq fəaliyyəti ilə məşğul olduğu Bakı şəhəri Binəqədi rayonu, Sulutəpə qəsəbəsi, Ruslan Allahverdiyev küçəsində yerləşən obyektində “FRESH” və “ONEX” adlı əmtəə nişanı adı altında mənşəyi bilinməyən kimyəvi yuyucu məhsullar hazırlayıb qablaşdıraraq, müxtəlif ticarət obyektlərinə daşınması və satışa çıxarılması, eləcə də işlərin (xidmətlərin) yerinə yetirilməsinə cəlb edilmiş 5 nəfər fiziki şəxslə hüquqi qüvvəyə minmiş əmək müqaviləsinin (kontraktı) bağlanmadığı müəyyən edilib. Vergi ödəyicisinin anbarından ümumi satış qiyməti 2784 manat olan 0,5,1 və 4 litrlik qablarda 6416 ədəd yuyucu məhsul aşkarlanıb. Əmək müqaviləsi bağlamadan işçiləri işə cəlb etdiyinə görə vergi ödəyicisi barəsində müvafiq akt tərtib edilib və “qara mühasibatlıq” sənədləri götürülüb.

Araşdırma zamanı Elməddin Abdullayevin vergi ödəyicisi kimi 2013-cü ilin dekabrın 9-da qeydiyyatdan keçdiyi, lakin fəaliyyət göstərdiyi istehsal sexinin təsərrüfat subyekti kimi qeydiyyatdan keçirilmədiyi müəyyən olunub.

Vergilər Nazirliyi xəbərdarlıq edir ki, qanunsuz sahibkarlıq fəaliyyəti ilə məşğul olmaq, işçilərin əmək müqaviləsi hüquqi qüvvəyə minmədən işlərin görülməsinə cəlb edilməsi hallarının qarşısı gələcəkdə də qətiyyətlə alınacaq, intizamsız vergi ödəyicilərinə qarşı qanunda nəzərdə tutulmuş ən sərt tədbirlər görüləcək.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.