İQTİSADİYYAT
Səbail rayonunda 2017-ci ilin ilk altı ayının sosial-iqtisadi inkişafının yekunları müzakirə olunub
Bakı, 20 iyul, AZƏRTAC
Səbail Rayon İcra Hakimiyyətində 2017-ci ilin ilk altı ayının sosial-iqtisadi inkişafının yekunları və qarşıda duran vəzifələrə həsr olunmuş hesabat yığıncağı keçirilib.
İcra hakimiyyətindən AZƏRTAC-a bildiriblər ki, rayonun idarə, təşkilat və müəssisələrinin, hüquq-mühafizə orqanlarının, xidmət sahələrinin rəhbərlərinin, eləcə də ictimaiyyətin nümayəndələrinin iştirakı ilə keçirilən yığıncağı açan icra başçısı Eldar Əzizov Nazirlər Kabinetinin 2017-ci ilin ilk altı ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında Prezident İlham Əliyevin proqram xarakterli nitqinin bir sıra məqamlarına toxunub. Bildirib ki, respublikada sosial-iqtisadi məsələlər uğurla həll edilir, ölkəmizdə təhlükəsizlik tədbirləri yüksək səviyyədə təşkil olunur. Altı ayda qeyri-neft iqtisadiyyatı 1,7 faiz, qeyri-neft sənayesi 4,4 faiz artıb, ölkə iqtisadiyyatına 5 milyard dollar sərmayə qoyulub. İlin əvvəlindən ölkənin valyuta ehtiyatları 3 milyard dollar artaraq bu günə 40,6 milyard dollar təşkil edir. Son 6 ayda 101 mini daimi olmaqla 122 min yeni iş yeri açılıb. Bu ilin altı ayında ixrac 36 faiz artıb, idxal 15 faiz azalıb, müsbət saldo 1,9 milyard dollar təşkil edir. Kənd təsərrüfatında artım 2,2 faiz olub. Bu rəqəmlər ölkədə aparılan islahatlar nəticəsində əldə olunan uğurların bariz göstəricisidir.
Səbail Rayon İcra Hakimiyyəti başçısının müavini Eldar Ağayev 2017-ci ilin altı ayında rayonda görülən işlər, həyata keçirilən layihələr, sosial-iqtisadi inkişafda əldə olunmuş uğurlar, mövcud problemlər və onların aradan qaldırılması yolları barədə məlumat verib. Yarım il ərzində Səbail rayonunda 2202 yeni daimi iş yeri, ümumilikdə isə 2003-cü il oktyabrın 1-dən 2017-ci ilin iyulun 1-nə kimi 51345–i daimi olmaqla 54813 yeni iş yeri açılıb. Dövlət Proqramı çərçivəsində Badamdar qəsəbəsinin içməli su təchizatı və kanalizasiya sistemlərinin yenidən qurulması ilə bağlı işlər sona çatmaq üzrədir.
Ölkə başçısının təşəbbüsü ilə rayonda tam yenidənqurmaya ehtiyacı olan, köhnəlmiş yaşayış binalarının sökülüb yerində müasir binaların tikintisi ilə bağlı son bir ildə 10-dan çox müasir layihə təsdiq olunub.
Yığıncaqda çıxış edənlər yerli infrastruktur layihələrinin icra olunması və sahibkarların fəaliyyətinə kömək göstərilməsi, məşğulluğun səviyyəsinin artırılması və yeni iş yerlərinin açılması ilə bağlı əlavə tədbirlərin görülməsi, qanunsuz tikintilərin qarşısının qətiyyətlə alınması, rayonda məskunlaşmış məcburi köçkünlərin sosial-məişət şəraitinin yaxşılaşdırılması və onların məşğulluq, yaşayış məsələlərinin həlli və s. məsələlərə toxundular.