İQTİSADİYYAT


Səbail rayonunda ilin doqquz ayının yekunları müzakirə olunub

A+ A

Bakı, 19 oktyabr, AZƏRTAC

Səbail Rayon İcra Hakimiyyətində 2016-cı ilin doqquz ayının sosial-iqtisadi inkişafının yekunları və qarşıda duran vəzifələrə həsr olunmuş hesabat yığıncağı keçirilib.

Yığıncağı açan rayon icra hakimiyyətinin başçısı Eldar Əzizov ötən 9 ay ərzində ölkəmizdə əldə olunmuş uğurlar, Səbail rayonunda görülən işlər, həyata keçirilən və nəzərdə tutulan layihələr barədə danışıb.

Sonra icra hakimiyyəti başçısının müavini Eldar Ağayev məruzə ilə çıxış edərək bildirib ki, cari ilin 9 ayında Səbail rayonu üzrə iri sənaye müəssisələri tərəfindən 14 milyard 177,3 milyon manatlıq məhsul istehsal edilib və xidmətlər göstərilib (əvvəlki ilin müvafiq dövrü ilə müqayisədə 12,5 faiz çox). İri nəqliyyat müəssisələri tərəfindən görülən iş və xidmətlərin həcmi 287,6 milyon manat olub (keçən ilin müvafiq dövrünə nisbətən 4,3 faiz az). Rabitə müəssisələri tərəfindən görülmüş iş və xidmətlərin dəyəri 92,8 milyon manat olub (keçən ilin müvafiq dövrü ilə müqayisədə 7,3 faiz az).

Doqquz ay ərzində bütün maliyyə mənbələri hesabına əsas kapitala qoyulan investisiya 6 milyard 471,4 milyon manat (keçən ilin müvafiq dövrü ilə müqayisədə 22,8 faiz çox), tikinti-quraşdırma işlərinə yönəldilmiş investisiyanın həcmi 4,281 milyon manat (əvvəlki ilin müvafiq dövrü ilə müqayisədə 26 faiz çox) olub.

Rayonun pərakəndə ticarət şəbəkəsindən əhaliyə 304,9 milyon manat məbləğində (ötən ilin eyni dövründən 3,8 faiz çox) istehlak malları satılıb. Xidmət müəssisələri tərəfindən əhaliyə 114,6 milyon manatlıq pullu xidmət göstərilib ki, bu da 2015-ci ilin müvafiq dövrü ilə müqayisədə 1,1 faiz çoxdur.

İlin əvvəlindən Səbail rayonunda çalışan işçilərin sayı 113 min 844 nəfər, orta aylıq əməkhaqqının məbləği isə 1318,1 manat olub ki, bu da keçən illə müqayisədə 17,2 faiz çoxdur.

Hesabat dövründə Səbail rayonunda 2765 yeni daimi iş yeri açılıb. Ümumilikdə isə 2003-cü il oktyabrın 1-dən rayonda 51 min 285 yeni iş yeri açılıb ki, bunun da 47 min 817–si daimidir.

Yığıncaqda sakinlərin istək və təklifləri dinlənilib, onları narahat edən suallar cavablandırılıb, nöqsanların araşdırılması və aradan qaldırılması üçün aidiyyəti qurumların rəhbərlərinə müvafiq tapşırıqlar verilib.

Tədbirdə Səbail Rayon İcra Hakimiyyəti başçısı aparatının ictimai-siyasi və humanitar məsələlər şöbəsinin böyük məsləhətçisi Rasim İbrahimova Azərbaycan Respublikası Prezidentinin Sərəncamına əsasən dövlət qulluğunda uzun illər səmərəli fəaliyyətinə görə “Tərəqqi” medalı təqdim edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.