Bakı, 30 may, AZƏRTAC

Ənənəyə uyğun olaraq Səbail rayonunun bütün orta ixtisas məktəblərində keçirilən “son zəng” tədbirləri başa çatıb. Bununla əlaqədar məktəblərdə şagirdlər və pedaqoji kollektiv tərəfindən hazırlıq işləri aparılıb, onlar bu bayramın yüksək səviyyədə təşkili və iştirakçıların yaddaşlarında uzun illər boyu qalması üçün əllərindən gələni ediblər.

Səbail rayonundakı 17 orta məktəbdə 1984 pedaqoji işçi çalışır. Məktəblərdə 20577 şagird təhsil alır ki, bu il onların 1492-si məzun olur.

Səbail Rayon İcra Hakimiyyəti başçısı aparatının informasiya təminatı və təhlil sektorundan AZƏRTAC –a bildiriblər ki, “son zəng” tədbirinin keçirildiyi 189-190 nömrəli orta məktəb keçən il iki məktəbin birləşdirilməsi ilə yaradılıb. Məktəbdə hazırda 1580 şagird təhsil alır və onların təlim-tərbiyəsi ilə 153 müəllim məşğul olur. Bu tədris ilində məktəbi dörd sinifdə 101 şagird bitirir, məktəbin yeddi birinci sinfində 194 şagird təhsil alır.

190 nömrəli məktəb 2009-cu ildə, 189 nömrəli orta məktəb isə 2012-ci ildə “Ən yaxşı ümumi təhsil müəssisəsi” müsabiqəsinin, 9 müəllim isə “Ən yaxşı müəllim” müsabiqəsinin qalibləri sırasında olublar. Məktəbdə iki əməkdar müəllim çalışır. 2012-ci ildə 189 nömrəli orta məktəb Dövlət Proqramına uyğun əsaslı təmir olunaraq bütün lazımi avadanlıqla təchiz edilib. Hazırda 190 nömrəli orta məktəbin binası əsaslı təmir olunur.

Tədbirdə 189-190 nömrəli orta məktəbin direktoru, əməkdar müəllim Ceyran Kuliyeva ümummilli lider Heydər Əliyevin Azərbaycan təhsilinin inkişafındakı əvəzsiz xidmətlərindən, hazırda ölkə rəhbərliyi tərəfindən təhsil sahəsində aparılan siyasətdən danışıb, məktəbin qazandığı uğurlar barədə məlumat verib. Qeyd olunub ki, müvafiq Dövlət Proqramına əsasən artıq 190 nömrəli orta məktəbin binasında əsaslı təmirə başlanılıb və sentyabrın əvvəlində işlər başa çatdırılacaq. Direktor Azərbaycan təhsilinə göstərdiyi diqqət və qayğıya görə məktəbin kollektivi adından ölkə Prezidenti İlham Əliyevə və Azərbaycanın birinci xanımı, Heydər Əliyev Fondunun prezidenti Mehriban Əliyevaya minnətdarlığını bildirib. C.Kuliyeva məzunlara müstəqil həyatda atacaqları addımlarda uğurlar arzulayıb.

Tədbirdə Səbail Rayon İcra Hakimiyyətinin başçısı A.Əsgərov Prezident İlham Əliyev tərəfindən ölkədə təhsilin səviyyəsinin yüksəldilməsi, təhsil müəssisələrinin əsaslı təmiri, yenilərinin tikintisi və bütün ləvazimatlarla təminatı, təhsil işçilərinə diqqətin artırılması istiqamətində görülən işlər, ölkənin birinci xanımı, Heydər Əliyev Fondunun prezidenti, Milli Məclisin deputatı Mehriban Əliyevanın təhsilin inkişafı istiqamətindəki fəaliyyəti barədə danışıb.

A.Əsgərov müstəqil həyatın astanasında duran məzunlara uğurlar, ölkəmiz və xalqımız üçün layiqli övlad olmalarını arzulayıb. O, bu il Azərbaycanın paytaxtında keçiriləcək ilk Avropa Oyunlarının ölkəmizin dünyada daha yaxından tanınması və nüfuzunun artmasında əhəmiyyətlini vurğulayıb, məktəbin pedaqoji kollektivinə daha böyük uğurlar diləyib.

Tədbirdə Milli Məclisin iqtisadi siyasət komitəsinin sədri, akademik Ziyad Səmədzadə, valideynlər, müəllimlər, qonaqlar da məzunları təbrik ediblər.