REGİONLAR
Şəhər Bələdiyyələrinin Milli Assosiasiyasının yığıncağında bələdiyyələrin iqtisadi və maliyyə potensialının gücləndirilməsi məsələləri müzakirə edilib VİDEO
Yevlax, 21 aprel, Tahir Ağaməmmədov, AZƏRTAC
Aprelin 21-də Yevlaxda Azərbaycan Şəhər Bələdiyyələrinin Milli Assosiasiyasının (AŞBMA) növbəti ümumi yığıncağı keçirilib.
AZƏRTAC xəbər verir ki, yığıncaqda Azərbaycan Respublikası Prezidenti Administrasiyasının, Milli Məclisin, Ədliyyə Nazirliyinin, qəsəbə və kənd bələdiyyələrinin milli assosiasiyalarının, qeyri-hökumət təşkilatlarının nümayəndələri iştirak ediblər.
Tədbir iştirakçıları əvvəlcə ümummilli lider Heydər Əliyevin Yevlax şəhərinin mərkəzi meydanındakı abidəsi önünə tər çiçəklər düzərək, dahi rəhbərin xatirəsini ehtiramla yad ediblər.
Yığıncaqda AŞBMA-nın sədri Əbülfəz Babayevin qurumun illik hesabatı və fəaliyyətinin əsas istiqamətləri haqqında məruzəsi dinlənilib. Bildirilib ki, ölkədə dövlət quruculuğu siyasətinin uğurla davam etdirilməsi yerli özünüidarəetmə orqanlarının ictimai-siyasi həyata daha yaxından inteqrasiyasına səbəb olub, bələdiyyələrin maliyyə, iqtisadi və kadr potensialının təkmilləşdirilməsinə xidmət edən qanunların qəbulu onların inkişafı üçün möhkəm zəmin yaradıb. Ötən ilin dekabr ayında şəffaf və demokratik şəraitdə keçirilmiş bələdiyyə seçkiləri nəticəsində bələdiyyə üzvlərinin keyfiyyət tərkibinin gücləndirilməsi yerli özünüidarəetmə institutunun daha da möhkəmlənməsinə xidmət edib. Son illər ərzində bələdiyyələr əhalini narahat edən problemlərin həllinə yönəlmiş sosialyönümlü layihələr həyata keçiriblər.
Milli Məclisin regional məsələlər komitəsinin sədri Arif Rəhimzadə, Prezident Administrasiyasının regional idarəetmə və yerli özünüidarəetmə orqanları ilə iş şöbəsinin sektor müdiri Kamran Bayramov tədbirdə çıxış edərək, bələdiyyələrlə bağlı qanunvericilikdən, bələdiyyələrin fəaliyyətinin əlaqələndirilməsi, yerli özünüidarəetmənin inkişafı, vətəndaş cəmiyyətinin qurulması zamanı demokratik prinsiplərin tətbiqində bələdiyyələrin rolunun artırılması məsələlərindən danışıb, tövsiyələrini bildiriblər.
Naxçıvan Muxtar Respublikası Bələdiyyələri Assosiasiyasının sədri Nurələm İbrahimov, Kəpəz, Binəqədi, Mingəçevir, Qax və digər bələdiyyələrin sədrləri görülən işlər, həyata keçirilən layihələr barədə məlumat verib, özünüidarəetmə orqanlarının uğurlu fəaliyyəti ilə əlaqədar bir sıra təkliflər irəli sürüblər.
İşgüzar şəraitdə keçən yığıncaqda 2014-cü ilin iyun ayında keçirilmiş bələdiyyə sədrlərinin III Ümumrespublika toplantısında qarşıya qoyulan vəzifələrin yerinə yetirilməsinin vəziyyəti, o cümlədən əhalini narahat edən problemlərin həllinə yönəldilən sosial layihələrin həyata keçirilməsi, vətəndaşların yerli özünüidarəetmə prosesində iştirakı, vətəndaş-bələdiyyə münasibətlərinin, bələdiyyələrin iqtisadi və maliyyə potensialının gücləndirilməsi və digər məsələlər müzakirə edilib.
Tədbirdə bələdiyyələrin iqtisadi və maliyyə potensialının gücləndirilməsi, vergitutma obyektlərinin və vergi ödəyicilərinin uçotunun aparılması işinin təşkilində bələdiyyələrə kömək göstərilməsi məqsədilə “Bələdiyyələrdə vergitutma obyektlərinin və vergi ödəyicilərinin uçotu proqramı”nın təqdimatı keçirilib.
Yığıncaqda nəzarət təftiş komissiyasının hesabatı dinlənilib, 2015-ci ilin büdcəsi təsdiq edilib və təşkilati məsələlərə baxılıb.